រាជធានីភ្នំពេញ៖ ម៉ូធ័រ អ៊ីមេជ ខេមបូឌា ជាក្រុមហ៊ុនចាកចាយផ្តាច់មុខប្រភេទរថយន្ត ស៊ូបារុ នៅប្រទេសកម្ពុជា នៅផ្សារទំនើបអ៊ីអន នាព្រឹកថ្ងៃទី១៣ កញ្ញា កន្លងទៅនេះ ក្រុមហ៊ុនបានរៀបចំកម្មវិធីប្រកួតដាក់បាតដៃលើរថយន្ត ស៊ូបារុ ជាលើកទី៤ ដោយមានការចូលរួមជាកិត្តិយសពីលោក Jonathan Tan ប្រធានគ្រប់គ្រងទូទៅប្រចាំកម្ពុជា និងវៀតណាម។
ការប្រកួតដាក់បាតដៃលើរថយន្តម៉ាស៊ូបារុ នេះគឺជាការប្រកួតយ៉ាងលំបាកមួយទាមទារឲ្យបេក្ខជនទាំងអស់មានភាពអំណត់អត់ធ្មត់ដល់កម្រិតមួយ ដោយបេក្ខជនត្រូវដាក់បាតដៃស្តាំលើរូបបាតដៃដែលបិទរួចជាស្រេចនៅលើរថយន្ត។ បេក្ខជនដែលឈរយូរជាងគេ១០នាក់ ក្នុងការប្រកួតនឹងបានធ្វើដំណើរទៅប្រកួតជាមួយប្រទេសទាំង១០ផ្សេងទៀត នៅសិង្ហបុរីនៅខែតុលា ខាងមុខនេះ ហើយបេក្ខជនរូបណាមួយ ក្នុងចំណោមទាំងអស់បានឈរដាក់បាតដៃយូរជាងគេ នឹងមានឱកាសទទួលបានរថយន្តស៊ូបារុ Forester 2.Oi-L ស៊េរីឆ្នាំ២០១៤ មួយគ្រឿងដែលមានតម្លៃប្រមាណ៥៦.០០០ដុល្លារអាមេរិកផងដែរ។
គួរបញ្ជាក់ថា កាលពីឆ្នាំមុនកន្លងទៅថ្មីៗនេះ លោក Yusman Writh ជនជាតិសិង្ហបុរី ជាបេក្ខជនដែលឈរបានយូររហូតដល់៧៥ម៉ោងនិង១នាទីក្នុងចំណោមបេក្ខជន៣៩៩នាក់ផ្សេងទៀត គឺទទួលបានរថយន្តស៊ូបារុដ៏ថ្មីសាឡាងមួយគ្រឿងពីក្រុមហ៊ុន។
ចំណែកការប្រកួតឆ្នាំនេះ ក៏មានលក្ខណៈស្វិតស្វាញមិនចាញ់ឆ្នាំមុនផងដែរ ទាំងលក្ខខណ្ឌ និងបញ្ញាតិផ្សេងៗ ប្រើក្នុងការប្រកួតនេះ គឺដូចវគ្គប្រកួតផ្តាច់ព្រ័ត្រនៅប្រទេសសិង្ហបុរីដែរ។ បេក្ខជនដែលចូលរួមការប្រកួតត្រូវឈរដាក់បាតដៃស្តាំរបស់ខ្លួន នៅលើរថយន្តមានពេលកំណត់ គឺបេក្ខជនត្រូវអនុញ្ញាតឲ្យឈប់សម្រាក១០នាទី ក្នុងរយៈពេល៦ម៉ោងម្តង។ ទន្ទឺមនឹងនោះផងដែរ ក្នុងការប្រកួតយើងអាចមានហ្គេមផ្សេងៗ សម្រាប់លេងកំសាន្តផងដែរ ប៉ុន្តែប្រសិនបេក្ខជនធ្វើខុសលក្ខខណ្ឌក្នុងពេលការប្រកួត ត្រូវដកចេញពីការប្រកួតភ្លាមៗ។ ការប្រកួតនេះនឹងបញ្ចប់នៅពេលយើងស្វែងរកអ្នកឈ្នះ១០រូបចុងក្រោយក្នុងបេក្ខជនចូលរួមប្រកួតទាំងអស់៕
ចែករំលែកព័តមាននេះ