ខេត្តបាត់ដំបង ៖ នារីស្រស់សោភាម្នាក់ដែលមានស្វាមីជាអាណិកជននៅសហរដ្ឋអាមេរិកបានធ្វើអត្តឃាតដោយចង.កនៅក្នុងបន្ទប់លើផ្ទះ ស្ថិតនៅក្នុងភូមិកសិកម្ម ឃុំតាពូង ស្រុកថ្មគោល ហើយត្រូវឪពុកឃើញនៅម៉ោង៥និង៣០នាទីល្ងាចថ្ងៃទី១០ កញ្ញា។ ចំពោះការចង.កធ្វើអត្តឃាតនេះ ក្រុមគ្រួសារអះអាងថា ព្រោះតែខឹងនឹងឪពុកម្ដាយជំទាស់មិនឲ្យនាងទៅរៀនបន្តនៅរាជធានីភ្នំពេញ បន្ទាប់ពីរៀបការរួចមក ព្រោះយល់ថា មានប្តីហើយរៀនអីទៀត ។
មន្ត្រីនគរបាលមូលដ្ឋានបានឲ្យដឹងថា នារីដែលធ្វើអត្តឃាតនេះ ឈ្មោះលឿង ម៉េងលី អាយុ២១ឆ្នាំ ទើបរៀបការបានរយៈពេល៤ខែជាមួយអាណិកជនខ្មែររស់នៅសហរដ្ឋអាមេរិក ។ មន្ត្រីដដែលបន្តថា នាងបានយកអាវរាត្រីចង.កខ្លួនឯងនឹងតម្ពក់វាំងនន ភ្ជាប់ជាមួយបង្អួច ដើម្បីបញ្ចប់ជីវិតចោលស្វាមីនៅឯនាយសមុទ្រ ។ ឪពុករបស់នាងគឺលោក លឿង វិច្ឆិកា ត្រូវបានសមត្ថកិច្ចស្រង់សម្តីថា កូនស្រីគាត់រៀបការជាមួយស្វាមីជាអាណិកជននៅសហរដ្ឋអាមេរិករយៈពេល៤ខែហើយ ។ ក្រោយពីស្វាមីនាងត្រឡប់ទៅអាមេរិកវិញ នាងបានទទូចសុំទៅរៀនបន្តនៅរាជធានីភ្នំពេញ ប៉ុន្តែគាត់និងប្រពន្ធបានបដិសេធសំណូមពររបស់កូនស្រី ព្រោះយល់ថា នាងមានស្វាមីហើយ ។ ប៉ុន្តែដោយនាងទទូចខ្លាំងពេក គាត់និងប្រពន្ធក៏យល់ព្រម តែចាំរួចបុណ្យភ្ជុំបិណ្ឌសិន ខណៈនាងចង់ទៅរៀនមុនពិធីបុណ្យភ្ជុំបិណ្ឌ ដែលជាហេតុនាំឲ្យមានបញ្ហានេះកើតឡើង ។
គាត់បញ្ជាក់ទៀតថា នៅថ្ងៃកើតហេតុកូនស្រីគាត់បានឡើងទៅពួនសម្ងំដេកក្នុងបន្ទប់តាំងពីម៉ោង១១ព្រឹក ។ លុះនៅម៉ោង៥និង៣០នាទីល្ងាចថ្ងៃដដែល ដោយមិនឃើញកូនស្រីចេញពីបន្ទប់ គាត់ក៏ឡើងទៅគោះទ្វារបន្ទប់ តែមិនឮនាងឆ្លើយតប ទើបមានការសង្ស័យក៏ទម្លុះទ្វារចូលទៅមើល ស្រាប់តែឃើញកូនស្រីចង.កសម្លាប់ខ្លួនបាត់ទៅហើយ ទើបមានការភ្ញាក់ផ្អើលឡើងតែម្ដង ។ មិនមានប្រភពណាមួយបានដឹងអំពីមូលហេតុលើសពីនេះដែលនាំឲ្យនាង លឿង ម៉េងលី ធ្វើអត្តឃាតចោលស្វាមីនៅឯនាយសមុទ្រនោះទេ ក្រៅតែអំពីការអះអាងរបស់ឪពុកម្តាយនាង ។ ប៉ុន្តែអ្វីដែលនាំឲ្យមជ្ឈដ្ឋាននានាកំពុងមានចម្ងល់នោះ គឺនៅពេលឪពុកម្តាយនាងអនុញ្ញាតឲ្យទៅបន្តការសិក្សានៅភ្នំពេញហើយ ហេតុអ្វីបានជានាងទទូចចង់ទៅមុនថ្ងៃបុណ្យភ្ជុំ ខណៈឪពុកម្ដាយនាងឲ្យរង់ចាំបុណ្យភ្ជុំបិណ្ឌចប់់រួចរាល់សិន ?
ជុំវិញការស្លាប់របស់នាង លឿង ម៉េងលី បើតាមការសន្និដ្ឋានជាបឋមរបស់សមត្ថកិច្ចជំនាញថា ទំនងជាធ្វើអត្តឃាតតាំងពីវេលាថ្ងៃត្រង់មកម្ល៉េះ នេះបើតាមការពិនិត្យលើស្ថានភាពសព ។ ប៉ុន្តែក្រុមគ្រួសារបានព្យាយាមបញ្ជូននាងទៅឲ្យគ្រូពេទ្យជួយពិនិត្យដោយសារមិនអស់ចិត្ត ។ សពត្រូវបានក្រុមគ្រួសាររៀបចំធ្វើបុណ្យតាមប្រពៃណី ក្រោយពីសមត្ថកិច្ចជំនាញបានធ្វើកោសល្យវិច័យរួចហើយ ៕
ចែករំលែកព័តមាននេះ