ខេត្តកណ្តាល ៖ បន្ទាប់ពីនគរបាលក្រុងតាខ្មៅធ្វើការឃាត់ខ្លួនភិក្ខុសង្ឃមួយអង្គ ដែលគេស្គាល់ច្បាស់ថា ជាចៅអធិការវត្តចំប៉ាចារុ បានក្លែងខ្លួនដោះស្បង់ចីវរចូលច្រៀងខារ៉ាអូខេនៅហាងឌីយ៉ាងម៉ង់ផាលេស កាលពីរសៀលថ្ងៃទី០២ កញ្ញា ហើយបាននាំមកសាកសួររួចហើយនោះ នៅព្រឹកថ្ងៃទី៣ កញ្ញា ភិក្ខុសង្ឃដែលមិនទាន់អស់កាមកិលេស ត្រូវបាននគរបាលក្រុងតាខ្មៅ ប្រគល់ទៅឱ្យខាងធម្មការ និងសាសនា ខេត្តកំពង់ស្ពឺ ដើម្បីចាត់ការបន្តតាមវិន័យធម៌ ។
លោកស៊ឹម ប៊ុតបណ្ឌិត អធិការនគរបាលក្រុងតាខ្មៅ ប្រាប់ឱ្យដឹងថា ភិក្ខុសង្ឃមួអង្គដែលបន្លំខ្លួនចូលច្រៀងខារ៉ាអូខេ ជាមួយមិត្តភក្តិហើយត្រូវបាននគរបាលក្រុងតាខ្មៅឃាត់ខ្លួនមកសាកសួរនេះ ត្រូវបានមន្ត្រីធម្មការ និងសាសនាខេត្តកំពង់ស្ពឺមកទទួលយកទៅដើម្បីចាត់ការបន្តតាមវិន័យសង្ឃ ចំណែកមិត្តភក្តិនិងសាច់ញាតិ៤នាក់ទៀត ត្រូវបានអប់រំឱ្យត្រឡប់ទៅវិញ នៅព្រឹកថ្ងៃទី០៣ កញ្ញា ។ លោកបញ្ជាក់ថា ដោយសារភិក្ខុសង្ឃនោះប្រព្រឹត្តខុសនឹងវិន័យសង្ឃ ទើបលោកប្រគល់ឱ្យទៅខាងមន្ត្រីធម្មការនិងសាសនាខេត្តកំពង់ស្ពឺវិញ និងដោយមានការឯកភាពពីលោកព្រះរាជអាជ្ញាសាលាដំបូងខេត្តផងដែរ ។
សង្ឃដែលប្រព្រឹត្តខុសនឹងវិន័យនោះ មានឈ្មោះ សុង រតនៈ អាយុ៣៦ឆ្នាំ ជាចៅអធិការវត្តចំប៉ាចារុ នៅភូមិពពេល ឃុំពពេល ស្រុកគងពិសី ខេត្តកំពង់ស្ពឺ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ