ខេត្តស្វាយរៀង ៖ មានការភ្ញាក់ផ្អើលទាំងព្រឹកថ្ងៃទី៣ កញ្ញា ២០១៤ នៅចំណុចភូមិព្រៃបឹង ឃុំម៉ឺនជ័យ ស្រុករំដួល ដោយសារកុមារាអាយុ៦ឆ្នាំម្នាក់ធ្លាក់ពីលើកៅអីគោយន្តកែច្នៃដាំក្បាលចូលកាឡេប្រអប់លេខគោយន្តរមូរសក់ និងសាច់ក្បាលដាច់ដល់ឆ្អឹងលលាដ៏ចំនួន២កន្លែងបណ្តាលឱ្យសន្លប់ សំណាងល្អចាប់ហ្វ្រាំងជាប់បើទៅមុខទៀតច្បាស់ជាកិន ឬកៀបស្លាប់មិនខាន។
កុមារារងគ្រោះឈ្មោះរ៉ុន សុវណ្ណរាជ្យ អាយុ៦ឆ្នាំ រស់នៅភូមិហែកសំណាញ់ ឃុំម៉ឺនជ័យ ស្រុករំដួល។
បើតាមស្ត្រីជាម្តាយឈ្មោះមាស ថា អាយុ៣០ឆ្នាំ បានឱ្យដឹងថា មុនពេលកើតហេតុពូបង្កើតកុមារារងគ្រោះបានបើកគោយន្តកែច្នៃដឹកខ្សាច់យកទៅឱ្យគេនៅភូមិកើតហេតុខាងលើ ហើយបានលើកក្មួយឱ្យជិះលើកៅអីគោយន្តខាងស្តាំដៃ ។ ក្រោយពីចាក់ខ្សាច់ឱ្យគេហើយបើកត្រឡប់មកផ្ទះវិញ មិនដឹងយ៉ាងម៉េចស្រាប់តែកុមារារងគ្រោះដាំក្បាលធ្លាក់ចូលកាឡេគោយន្តស្រូបសក់ និងសាច់ក្បាលដាច់ដល់លលាដ៏របួស២កន្លែង ទម្រាំពូរបស់គេលោតចុះពន្លត់ម៉ាស៊ីនបាន កុមារារងគ្រោះហូរឈាមសន្លប់ឈឹង។
ក្រោយកើតហេតុកុមារារងគ្រោះត្រូវបានសាច់ញាតិហៅរថយន្តសង្គ្រោះមកដឹកបញ្ជូនទៅមន្ទីរពេទ្យ រីឯម្តាយកុមាររងគ្រោះរន្ធត់ចិត្តពេកយំរហូតសន្លប់ដែរ៕
ចែករំលែកព័តមាននេះ