ខេត្តមណ្ឌលគិរី ៖ ក្រុមអ្នកយកព័ត៌មាន៤នាក់នៅខេត្តមណ្ឌលគិរី ត្រូវមេបញ្ជាការកងរាជអាវុធហត្ថស្រុកកោះញែកគំរាមគំហែងចាប់ខ្លួន និងដកយកប័ណ្ណសម្គាល់ខ្លួន ខណៈដែលចុះទៅបំពេញការងារនៅស្រុកកោះញែកនោះ ។
ហេតុការណ៍ខាងលើនេះ កើតឡើងកាលពីវេលាម៉ោង៩ និង៣០នាទីយប់ថ្ងៃទី០២ កញ្ញា ២០១៤ ស្ថិតនៅភូមិ-ឃុំស្រែសង្គម ស្រុកកោះញែក ។
ក្រុមអ្នកយកព័ត៌មានទាំង៤នាក់ ដែលត្រូវមេបញ្ជាការអាវុធហត្ថដកយកប័ណ្ណសម្គាល់មានលោកកេត សារ៉េត អ្នកយកព័ត៌មានទូរទស្សន៍ហង្សមាស, លោកមន ម៉ារ៉េត អ្នកយកព័ត៌មានទូរទស្សន៍អប្សារា, លោកអ៊ិត ភារុន អ្នកយកព័ត៌មានទូរទស្សន៍បាយ័ន និងលោកសាយ ករុណា អ្នករាយការណ៍ព័ត៌មានកាសែតកោះសន្តិភាព ។
អ្នករាយការណ៍ព័ត៌មានទាំងបួននាក់ ដែលត្រូវលោកមេបញ្ជាការប៉េអឹមស្រុកកោះញែកដកហូតយកប័ណ្ណសម្គាល់ខ្លួនខាងលើបានឱ្យដឹងថា នៅពេលពួកគេទទួលដំណឹងពីការចុះរុះរើផ្ទះអនាធិបតេយ្យនៅស្រុកកោះញែករួចមក ពួកគេក៏បានធ្វើដំណើរតាមរយៈរថយន្តមួយគ្រឿង ដែលជាកម្មសិទ្ធិរបស់បុគ្គលិកទូរទស្សន៍ហង្សមាស ដើម្បីទៅយកព័ត៌មាន ។
ប្រភពបន្តថា ការធ្វើដំណើរទៅយកព័ត៌មាននៅស្រុកកោះញែកនោះ អ្នកយកព័ត៌មានទាំង៤នាក់ បានចេញដំណើរពីទីរួមខេត្តមណ្ឌលគិរីប្រហែលជាម៉ោង១រសៀលថ្ងៃទី០២ កញ្ញា ២០១៤ រហូតដល់វេលាម៉ោង៥ និង២០នាទីល្ងាច ទើបទៅដល់ទីរួមស្រុកកោះញែក ។ បើតាមការជាក់ស្តែង ចម្ងាយផ្លូវពីទីរួមខេត្តមណ្ឌលគិរី ទៅស្រុកកោះញែក គេចំណាយពេលតែ២ម៉ោងប៉ុណ្ណោះនឹងទៅដល់គោលដៅជាមិនខាន តែស្ថានភាពផ្លូវលំបាកខ្លាំង ហើយរថយន្តក្រុមអ្នកយកព័ត៌មានក៏មានបញ្ហាពិបាកធ្វើដំណើរ ព្រោះគៀបហ្វ្រាំងបើកទៅមុខមិនរួច ។ ដោយមានសភាពហេវហត់គួបផ្សំរថយន្តមានបញ្ហាផងនោះ ក្រុមអ្នកយកព័ត៌មានក៏សម្រេចចតរថយន្តលើចិញ្ចើមផ្លូវជាតិ ដែលទើបស្ថាបនាថ្មីឆ្ពោះទៅខេត្តរតនគិរី ដើម្បីឈប់សម្រាក និងហូបនំប៉ាវដោយនាំគ្នាអង្គុយលេងមួយស្របក់ធំ។
ក្រោយឈប់សម្រាកបានប្រហែល២០នាទី គេក៏ឃើញមានរថយន្តបែនខ្នាតធំមួយគ្រឿងបានបើកមកដល់ និងមានរថយន្តវីហ្គោអត់ស្លាកលេខពណ៌ស្ករ បើកដោយបុរស២នាក់តាមពីក្រោយ ។ នៅពេលដែលឃើញរថយន្តរបស់ក្រុមអ្នកយកព័ត៌មាន ម្ចាស់រថយន្ត
វីហ្គោ ក៏បានចុះមកសួរនាំថា មកពីខាងណានៅខាងណី បានជានាំគ្នាឈប់រថយន្តតាមចិញ្ចើមផ្លូវបែបនេះ ឬចង់បង្កើតកុងត្រូលជជុះ ។ នៅគ្រានោះ លោកមេបញ្ជាកំពុងសាកសួរក្រុមអ្នកយកព័ត៌មាន អ្នកយកព័ត៌មានទូរទស្សន៍ហង្សមាស ក៏បានសួរទៅលោកមេបញ្ជាការប៉េអឹមវិញថា ចុះលោកសមត្ថកិច្ចខាងណាដែរ បានជាមកសួរពួកខ្ញុំចឹង ព្រោះលោកមេបញ្ជាការពុំមានស្លៀកពាក់ឯកសណ្ឋាន និងណែនាំខ្លួនជាមុនទេ ថា លោកគឺជាសមត្ថកិច្ច និងថែមទាំងបានយកពិលមកបញ្ចាំងដាក់មុខគេ រកមើលអ្វីពុំឃើញឡើយ។
គ្រាន់តែសួរមិនទាន់ចប់ផង ស្រាប់តែលោកមេប៉េអឹមខឹងច្រឡោត ទាររកប័ណ្ណសម្គាល់ខ្លួនយកទៅទុក និងបានបញ្ជាក់ថា បើចង់បានទៅយកនៅស្នាក់ការរបស់លោក ។ ព្រោះអ្នកកាសែតនៅពេលចូលមកដល់ដែនដីដែលលោកគ្រប់គ្រង ត្រូវសុំការអនុញ្ញាតពីលោកសិន ទើបអាចដើរយកព័ត៌មានបាន ។
ចម្ងល់នានាបានផុសឡើងថា តើការចតរថយន្តតាមដងផ្លូវរបស់ប្រជាពលរដ្ឋខុសច្បាប់បែបណាខ្លះ? បើគ្រាន់តែឈប់រថយន្តសម្រាកយកកម្លាំងបន្តដំណើរចាំបាច់ សុំការអនុញ្ញាតពីសមត្ថកិច្ចដែរឬយ៉ាងណា? ទោះជាបែបណាក៏ដោយ អ្នកយកព័ត៌មានពុំអាចសុំការបំភ្លឺពីមេបញ្ជាប៉េអឹមស្រុកកោះញែកបានទេនៅព្រឹកថ្ងៃទី៣ កញ្ញា ២០១៤ នេះ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ