រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី២ កញ្ញា បានបើកសវនាការជម្រះក្តីជនជាប់ចោទចំនួន៤នាក់ ក្នុងនោះមានស្ត្រីខ្មែរម្នាក់ផង ដែលត្រូវបានចាប់ខ្លួននិងចោទប្រកាន់ពីបទដឹកជញ្ជូននូវសារធាតុគ្រឿងញៀនខុសច្បាប់ជាង២,៥គីឡូក្រាមពីប្រទេសប្រេស៊ីលមកម្ពុជា កាលពីខែកុម្ភៈ កន្លងទៅ។
ជនជាប់ចោទទាំង៤នាក់ ១-ឈ្មោះម៉េង ស៊ីនួន ភេទស្រី ហៅចយ អាយុ៣០ឆ្នាំ ជនជាតិខ្មែរ ២-ឈ្មោះ Macoy Mavill ភេទស្រី អាយុ៤២ឆ្នាំ ជនជាតិហ្វីលីពីន ៣-ឈ្មោះ Emmanual Thankgod ភេទប្រុស អាយុ៣១ឆ្នាំ និង៤-ឈ្មោះMichel Sunshine អាយុ៣១ឆ្នាំ ជនជាតិនីហ្សេរីយ៉ា ។
ការជម្រះក្តីបានធ្វើឡើងដោយមានវត្តមានលោក ហេង កេសរោ ចៅក្រមសាលាដំបូងរាជធានីភ្នំពេញ ចំពោះមុខជនជាប់៤នាក់ និងមេធាវីការពារក្តីចំនួន២នាក់ លោកមេធាវី សំ សុខគង់ និងលោកមេធាវី ផេង ហេង។ នៅក្នុងពេលសវនាការលោកចៅក្រមបានថ្លែងថាឈ្មោះ Macoy Mavill ភេទស្រី អាយុ៤២ឆ្នាំ ជនជាតិហ្វីលីពីន ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទី១២ កុម្ភៈ ជាមួយនឹងវ៉ាលីសដែកមួយ បន្ទាប់ពីមានការសង្ស័យថាវ៉ាលីសនោះមានផ្ទុកថ្នាំញៀន។ ក្រោយពេលឆែកឆេរសមត្ថកិច្ចបានរកឃើញថ្នាំញៀនប្រភេទកូកាអ៊ីនទម្ងន់ជាង២,៥គីឡូក្រាម ដែលនៅក្នុងវ៉ាលីសនោះបង្កប់សម្ភារប្រើប្រាស់ផ្សេងៗគ្នា។
លោកចៅក្រមបានបញ្ជាក់ថា ជនជាប់ទាំង៤នាក់ពិតជាមានជាប់ពាក់ព័ន្ធក្នុងការប្រតិបត្តិការដឹកជញ្ជូនដោយខុសច្បាប់នូវសារធាតុញៀនប្រាកដមែន ព្រោះមានភស្តុតាងគ្រប់គ្រាន់ក្នុងការដាក់បន្ទុកពួកគាត់តាមមាត្រា៤០ នៃច្បាប់គ្រឿងញៀនកម្ពុជា ៕
ចែករំលែកព័តមាននេះ