រាជធានីភ្នំពេញ ៖ បន្ទាប់ពីការទាមទារប្រាក់ឈ្នួលអប្បបរមារបស់កម្មករនិយោជិតបានស្ងប់ស្ងាត់មួយរយៈពេលមក ក្រុមសហជីពគ្រោងនឹងធ្វើយុទ្ធនាការទាមទារប្រាក់ឈ្នួលជូនកម្មករជាថ្មី ។ នេះបើតាមការអះអាងរបស់ប្រធានសហព័ន្ធសហជីពចលនាកម្មករ ។ លោក ប៉ាវ ស៊ីណា ប្រធានសហព័ន្ធសហជីពចលនាកម្មករបានឱ្យដឹងតាមទូរស័ព្ទនៅថ្ងៃទី២ កញ្ញា ថា ក្រុមសហជីពរបស់លោក គ្រោងនឹងធ្វើយុទ្ធនាការ និងបាតុកម្មជាថ្មីទៀត ដើម្បីទាមទារឱ្យរាជរដ្ឋាភិបាល និងភាគីពាក់ព័ន្ធទាំងអស់ដំឡើងប្រាក់ឈ្នួលជូនកម្មករដល់១៧៧ដុល្លារក្នុងមួយខែនៅចុងឆ្នាំ២០១៤នេះ ។
ការទាមទារជាថ្មី នឹងមានការជួបគ្នានៅតាមបណ្តារោងចក្រដែលជាសមាជិក រួមទាំងមានការចែក ខិត្តប័ណ្ណ និងការពាក់អាវដែលមានស្លាកសញ្ញាតម្លៃ១៧៧ដុល្លារ និងឈ្មោះក្រុមហ៊ុនល្បីៗដែលបញ្ជាទិញសម្លៀកបំពាក់ពីប្រទេសកម្ពុជាផង ។ គោលបំណងនៃការប្រើស្លាកសញ្ញាទាំងនេះត្រូវបានលោក ប៉ាវ ស៊ីណា អះអាងថា ដើម្បីឱ្យអ្នកបញ្ជាទិញជួយអន្តរាគមន៍ជុំវិញបញ្ហាជីវភាពរបស់កម្មករខ្មែរ ដែលខិតខំធ្វើការតែកម្រិតជីវភាពរស់នៅវិញកំពុងតែជួបការលំបាក ។ តាមការឱ្យដឹងពីលោក ប៉ាវ ស៊ីណា ដដែលថា នៅថ្ងៃទី១៧ កញ្ញា ខាងមុខ ក្រសួងការងារ និងបណ្តុះបណ្តាលវិជ្ជាជីវៈនឹងកោះប្រជុំពិភាក្សាពីបញ្ហាប្រាក់ឈ្នួលកម្មករ ប៉ុន្តែសហជីពរបស់លោកមិនបានចូលរួមទេ ពីព្រោះថាក្រសួងការងារកោះអញ្ជើញតែសហជីពដែលមានឈ្មោះជាសមាជិកក្នុងក្រុមប្រឹក្សាការងារ ។
លោក ប៉ាវ ស៊ីណា បញ្ជាក់ថា «សម្រាប់រូបខ្ញុំ និងលោក ជា មុនី អ្នកស្រី យ៉ាង សុភ័ណ្ឌ និងតំណាងសហជីពមួយចំនួនទៀតមិនបានចូលរួមទេ ព្រោះមិនមែនជាសមាជិកក្នុងគណៈកម្មការប្រឹក្សាការងារ (LAC) ។ សម្រាប់ខ្ញុំ ដើម្បីបញ្ចប់បញ្ហាប្រាក់ឈ្នួល ក្រសួងការងារគួរតែអញ្ជើញភាគីសហជីពដែលតំណាងឱ្យកម្មករ ព្រមទាំងសហជីពដែលកំពុងទាមទារប្រាក់ឈ្នួលនេះ ឱ្យមានវត្តមានក្នុងកិច្ចប្រជុំពាក់ព័ន្ធនឹងប្រាក់ឈ្នួលនោះ» ។ ទោះជាយ៉ាងណាក្តី កិច្ចប្រជុំនៅថ្ងៃទី១៧ កញ្ញា ខាងមុខ លោកឱ្យដឹងទៀតថា មានតែសហជីពលោក អាត់ ធន់ និងសហជីពអ្នកស្រី ម៉ម ញឹម និងសហជីពចំនួន៥ទៀត ជាសហជីពដែលត្រូវទទួលស្គាល់ថា គាំទ្ររាជរដ្ឋាភិបាល និងកំពុងបម្រើការងារក្នុងក្រសួងការងារ ។ ដូច្នេះ វាគ្មានតម្លាភាពសម្រាប់ការផ្តល់ប្រាក់ឈ្នួលដល់កម្មករនោះទេ ។
លោក ប៉ាវ ស៊ីណា បានបញ្ជាក់អំពីមូលហេតុដែលក្រុមសហជីពទាមទារប្រាក់ឈ្នួល១៧៧ដុល្លារ ដោយសារតែការទាមទារ១៦០ដុល្លារនោះបានទាមទារក្នុងឆ្នាំ២០១៣ ហើយ១៦០ដុល្លារនោះ គឺជាតួលេខដែលក្រសួងការងារបានដាក់ឱ្យសហជីពជ្រើសរើស ។ ឆ្នាំ២០១៣ កម្មករបាន៨០ដុល្លារ ហើយរូបមន្តរបស់ក្រសួងបានកំណត់ដំឡើង២០%នៃប្រាក់ខែគោល (រូបមន្តទី១) ។ មួយទៀត ៨០បូក២០ដុល្លារ និងរូបមន្តទី៣ គឺ៨០បូក៨០ដុល្លារ ។ ដូច្នេះក្រុមសហជីពរបស់យើងបានសម្រេចយករូបមន្ត៨០បូក៨០ ព្រោះវាធ្វើឱ្យកម្មករអាចរស់នៅក្នុងកម្រិតជីវភាពមួយសមរម្យ ។ លោក ប៉ាវ ស៊ីណា ឱ្យដឹងបន្ថែមចំពោះរូបមន្ត៨០+៨០នេះ គឺត្រូវបានក្រុមសហជីពដាក់ទៅជជែកជាមួយនិយោជក ប៉ុន្តែក្រុមនិយោជកលើកឡើងថា រូបមន្តនេះគ្មានមូលដ្ឋានណាមួយច្បាស់លាស់ក្នុងការស្រាវជ្រាវ ។ ដូច្នេះហើយទើបក្រុមសហជីពទាំងអស់យកតាមរបាយការណ៍របស់អនុគណៈកម្មការប្រឹក្សាការងារ ជាគណៈកម្មការត្រីភាគី បានស្រាវជ្រាវរកឃើញថាកម្មករនិយោជិត ត្រូវការចំណាយក្នុងមួយខែពី១៥៧ដុល្លារទៅ១៧៧ដុល្លារ ។
តាមការអះអាងរបស់លោក ប៉ាវ ស៊ីណា ដដែលថា មូលហេតុដែលក្រុមសហជីពទាមទារប្រាក់ខែនោះ សុទ្ធតែមានឯកសារ ក៏ដូចជាមូលដ្ឋានគ្រប់គ្រាន់ ដូចជាការចំណាយ និងចំណេញរបស់និយោជក ក្នុងការជជែកជាមួយក្រសួងការងារ ។ ប្រធានសហជីពរូបនេះបានព្រមានថា ប្រសិនបើគ្មានដំណោះស្រាយណាមួយជាក់លាក់ទេនោះ សកម្មភាព ឬសន្ទុះនៃការទាមទារដំឡើងប្រាក់ឈ្នួលពីសំណាក់កម្មករ នឹងកើតមានឡើងដូចជាចុងឆ្នាំ២០១៣ និងដើមឆ្នាំ២០១៤ នេះ ។ ទាក់ទិននឹងកិច្ចប្រជុំនៅថ្ងៃទី១៧ កញ្ញា ខាងមុខពីបញ្ហាប្រាក់ឈ្នួលកម្មករ និយោជិត ក៏ដូចជាចង់ដឹងពីវិធានការនានារបស់ក្រសួងការងារ និងបណ្តុះបណ្តាលវិជ្ជាជីវៈ ចំពោះការព្រមានធ្វើបាតុកម្មទាមទារប្រាក់ឈ្នួល១៧៧ដុល្លារនោះ កោះសន្តិភាព បានព្យាយាមសុំការអត្ថាធិប្បាយពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ តែទូរស័ព្ទគ្មានអ្នកទទួល ។
ស្របពេលជាមួយគ្នានេះ លោក ជា សុខហៀង ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឱ្យប្រធានសហព័ន្ធសហជីពចលនាកម្មករ (CUMW) លោក បា៉វ ស៊ីណា ចូលខ្លួននៅថ្ងៃទី១២ កញ្ញា ខាងមុខ ដើម្បីសាកសួរពាក់ព័ន្ធនឹងអំពើហិង្សាដោយចេតនាកាលពីចុងឆ្នាំ២០១៣ និងដើមឆ្នាំ២០១៤ ។ តាមដីកាបង្គាប់ឱ្យចូលខ្លួន បានចោទប្រកាន់លើឈ្មោះ ប៉ាវ ស៊ីណា ពីបទហិង្សាធ្វើឱ្យខូចខាតដោយចេតនាមានស្ថានទម្ងន់ទោស គំរាមកំហែងធ្វើឱ្យខូចខាតដែលភ្ជាប់នូវបញ្ហាអ្វីមួយ និងប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ ប្រព្រឹត្តនៅមុខសួនឧស្សាហកម្មកាណាឌីយ៉ា ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី២៥ ធ្នូ ឆ្នាំ២០១៣ រហូតដល់ថ្ងៃទី៣ មករា ឆ្នាំ២០១៤ តាមមាត្រា២១៨ ,៤១១ និង៤២៤ នៃក្រមព្រហ្មទណ្ឌ និងមាត្រា៧៨នៃច្បាប់ស្តីពីចរាចរណ៍ផ្លូវគោក ។
ដីកាបង្គាប់ដដែលបានឱ្យដឹងទៀតថា ឈ្មោះ ប៉ាវ ស៊ីណា ត្រូវចូលខ្លួនមកកាន់សាលាដំបូងរាជធានីភ្នំពេញ នៅថ្ងៃទី១២ កញ្ញា ឆ្នាំ២០១៤ ម៉ោង៨កន្លះព្រឹក ដើម្បីសាកសួរពីដំណើររឿង«ហិង្សាដោយចេតនាមានស្ថានទម្ងន់ទោស ធ្វើឱ្យខូចខាតដោយចេតនាមានស្ថានទម្ងន់ទោស គំរាមកំហែងថានឹងធ្វើឱ្យខូចខាតដែលភ្ចាប់នូវបញ្ហាអ្វីមួយ និងប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ» ។ លោក ប៉ាវ ស៊ីណា ប្រធានសហព័ន្ធសហជីពចលនាកម្មករបានឱ្យកោះសន្តិភាពដឹងនៅថ្ងៃទី២ កញ្ញា ថា រូបលោកនឹងចូលតាមការកោះអញ្ជើញរបស់តុលាការនៅថ្ងៃទី១២ កញ្ញា ខាងមុខនេះ ។ ទោះជាយ៉ាងណាក្តី ប្រធានសហព័ន្ធសហជីពរូបនេះ បានហៅការកោះអញ្ជើញរបស់តុលាការ ថាជាករណីគំរាមកំហែងមួយថ្មីមកលើរូបលោក បន្ទាប់ពីបញ្ហាប្រាក់ឈ្នួលកម្មករបានស្ងប់ស្ងាត់មួយរយៈពេលមក ៕
ចែករំលែកព័តមាននេះ