រាជធានីភ្នំពេញ ៖ សភាស៊ើបសួរសាលាឧទ្ធរណ៍កាលពីរសៀលថ្ងៃទី២ កញ្ញា បានបើកសវនាការសួរដេញដោលលើបណ្តឹងសុំនៅក្រៅឃុំរបស់ជនត្រូវចោទជាមន្ត្រីនគរបាលជាតិម្នាក់ ដែលជាប់ពាក់ព័ន្ធពីបទរំលោភលើទំនុកចិត្ត(ឆបោកប្រាក់ពីក្រុមហ៊ុន១លានដុល្លារកន្លះ) តែក្រោយពីសភាស៊ើបសួរចប់ ចៅក្រមជំនុំជំរះបានលើកពេលប្រកាសសម្រេចឲ្យជនត្រូវចោទបាននៅក្រៅឃុំ ឬមិននៅក្រៅឃុំទៅថ្ងៃទី១០ កញ្ញា ខាងមុខនេះ ។
តែទោះជាយ៉ាងណាដើមបណ្តឹង បានមានជំនឿយ៉ាងមុតមាំថា សភាស៊ើបសួរសាលាឧទ្ធណ៍ពិតជានឹងរក្សាការសម្រេចរបស់សាលាដំបូងរាជធានីភ្នំពេញដដែល ពោលគឺនៅបន្តការឃុំខ្លួនជនជាប់សង្សយ័ឈ្មោះប៉ិច ហ៊ី អតីតមន្ត្រីនគរបាលជាតិរូបនេះ រហូតដល់សវនាការលើអង្គសេចក្តី លើសំណុំរឿងរំលោភលើទំនុកចិត្ត នោះជៀសវាងធ្វើឲ្យខូចប្រយោជន៍ដល់ដើមបណ្តឹង ។
សូមបញ្ជាក់ថា កាលពីថ្ងៃទី២២ កក្កដា ដើមបណ្តឹងលើសំណុំរឿងព្រហ្មទណ្ឌមួយ ដែលមានមន្ត្រីនគរបាលក្រសួងមហាផ្ទៃម្នាក់ បានជាប់ពាក់ព័ន្ធស៊ីដាច់ប្រាក់ក្រុមហ៊ុនជាង១លានដុល្លារអាមេរិក នៅក្នុងអំទ្បុងឆ្នាំ២០០៦នោះ បានជំរុញឱ្យតុលាការជួយពន្លឿនលើសំណុំរឿងនេះ ដើម្បីឆាប់បានដាក់ជំនុំជម្រះលើអង្គសេចក្តី និងបានស្នើសុំឲ្យចេញដីកាតាមចាប់ខ្លួនគូកន២-៣នាក់ទៀតដែលកំពុងគេចខ្លួន ។
គួរកត់សម្គាល់ថា នគរបាលព្រហ្មទណ្ឌក្រសួងមហាផ្ទៃ កាលពីព្រឹកថ្ងៃទី១៧ កក្កដា បានចាប់ខ្លួនមន្ត្រីនគរបាលម្នាក់បញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធថាបានស៊ីដាច់ប្រាក់១,៥លានដុល្លាររឿងលក់ដីខ្យល់ឱ្យទៅក្រុមហ៊ុនក្នុងស្រុកមួយ ។ មន្ត្រីនគរបាលម្នាក់នោះឈ្មោះ ប៉ិច ហ៊ី ភេទប្រុស អាយុ៣៦ឆ្នាំ មានទីលំនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ