ខេត្តកំពង់ឆ្នាំង ៖ ប្រជាពលរដ្ឋនៅផ្សារស្រុកបរិបូណ៌ នាព្រឹកថ្ងៃទី១និង២ កញ្ញា បាននាំគ្នាផ្អើលទិញដើមស្មៅម្យ៉ាង ដែលអ្នកលក់អះអាងថា ជាឱសថព្យាបាលរោគ១៤មុខយ៉ាងស័កិ្តសិទ្ធិ ក្នុងតម្លៃថ្លៃគ្រាន់បើដែរគឺមួយគីឡូក្រាមថ្លៃ៣ម៉ឺនរៀល ។ ការលក់ដើមស្មៅនេះដាច់ខ្លាំងណាស់ ព្រោះវាប្លែកដោយគ្រាន់តែមួយព្រឹកថ្ងៃទី១ កញ្ញា លក់ដាច់អស់ជាង១០បាវធំៗ ដែលក្នុងមួយបាវទម្ងន់ជាង៣០ទៅ៤០គីឡូក្រាម ។
ដោយចង់ដឹងការពិត នាព្រឹកថ្ងៃទី២ កញ្ញា ភ្នាក់ងារយកព័ត៌មានយើងបានសុំការអនុញ្ញាត ជួបជាមួយអ្នកលក់ដើមស្មៅខាងលើនេះដោយផ្ទាល់ ។ គាត់ប្រាប់ថា ឈ្មោះ ជា ភន អាយុ៥៤ឆ្នាំ មានទីលំនៅនៅរាជធានីភ្នំពេញ ប៉ុន្តែបានមកស្នាក់នៅខេត្តបន្ទាយមានជ័យ ដើម្បីដាំដុះដើមស្មៅជាឱសថបុរាណខាងលើនេះ ព្រោះលោកជាសមាជិកសមាគមគ្រូឱសថបុរាណកម្ពុជាម្នាក់ដែរ ។ លោក ជា ភន បាននិយាយថា ដើមស្មៅដែលគាត់យកមកលក់នេះមានឈ្មោះថា «រ៉ាប់ពីកា» ជាប្រភេទស្មៅយកពូជពីប្រទេសកូរ៉េ និងបានយកមកដាំនៅខេត្តបន្ទាយមានជ័យ ដោយខ្លួនឯង ។ គាត់ថា ថ្នាំនេះជាឱសថព្យាបាលរោគ១៤មុខបានយ៉ាងស័ក្តិសិទ្ធ ។ គាត់លក់ក្នុងតម្លៃ១គីឡូក្រាម៣ម៉ឺនរៀល នៅព្រឹកថ្ងៃទី១ កញ្ញា លក់ដាច់ជាង១០បាវ (១បាវមានទម្ងន់ជាង៣០ទៅ៤០គីឡូក្រាម) ហើយថ្ងៃទី២ កញ្ញា គាត់បានដាក់បន្ថែមមកលក់ជាង១០ការុងទៀត លក់ដាច់អស់ ។
ការលក់ដើមស្មៅដែលថា ជាថ្នាំព្យាបាលរោគនេះ មិនទាន់ត្រូវបានអាជ្ញាធរ ឬមន្ទីរពាក់ព័ន្ធណាចាប់អារម្មណ៍នៅឡើយទេ ។ ប៉ុន្តែក៏មានប្រជាពលរដ្ឋមួយចំនួនដែលធ្លាប់ចាញ់បោកគេកន្លងមកនិយាយថា ដូចជាមិនជឿ ដើមស្មៅសោះព្យាបាលជំងឺ១៤មុខ ហើយសុទ្ធតែជំងឺធ្ងន់ៗដែលគ្រូពេទ្យសម័យបច្ចេកវិទ្យាទំនើបពិបាកក្នុងការព្យាបាល ដូចជាជំងឺទាចទឹក ជំងឺមហារីកស្បូនជាដើម សង្ស័យថា បោកទេមើលទៅ ។ លោក ប្រាក់ វ៉ុន ប្រធានមន្ទីរសុខាភិបាលខេត្ត មានប្រសាសន៍ថា លោកទើបតែដឹងព័ត៌មានពីការលក់ដើមស្មៅនេះនៅម៉ោង៨ព្រឹកថ្ងៃទី២ កញ្ញា និងបានឱ្យមន្ត្រីរបស់លោកចុះទៅពិនិត្យមើល និងរាយការណ៍មកវិញថា ពិតជាមានការលក់ដើមស្មៅថ្លៃ១គីឡូក្រាម៣ម៉ឺនរៀលមែន ។ លុះក្រោយពីការពិនិត្យឃើញថា មិនមានលក្ខណៈច្បាប់ត្រឹមត្រូវ ហើយទំនងដូចជាមិនស្រួល លោកក៏បានបញ្ជាឱ្យបិទផ្អាកការលក់ដូរដើមស្មៅនេះហើយ ។
សូមរំឭកថា ប្រជាពលរដ្ឋនៅស្រុកបរិបូណ៌ធ្លាប់ទទួលរងគ្រោះពីការចាញ់បោកការលក់ថ្នាំបុរាណនេះជាច្រើនលើកមកហើយ ។ លើកនេះមិនដឹងថា បោកមែនទៀត ឬក៏អត់ទេ ព្រោះអ្នកដែលបានទិញយកទៅប្រើប្រាស់មិនទាន់ដឹងពីលទ្ធផលនៅឡើយ ដោយសារទើបនឹងទិញប្រើបានមួយថ្ងៃ ។ ប៉ុន្តែបើពិតជាបោកមែនអ្នកលក់ថ្នាំនេះបានប្រាក់ក៏មិនតិចដែរទម្រាំតែមន្ទីរពាក់ព័ន្ធបិទការលក់ដូរ ។ តាមការប៉ាន់ប្រមាណពីផលលក់ស្មៅនេះរយៈពេល២ថ្ងៃបានប្រាក់មិនខ្វះពីមួយការុងទេ គឺយ៉ាងហោចក៏លើសពី២០លានរៀលដែរ ៕
ចែករំលែកព័តមាននេះ