ខេត្តកណ្តាល ៖ ភិក្ខុសង្ឃមួយអង្គដែលគេស្គាល់ច្បាស់ថា ជាចៅអធិការវត្តចំប៉ាចារិ៍ មានអាយុ៣៦ឆ្នាំ បានដោះស្បង់ចីវរលួចចូលច្រៀងខារ៉ាអូខេ នៅក្រុងតាខ្មៅ ក្នុងហាងឌីយ៉ាម៉ង់ ផាលេស ជាមួយមិត្តភក្តិបនភឿនបួននាក់ទៀត ។ ទោះបីជាបែបណា ខណៈកំពុងច្រៀងរាំយ៉ាងសប្បាយ និងផឹកស្រាបៀរស្រវឹងស្រឿងៗ អមដោយនារីក្មេងខ្ចីសាច់សម៉ដ្ឋខៃនែបនិត្យផងនោះ ពេលកំពុងប្រើដៃដូចដៃមឹកផង ក៏ត្រូវបាននគរបាលក្រុងតាខ្មៅ សហការជាមួយនគរបាលខេត្តចូលដល់ក្នុងបន្ទប់ ឃាត់ខ្លួនកាលពីម៉ោង៥និង១០នាទីរសៀល ថ្ងៃទី២ កញ្ញា ឆ្នាំ២០១៤ ។
តាមប្រភពព័ត៌មានបានឱ្យដឹងថា ចៅអធិការវត្តនេះឈ្មោះ សុង រតនៈ នៅវត្តចំប៉ាចារិ៍ ដែលមានទីតាំងនៅក្នុងភូមិអង្គពពេល ឃុំអង្គពពេល ស្រុកគងពិសី ខេត្តកំពង់ស្ពឺ ។ ចៅអធិការវត្តរូបនេះ បានចេញមកពីវត្តជាមួយមិត្តភក្ដិ៤នាក់ទៀត ពេលចេញមកនោះគ្រងស្បង់ចីវរ និងបានចេញពីរថ្ងៃមកហើយ ។ នៅរសៀលថ្ងៃទី២ កញ្ញា ឆ្នាំ២០១៤ បាននាំគ្នាជិះរថយន្តកាមរីបាឡែនពណ៌ទឹកប្រាក់ មកចូលច្រៀងខារ៉ាអូខេ ឌីយ៉ាម៉ង់ផាលេស នៅក្រុងតាខ្មៅ ដោយស្លៀកពាក់ស៊ីវិល ។ មន្ត្រីនគរបាលបានឱ្យដឹងថា ដោយមានការផ្ដល់ព័ត៌មានពីអ្នកភូមិអង្គពពេលមកនគរបាលក្រុងតាខ្មៅថា សង្ស័យចៅអធិការអង្គនោះមកក្រៅវត្តក្នុងអំឡុងចូលវស្សាទំនងមានស្រីញីក៏បានផ្ដល់ព័ត៌មានឱ្យនគរបាលខេត្តកណ្ដាល ហើយក៏មានការឃ្លាំមើលពីភិនភាគរថយន្តតាមសេចក្ដីរាយការណ៍ផង ក៏បានឃើញរថយន្តដូចគេរាយការណ៍មែននោះចូលទៅក្នុងខារ៉ាអូខេឌីយ៉ាម៉ង់ផាលេស ក៏បានសុំគោលការណ៍ពីថ្នាក់លើចូលទៅហៅសង្ឃក្លែងជាគ្រហស្ថនោះ និងក្រុមបនភឿន ខណៈពេលកំពុងច្រៀងរាំយ៉ាងសប្បាយកៀកកើយនៅក្នុងបន្ទប់មួយឈ្មោះភ្នំប្រុស ។
ពេលដែលសមត្ថកិច្ចចូលទៅនាំខ្លួននោះ សង្ឃជាចៅអធិការវត្តស្លៀកពាក់ខោអាវគ្រហស្ថតឺនុយយ៉ាងសង្ហា និងពាក់មួកកាតឹប ក្នុងសភាពស្រវឹងស្រឿងៗ ។ ចំណែកនៅក្នុងរថយន្តរបស់ចៅអធិការអង្គនេះមិនឃើញមានស្បង់ចីវរទេ មានតែឆត្រមួយនៅគូទរថយន្ត ។ នៅល្ងាចថ្ងៃទី២ កញ្ញា ឆ្នាំ២០១៤ នគរបាលក្រុងតាខ្មៅកំពុងសាកសួរចៅអធិការអង្គនេះ និងមិត្តភក្តិ៤នាក់ទៀត ។ មិនអាចរកព័ត៌មានជាក់លាក់ណាមួយជាងនេះបាននៅឡើយទេ ព្រោះនគរបាលកំពុងសួរចម្លើយនៅឡើយ ។ ការធ្វើអំពើប្រាសចាកធម៌វិន័យបែបនេះបាននាំទៅដល់ការវិនាសខ្លួនឯង ។ នេះជាទង្វើដែលគួរឱ្យខ្មាសអៀន ដោយសារបង្កឱ្យប៉ះពាល់ដល់វិន័យព្រះពុទ្ធសាសនាដែលជាសាសនារបស់រដ្ឋ ៕
ចែករំលែកព័តមាននេះ