រាជធានីភ្នំពេញ ៖ រឿងក្តីលោកផ្កាយ២ម្នាក់សម្លាប់ប្រពន្ធនិងកូនស្រីញាត់ដាក់ធុងទឹកកកយកសពទៅប្លុងចោលនៅជ្រោះពេជ្រនិល ដែលបានបែកធ្លាយកាលពីខែមុន ក្រោយពីការសម្លាប់ក្នុងអំទ្បុងពាក់កណ្តាលខែកុម្ភៈ ឆ្នាំ២០១៤ នោះ រហូតមកដល់ពេលនេះ មិនទាន់ត្រូវចាប់ខ្លួនបាននៅទ្បើយទេ គឺចាប់បាននិងឃុំខ្លួនត្រឹមតែបុរសជាកូនប្រសាម្នាក់ប៉ុណ្ណោះ ។
រីឯលោកឧត្តមសេនីយ៍ទោ គឹម ម៉ាវិន្ថា និងកូនប្រុសដែលជាជនសង្ស័យដៃដល់បានគេចខ្លួន ។ សូមបញ្ជាក់ថា ឧត្តមសេនីយ៍ទោ គឹម ម៉ាវិន្ថា ក៏ជាអគ្គនាយកក្រុមហ៊ុនជីអេសធី ដឹកជញ្ជូនអ្នកដំណើរផងដែរ ។ កាលពីថ្ងៃទី១ កញ្ញា ប្រភពព័ត៌មានពីមន្ត្រីនគរបាលនាយកដ្ឋានព្រហ្មទណ្ឌក្រសួងមហាផ្ទៃបានឱ្យដឹងថា លោកឧត្តមសេនីយ៍និងកូនប្រុស ដែលពេលនេះកំពុងលាក់ខ្លួននៅក្រៅប្រទេសនោះ ខាងសមត្ថកិច្ចបានបញ្ចូនដីកាចាប់ខ្លួនដល់ប៉ូលិសអាំងទែរប៉ូលរួចហើយ ។ មន្ត្រីប៉ូលិសរូបនោះនិយាយថា ជនជាប់ចោទព្រហ្មទណ្ឌមិនមែននយោបាយនោះ នឹងត្រូវចាប់ខ្លួនបញ្ជូនមកប្រទេសសាមីវិញដើម្បីទទួលទោស ។
ប្រភពព័ត៌មានបានឱ្យដឹងថា បន្ទាប់ពីចៅក្រមសាលាដំបូងរាជធានីភ្នំពេញ ឃុំខ្លួនឈ្មោះ ជា សំណាង ដែលត្រូវជាកូនប្រសាលោកឧត្តមសេនីយ៍ គឹម ម៉ាវិន្ថា ដាក់ពន្ធនាគារ ចៅក្រមស៊ើបសួរបានចេញដីកាបញ្ជាឱ្យនាំខ្លួនលោក គឹម ម៉ាវិន្ថា និងកូនប្រុសបង្កើតឈ្មោះ គឹម សែមរិទ្ធី ហៅ ស ធី ដែលពេលនេះកំពុងគេចខ្លួននៅក្រៅប្រទេស ។ ដីកាចាប់ខ្លួនឪពុកនិងកូនបានបញ្ជូនដល់នាយកដ្ឋាននគរបាលព្រហ្មទណ្ឌក្រសួួងមហាផ្ទៃ។ ថ្មីៗនេះ ដីកាចាប់ខ្លួននោះត្រូវបាននាយកដ្ឋាននគរបាលព្រហ្មទណ្ឌក្រសួងមហាផ្ទៃបញ្ជូនបន្តទៅនាយកដ្ឋានប៉ូលិសអាំងទែរប៉ូលហើយ ដើម្បីប៉ូលិសអាំងទែរបូ៉លសហការជាមួយប្រទេសដែលឪពុក និងកូនទាំង២នាក់កំពុងស្នាក់នៅដើម្បីចាប់ខ្លួន ។
បើតាមប្រភពព័ត៌មានថា មុនសមត្ថកិច្ចនាំខ្លួនឈ្មោះ ជា សំណាង កូនប្រសាទៅឆែកឆេរបន្ទប់ឪពុកក្មេករបស់គាត់ គឺលោក គឹម ម៉ាវិន្ថា កំពុងស្ថិតនៅប្រទេសថៃឯណោះ តែពេលរឿងនេះមានការល្បីសុសសាយ អាចដឹងដល់ សាមីខ្លួនក៏បានចាកចេញពីប្រទេសថៃបាត់ទៀតទៅ។ ទោះជាយ៉ាងណា សមត្ថកិច្ចបានដឹងទីកន្លែងលោក គឹម ម៉ាវិន្ថា ទៅជ្រកកោនអស់ហើយ ហើយពេលនេះកំពុងដុតដៃដុតជើងសហការជាមួយប្រទេសនោះ ដើម្បីសុំការនាំខ្លួនលោកផ្កាយ២យោធារូបនេះមកទទួលទោស នៅក្នុងប្រទេស។ បើតាមព័ត៌មានថា មិនយូរមិនឆាប់ឪពុកនិងកូនពិតជាត្រូវបានសមត្ថកិច្ចចាប់ខ្លួន ឱ្យមកទទួលទោសតាមកំហុសដែលគេបានប្រព្រឹត្តមិនខាន ។ ពិតជាគួរឱ្យហួសចិត្តណាស់ ដែលបុរសជាប្តីសម្លាប់ប្រពន្ធខ្លួនឯង ពិសេសកូនស្រីអាយុ៦ឆ្នាំ ក៏មិនលើកលែងដែរនោះ ។
ការចេញដីកាចាប់ខ្លួនបានកើតឡើងបន្ទាប់ពីលោកឧត្តមសេនីយ៍ត្រី ឡឹក វណ្ណៈ អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ បាននាំជនសង្ស័យដែលចាប់ខ្លួនឈ្មោះ ជា សំណាង ជាកូនប្រសារបស់ឧត្តមសេនីយ៍ទោ គឹម ម៉ាវិន្ថា បម្រើការងារនៅក្រសួងការពារជាតិ និងជាអគ្គនាយកក្រុមហ៊ុន ជី អេស ធី ដឹកអ្នកដំណើរដែល
មានទីតាំងនៅកាច់ជ្រុងអតីតរោងភាពយន្តសូរិយា ដើម្បីទៅឆែកឆេរបន្ទប់ឪពុកក្មេក ពិនិត្យទីកន្លែងដែលសង្ស័យជាឃាតករធ្វើសកម្មភាពក្នុងបន្ទប់នោះ ។ ការនាំខ្លួនជនសង្ស័យជាកូនប្រសាទៅពិនិត្យបន្ទប់ឪពុកក្មេកដែលជាប់ពាក់ព័ន្ធករណីឃាតកម្មនោះបានប្រព្រឹត្តទៅកាលពីវេលាម៉ោង២រសៀល ថ្ងៃទី១២ សីហា ក្រោមការចូលរួមពីលោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងសមត្ថកិច្ចមូលដ្ឋាន។
ការពិនិត្យកន្លែងធ្វើឃាតអ្នកស្រី វ៉ា ដារី និងកូនស្រី អាយុ៦ឆ្នាំ ឈ្មោះ គឹម ថាវិច្ចដា គឺជនសង្ស័យឈ្មោះ ជា សំណាង នៅតែបដិសេធថា ខ្លួនមិនបានប្រព្រឹត្តផ្ទាល់ដៃទេ ដូច្នេះខ្លួនមិនបានដឹងអ្វីទាំងអស់ ខ្លួនគ្រាន់តែដឹកសពយកទៅបោះចោលនៅជ្រោះពេជ្រនិលតែប៉ុណ្ណោះ ដែលពេលនោះមិនបានដឹងថា ក្នុងធុងទឹកកកមានសាកសពមនុស្សផង ។ សមត្ថកិច្ចបានពិនិត្យបន្ទប់លោកឧត្តមសេនីយ៍ទោ គឹម ម៉ាវិន្ថា រកឃើញថង់បា្លស្ទិកដែលនៅសល់ពីការវេចខ្ចប់សាកសពប្រពន្ធនិងកូន ដែលនោះជាវត្ថុតាងរឹងមាំមួយទៀត ហើយត្រូវសមត្ថកិច្ចកំណត់ពិតប្រាកដថា បន្ទប់នោះជាកន្លែងធ្វើឃាតប្រពន្ធ និងកូន ។ គួរបញ្ជាក់ថា ប្តីប្រពន្ធ២នាក់នេះ មិនបានរៀបការនឹងគ្នាត្រឹមត្រូវទេ និងបានស្រឡាញ់គ្នាច្រើនឆ្នាំហើយ តែបានចុះអេតាស៊ីវិល និងមានកូនស្រីមួយជាមួយគ្នា ។ ស្ត្រីរងគ្រោះ គឺជាទាសីស្នេហាម្នាក់ ក្នុងចំណោមទាសីស្នេហាជាច្រើននាក់ទៀតរបស់ឧត្តមសេនីយ៍រូបនោះ ។
ការសម្លាប់ត្រូវសង្ស័យថា ស្ត្រីជាភរិយាបានបែកចិត្តទៅស្រឡាញ់ប្រុសម្នាក់ផ្សេង ហើយការស្រឡាញ់គ្នាជាមួយប្រុសថ្មីនោះ ត្រូវបានលោកឧត្តមសេនីយ៍ទោ គឹម ម៉ាវិន្ថា ជាប្តីធ្លាប់ចាប់បានទូរស័ព្ទប្រពន្ធទាក់ទងគ្នាទៀតផង ហើយថែមទាំងណែនាំប្រពន្ធឱ្យឈប់ទាក់ទងជាមួយប្រុសនោះ ។ ផ្ទុយទៅវិញ ប្រពន្ធមិនបានឈប់ទេ គឺនៅតែបន្តទាក់ទងស្នេហា ហើយទីបំផុតសុំលែងលះប្តីទៅយកបុរសនោះតែម្តង ។ មុនការសម្លាប់ផងដែរ គឺនៅថ្ងៃទី១៤ កុម្ភៈ ប្តីប្រពន្ធនិងកូនស្រី បានធ្វើដំណើរទៅលេងផ្ទះឪពុកម្តាយនៅខេត្តកំពង់ចាម ដោយមានឈ្មោះ វ៉ា ភារ៉ា អាយុ២៤ឆ្នាំ ជាប្អូនប្រុសជនរងគ្រោះទៅជាមួយដែរ ។ ពេលទៅដល់កំពង់ចាម លោកឧត្តមសេនីយ៍ទោ គឹម ម៉ាវិន្ថា បានយកទូរស័ព្ទដៃបើកសំឡេង ចាក់រូបភាពឱ្យឪពុកម្តាយមើលពីរឿងប្រពន្ធមានស្នេហាជាមួយបុរសឈ្មោះ ហាក់ ម៉ៅ ដើម្បីជាភស្តុតាងឱ្យម្តាយឪពុកដឹងថា ប្រពន្ធមានប្រុសថ្មី ។ លុះដល់ម៉ោងប្រមាណ១១ព្រឹកថ្ងៃ ទី១៥ កុម្ភៈ ពួកគេបានវិលមកភ្នំពេញ ។ ដោយឡែកឈ្មោះ វ៉ា ភារា៉ មិនបានមកជាមួយទេ ។
ពេលមកដល់ភ្នំពេញ ប្រពន្ធប្រាប់ប្តីថា នាំកូនទៅផ្សារសុវណ្ណា រកទិញវ៉ែនតា បន្ទាប់មកទៀត ប្រពន្ធនិងកូនបានទៅផ្សារសូរិយារហូតយប់ទើបវិលចូលផ្ទះវិញ ។ ស្រាប់តែនៅវេលារសៀលម៉ោង៣និង៣០នាទីថ្ងៃទី២១ មីនា មានគេប្រទះឃើញសពស្រីដែលឃាតករសម្លាប់ច្រកថង់ប្លាស្ទិកដាក់ក្នុងធុងទឹកកកធុនធំយកទៅទម្លាក់ចោលនៅជ្រោះពេជ្រនិលចម្ងាយប្រមាណ៦០ម៉ែត្រពីអាស្រមលោកយាយម៉ៅ ។ សមត្ថកិច្ចបានពិនិត្យសព ពេលនោះរកឃើញកាបូបដៃមួយមានអត្តសញ្ញាណជនរងគ្រោះ ក៏បានផ្តល់ដំណឹងដល់សាច់ញាតិ ហើយអ្វីដែលកាន់តែធ្វើឱ្យសមត្ថកិច្ចចាប់អារម្មណ៍នោះត្រង់ថា នៅក្នុងខោទ្រនាប់ជនរងគ្រោះមានផ្ការំយោលស្រស់២-៣សន្លឹក ដែលផ្កានោះ មានតែនៅក្នុងបន្ទប់លោកឧត្តមសេនីយ៍ គឹម មា៉វិន្ថា ដែលអាចឱ្យសន្និដ្ឋានបានថា ជនរងគ្រោះមុនស្លាប់ស្រវេស្រវាទាញបោចផ្កានោះញ៉ុកចូលក្នុងខោទ្រនាប់ទុកជាភស្តុតាងដល់ការសើុបអង្កេត ។
តាំងពីថ្ងៃកើតហេតុ លោកឧត្តមសេនីយ៍ គឹម មា៉វិន្ថា ត្រូវបានអ្នកធ្វើការជាមួយនិយាយថា គាត់បាននាំស្រីក្មេងម្នាក់ចេញទៅក្រេបទឹកឃ្មុំនៅក្រៅប្រទេសបាត់ហើយ ។
ការពិនិត្យក្នុងបន្ទប់ដេកលោក គឹម មា៉វិន្ថា ដែលនៅជាន់ទី១ នៃអគារក្រុមហ៊ុនជីអេសធី រហូតដល់ម៉ោង៤និង៣០នាទី ល្ងាចទើបចប់ ។ ចំណែកជនសង្ស័យជាកូនប្រសា ត្រូវនាំទៅកាន់នាយកដ្ឋានព្រហ្មទណ្ឌក្រសួងមហាផ្ទៃវិញ ហើយ បន្ទប់នោះក៏ត្រូវបិទប្លុំបេដោយសមត្ថកិច្ចដែរ ៕
ចែករំលែកព័តមាននេះ