ខេត្តបន្ទាយមានជ័យ ៖ តាមប្រភពព័ត៌មានពីខេត្តស្រះកែវប្រទេសថៃបានឲ្យដឹងថាពលករខ្មែរចំនួន៣៣នាក់កំពុងប្រឈមនិងផ្លូវតុលាការនៅខេត្តស្រះកែវបន្ទាប់ពីពួកគេត្រូវសមត្ថកិច្ចថៃចាប់បានពេលកំពុងកាប់ឈើគ្រញូងកាលពីចុងសប្ដាហ៍កន្លងទៅ។
ជុំវិញប្រភពព័ត៏មានខាងលើនេះលោកនេតសារី អគ្គះកុងស៊ុលខ្មែរប្រចាំខេត្តស្រះកែវប្រទេសថៃបានប្រាប់តាមទូរស័ព្ទនៅរសៀលថ្ងៃទី២ កញ្ញានេះថាករណីខាងលើគឺពិតជាមានមែនដោយលោកប្រាប់ថាពលករទាំង៣៣នាក់នេះមកពីខេត្តបាត់ដំបងហើយពួកគេត្រូវសមត្ថកិច្ចថៃចាប់ឃាត់ខ្លួនក្នុងពេលដែលកំពុងកាប់ឈើគ្រញូងក្នុងស្រុកមួយនៃខេត្តស្រះកែវ។
លោកបន្តថាជុំវិញការចាប់ខ្លួនពលករទាំងនេះសមត្ថកិច្ចថៃរឹបអូសបានទាំងឈើគ្រញូងមួយចំនួននិងឧបករណ៍កាប់អារឈើគ្រញូងទៀតពីក្រុមពលករទាំងនេះទៀតផង។ លោកអគ្គះកុងស៊ុលបន្តថាពលករទាំងនេះកំពុងប្រឈមមុខនិងផ្លូវតុលាការនៅក្នុងខេត្តកើតហេតុ។ ទោះជាយ៉ាងណាលោកបញ្ជាក់ថាពេលនេះខាងលោកកំពុងជួយអន្តរាគម៍និងរកមេធាវីដើម្បីការពារក្ដីឲ្យពួកគេ ។ ក្រុមពលករកាប់ឈើគ្រញូងដែលភាគីថៃចាប់ទាំងនេះពេលដែលភាគីថៃបញ្ជូនត្រឡប់គួរតែសមត្ថកិច្ចនិងជំនាញពាក់ព័ន្ធសួរនាំដើម្បីឲ្យដឹងថាពួកគេទៅតាមច្រករបៀងណានិងនណាជាអ្នកនៅពីក្រោយខ្នងនៃសកម្មភាពនេះ ។
ចែករំលែកព័តមាននេះ