ខេត្តព្រៃវែង ៖ ប្រធានសាលាដំបូងខេត្តព្រៃវែង លោក សុខ កល្យាណ បានមានប្រសាសន៍ថា បុរសពីរនាក់បងប្អូនដែលរងការចោទពីប្រើអំពើហិង្សាវាយដំ និងធ្វើទារុណកម្មក្មេងប្រុសម្នាក់ចាប់ក្បាលជ្រមុជចូលទឹកពាង ដោយសារក្មេងប្រុសលួចបេះផ្លែដូងនោះ កំពុងតែឃុំខ្លួនបណ្តោះអាសន្ននៅក្នុងពន្ឋនាគារ រង់ចំាបើកសវនាការនៅពេលខាងមុខ ។
ការលើកឡើងរបស់លោកប្រធានសាលាដំបូងខេត្តព្រៃវែងនារសៀលថ្ងៃទី០២ កញ្ញា ២០១៤នេះ បានធ្វើឡើងភ្លាមៗ បន្ទាប់ពីមានប្រព័ន្ឋផ្សព្វផ្សាយ ជាពិសេសបណ្តាញទំនាក់ទំនងសង្គម (Facebook) បានផ្សាយថាបុរសពីរនាក់បងប្អូននោះ បានត្រូវដោះលែងហើយ បន្ទាប់ពីម្តាយជនជាប់ចោទបានសុំឲ្យនៅក្រៅឃុំបណ្តោះអាសន្ន ។
បើតាមលោក សុខ កល្យាណ ជនជាប់ចោទទំាងពីរកំពុងស្ថិតនៅក្នុងដំណាក់ការស៊ើបអង្កេត មុននឹងបើកសវនាការ ប៉ុន្តែលោកមិនបានបញ្ជាក់ថា សវនាការក្នុងសំណុំរឿងឧក្រិដ្ឋនេះ នឹងធ្វើនៅពេលណានោះទេ គ្រាន់តែសង្កត់ធ្ងន់ថា ” ដំណាក់ការស៊ើបអង្កេត ដូចជាមិនលំបាក ព្រោះជនជាប់ចោទក៍បានទទួលស្គាល់កំហុស ហើយមានអ្នកភូមិប្រមាណ១០នាក់ ដែលបានឃើញសកម្មភាពនៃការធ្វើទារុណកម្មលើក្មេងនោះ ” ។
គួររំលឹកថា ក្មេងប្រុសម្នាក់ឈ្មោះ ម៉ុន វាសនា ហៅ ទិត អាយុ១៤ឆ្នាំ ជាកូនប្រុសអ្នកក្រីក្រ ត្រូវបានបុរស២នាក់ចាប់ចងដៃទៅក្រោយ ហើយវាយដំនិងចាប់ជ្រមុជផ្កាប់មុខទៅក្នុងទឹកពាងយ៉ាងសាហាវឃោរឃៅបំផុត ដោយសារតែក្មេងប្រុសរូបនេះ ចូលទៅលួចបេះផ្លែដូងរបស់ពួកគេបាន៣-៤ផ្លែ ។
ហេតុការណ៍ដ៏អមនុស្សធម៌នេះ បានកើតទ្បើងកាលពីវេលាម៉ោង៣រសៀល ថ្ងៃទី២៨ សីហា នៅចំណុចចម្ការព្រែកថ្មី ស្ថិតក្នុងភូមិកំពង់ពពិល ឃុំកំពង់ពពិល ស្រុកពារាំង ។
ចំណែកជនដែលបានធ្វើទារុណកម្មទៅលើក្មេងប្រុសខាងលើ ក៏ត្រូវបានសមត្ថកិច្ចឃាត់ខ្លួនទាំង២នាក់ ដែលជាបងប្អូនបង្កើតនឹងគ្នា គឺឈ្មោះ ហេង ដាណេ អាយុ៣៥ឆ្នាំ និងឈ្មោះ ហេង វណ្ណី អាយុ២៨ឆ្នាំ ពួកគេមានទីលំនៅក្នុងភូមិកើតហេតុ ។ លោកអធិការនគរបាលស្រុកពារាំង បានឱ្យដឹងថា នៅចំពោះមុខសមត្ថកិច្ចក្មេងប្រុសឈ្មោះ ម៉ុន វាសនា និយាយថា រូបគេពិតជាបានចូលទៅលួចបេះផ្លែដូង នៅក្នុងដីភូមិរបស់បុរសទាំង២នាក់ខាងលើមែន ហើយបេះទម្លាក់មកដីបាន៣ទៅ៤ផ្លែប៉ុណ្ណោះ ស្រាប់តែម្ចាស់គេមកទាន់ក៏ហៅឱ្យចុះមកដី ។ បន្ទាប់មកម្ចាស់គេក៏ចាប់វាយដំនិងចាប់ចងដៃទៅក្រោយ រួចបណ្តើរទៅជ្រមុជក្បាលចូលក្នុងទឹកពាងជាច្រើនដង ធ្វើឱ្យរូបគេឈ្លក់ស្ទើរតែដាច់ខ្យល់ស្លាប់ម្តងៗទៅហើយ ។
ប្រភពដដែលនេះបានបញ្ជាក់ថា មូលហេតុធ្វើឱ្យបែកធ្លាយរឿងធ្វើទារុណកម្មយ៉ាងសាហាវព្រៃផ្សៃទៅលើក្មេងប្រុស ម៉ុន វាសនា នេះ គឺដោយសារតែក្រុមជននេះ បានថតរូបភាពពេលពួកគេធ្វើទារុណកម្មលើក្មេងប្រុស ហើយបង្ហោះរូបភាពនោះទៅក្នុងបណ្តាញផ្សព្វផ្សាយព័ត៌មានសង្គមហ្វេសប៊ុក និងមានការចែកចាយបន្តគ្នាពីម្នាក់ទៅម្នាក់ រហូតបែកធ្លាយរឿងនេះដឹងដល់សមត្ថកិច្ច ចុះស្រាវជ្រាវកំណត់មុខសញ្ញា និងឃាត់ខ្លួនបានកាលពីវេលាម៉ោង៩ព្រឹក ថ្ងៃទី២៩ សីហា២០១៤។
ក្មេងប្រុសម្នាក់នេះ ជាកូនទី២ ក្នុងចំណោមបងប្អូន៧នាក់ ។ ឪពុកឈ្មោះ ទុយ ម៉ុន អាយុ៤៣ឆ្នាំ ម្តាយឈ្មោះ ឈន សុខ អាយុ៣៥ឆ្នាំ ជាកសិករក្រីក្រ រស់នៅក្នុងភូមិកំពង់ពពិល ឃុំកំពង់ពពិល ស្រុកពារាំង ៕
ចែករំលែកព័តមាននេះ