រាជធានីភ្នំពេញ ៖ អំណាចចិត្តឫស្យាចង់បានប្តីគេ យកមកធ្វើជាប្តីរបស់ខ្លួន ស្រីស្អាតវ័យក្មេងឌី សូនីតា បានចាក់សម្លាប់ស្ត្រីម្នាក់ ។ តើឌី សូនីតា ជានរណា? នាងជាតារាចម្រៀង និងតារាសម្តែងទើបតែចាប់ផ្តើមល្បីឈ្មោះ ។
កញ្ញាឌី សូនីតា បានចូលក្នុងពិភពសិល្បៈនៅឆ្នាំ២០០៨ តាមរយៈការប្រឡងចម្រៀងក្នុងកម្មវិធី «ពានតារា២០០៨» តែមិនបានជាប់ចំណាត់ថ្នាក់ទេ ។ សូនីតាត្រូវមហាជនស្គាល់តាមរយៈស្នាដៃរឿងភាគរបស់ទូរទស្សន៍មា៉យធីវី ក្រោមចំណងជើងថា «ជីវិតនាងរក្សា» ។ ក្រៅពីនេះនាងសម្តែងក្នុងរឿង «គំនុំស្នេហ៍ចាស់» ។
កញ្ញាឌី សូនីតា ជាអតីតសិស្សវិទ្យាល័យឥន្ទ្រទេវី ក្នុងរាជធានីភ្នំពេញ ដោយបញ្ចប់ការសិក្សានៅឆ្នាំ២០១០ ។ អ្នកដឹកនាំរឿងកោតសរសើរសូនីតា ពីទេពកោសល្យសម្តែងដ៏ល្អរបស់នាង ហើយរំពឹងថា នាងនឹងក្លាយជាតារាល្បីនាពេលអនាគត ។ ខណៈអាជីពកំពុងតែរីកចម្រើន ស្រាប់តែតារាស្រីវ័យក្មេងឌី សូនីតា ក្លាយជាអ្នកដណ្តើមប្តីគេ រហូតយកកាំបិតចាក់សម្លាប់ស្ត្រីជាប្រពន្ធដើមចោលទៀត ។
តើរឿងរ៉ាវនេះយ៉ាងណា? វាគ្រាន់តែជាការសម្តែងរបស់សូនីតានៅក្នុងខ្សែភាពយន្តរឿង «ហេតុអ្វី?» ប៉ុណ្ណោះ ។ ខ្សែភាពយន្តរឿង «ហេតុអ្វី?» ដែលផលិតកម្មរ៉ុកបានលើកយកមកផលិតគឺយកលំនាំតាមរឿងពិតមួយ ។ ខ្សែភាពយន្តនេះនឹងចាក់បញ្ចាំងនៅថ្ងៃទី៥ ខែកញ្ញា ២០១៤ នៅគ្រប់រោងភាពយន្តទាំងអស់ក្នុងរាជធានីភ្នំពេញ ។ សាច់រឿងភាពយន្តនេះនិយាយពីនារីម្នាក់លួចទាក់ទងបុរសដែលមានប្រពន្ធ និងមានកូនរួចទៅហើយ ។ ដោយសារតែអំណាចនៃស្នេហាឫស្យា បុរសនិងស្ត្រីជាប្រពន្ធចុងរួមគំនិតគ្នាសម្លាប់ប្រពន្ធដើមចោល ។ បុរសជាប្តីបើកដៃ និងរៀបគម្រោងឱ្យប្រពន្ធចុងយកកាំបិតចាក់សម្លាប់ប្រពន្ធដើមដល់ក្នុងផ្ទះ ។ ហេតុការណ៍ពិតនោះបង្កភាពរំជើបរំជួលពេញផ្ទៃប្រទេស ជាពិសេសអ្នកនៅជិតកន្លែងកើតហេតុម្តុំផ្សារច្បារអំពៅនៅពេលសារព័ត៌មានជាច្រើនចុះផ្សាយ ។
ក្នុងចំណោមតួអង្គជាច្រើនដែលចូលរួមសម្តែងក្នុងខ្សែរឿង «ហេតុអ្វី?» កញ្ញាឌី សូនីតា ត្រូវគេចាប់អារម្មណ៍ខ្លាំងជាងគេ ព្រោះនាងបានសម្តែងជាតួឃាតករចាក់សម្លាប់ប្រពន្ធដើមដោយមិនញញើតដៃ ។
នាងឌី សូនីតា និយាយថា តួអង្គនាងជាប្រពន្ធចុងមានចរិតសុភាព រាបសា អត់សូវមាត់កជាមួយនរណាទេ មានបញ្ហាអ្វីខំអត់ធ្មត់ជានិច្ច។ ទោះជាយ៉ាងណាក្តី ដោយចិត្តចង់បានប្តីគេមកធ្វើជាប្តីរបស់ខ្លួនផ្តាច់មុខ នាងបានយកកាំបិតមុតស្រួចចាក់សម្លាប់ស្ត្រីជាប្រពន្ធដើម ។
សូនីតា និយាយថា «នាងខ្ញុំសូមសរសើរដល់ឃាតករពិតប្រាកដដែលក្លាហានហ៊ានកាន់កាំបិតចាក់សម្លាប់មនុស្ស ។ នាងខ្ញុំគ្រាន់តែសម្តែងក៏ញញើតណាស់ដែរ ។ ក្នុងពេលនាងខ្ញុំមើលសាច់រឿងដល់ត្រង់ឈុតចាក់សម្លាប់នោះ នាងខ្ញុំតក់ស្លុតណាស់ ហើយគិតថាមិនអាចធ្វើបានទេ តែជម្នះចិត្តធ្វើឱ្យបាន ព្រោះជាសាច់រឿង» ។ ឈុតប្រពន្ធចុងយកកាំបិតចាក់សម្លាប់ប្រពន្ធដើមនោះថតខុសពេញមួយថ្ងៃ ទម្រាំតែយកជាការបាន ៕
ចែករំលែកព័តមាននេះ