ប៉ូលិសក្រុងហុងកុងប្រកាសកាលពីថ្ងៃទី២ កញ្ញា ពីការចាប់ខ្លួនមនុស្ស១៩នាក់ពេលផ្ទុះឧប្បត្តិហេតុរវាងកងកម្លាំងប៉ូលិស និងពួកសកម្មជនស្និទ្ធលទ្ធិប្រជាធិបតេយ្យដែលតវ៉ាប្រឆាំងនឹងការសម្រេចរបស់ក្រុងប៉េកាំង អនុវត្តការត្រួតពិនិត្យតឹងតែងមួយលើការបោះឆ្នោតនាពេលខាងមុខនេះជ្រើសតាំងប្រមុខប្រតិបត្តិនៃតំបន់រដ្ឋបាលពិសេសនោះក្នុងឆ្នាំ២០១៧ ខាងមុខ ។
សកម្មជនទាំង១៩នាក់ដែលមានអាយុពី២០ទៅ៤៥ឆ្នាំត្រូវចាប់ខ្លួនកាលពីថ្ងៃទី១ កញ្ញា ពីបទធ្វើបាតុកម្មដោយខុសច្បាប់ ហើយប្រើហិង្សាលើកងកម្លាំងប៉ូលិស ។ អ្នកនាំពាក្យប៉ូលិសក្រុងហុងកុងនិយាយថា មនុស្ស៣នាក់ទៀតនឹងតាមចាប់ខ្លួននៅផ្ទះរបស់ពួកគេ។
ក្នុងឱកាសនៃការផ្ទុះឧប្បត្តិហេតុនោះពុំមានសេចក្តីរាយការណ៍ពីអ្នករបួសណាមួយឡើយ។
ប៉ូលិសក្រុងហុងកុងបានប្រើស្រៃ្ប មានជាតិម្រេចដើម្បីបំបែកពួកបាតុករដែលប្រមូលផ្តុំគ្នាតវ៉ានាឱកាសនៃការធ្វើដំណើរមកដល់ក្រុងហុងកុងរបស់អ្នកទទួលខុសត្រូវជាន់ខ្ពស់ចិនម្នាក់ លោកលីហ្វុី អគ្គលេខាធិការរងនៃគណៈកម្មាធិការអចិន្ត្រៃយ៍សភាប្រជាជនចិន ។ពលរដ្ឋក្រុងហុងកុងជាច្រើនពាន់នាក់ចាប់តាំងពីខែមិថុនាមក បានធ្វើយុទ្ធនាការដើម្បីឱ្យទទួលបានការបោះឆ្នោតដោយសេរីពេញលេញមួយពេលបោះឆ្នោតក្នុងឆ្នាំ២០១៧ ៕
ចែករំលែកព័តមាននេះ