រាជធានីភ្នំពេញ ៖ ចាត់ទុកជាលើកទី១ ដែលស្ថានីយទូរទស្សន៍អាស៊ីអាគ្នេយ៍(SEATV) សម្រេចបើកការប្រដាល់ ដែលមានឈ្មោះថា «Ganzberg Top Fighter» នៅរៀងរាល់ព្រឹកថ្ងៃអាទិត្យ ដែលជាពេលវេលាមិនមានស្ថាប័នណាមួយរំលេចទ្បើងកន្លងមក ។ ជាមួយនឹងការរំលេចនេះ មន្ត្រីអ្នករៀបចំការប្រកួតហាក់មានជំនឿយ៉ាងខ្លាំងថា បានទទួលការគាំទ្រខ្ពស់ ទោះជាពេលនោះជាម៉ោងសម្រាកលំហែកាយរបស់មនុស្សភាគច្រើន ដែលទំនេរពីការងារក៏ដោយ ។
នៅក្នុងវេទិកាសន្និសីទកាសែត កាលពីព្រឹកថ្ងៃទី១ កញ្ញា មន្ត្រីសហព័ន្ធកីទ្បាប្រដាល់និងទូរទស្សន៍អាស៊ីអាគ្នេយ៍ បានសម្រេចបើកប្រដាល់មួយថ្មី បន្ថែមពីលើព្រឹត្តិការណ៍ចាស់ ដែលកំពុងទទួលបានការចាប់អារម្មណ៍ស្រាប់ ។ ការប្រដាល់នេះ នឹងធ្វើទ្បើងចាប់ពីព្រឹកថ្ងៃអាទិត្យ ទី៧ កញ្ញា តទៅ ដោយគ្រោងរៀបចំនៅរៀងរាល់សប្តាហ៍តែម្តង ដើម្បីបំពេញតាមការចង់បានរបស់អ្នកសេ្នហាវិស័យកីទ្បាប្រដាល់ នាពេលចុងក្រោយ ។ បើទោះជាពេលវេលានេះ ហាក់មិនសូវអំណោយផលសម្រាប់់អ្នកត្រូវការសម្រាកនៅថ្ងៃអាទិត្យ ប៉ុន្តែមន្ត្រីដែលជាអ្នករៀបចំព្រឹត្តិការណ៍នេះ នៅតែមានជំនឿចិត្តច្រើនថា ការរំលេចរបស់ខ្លួន នឹងមានការចាប់អារម្មណ៍ខ្លាំងក្លា ។
លោកហេង សុធា នាយកទីផ្សារ និងទំនាក់ទំនងសាធារណៈប្រចាំទូរទស្សន៍អាស៊ីអាគ្នេយ៍ បានបញ្ជាក់ពីហេតុផលនេះថា ការកំណត់យកព្រឹកថ្ងៃអាទិត្យ ជាព្រឹត្តិការណ៍កីទ្បាប្រដាល់របស់ខ្លួន គឺដោយសារតែពេលវេលានោះ មិនមានស្ថានីយទូរទស្សន៍ណាមួយ រៀបចំការប្រដាល់កន្លងមក ។ ការកំណត់យកនឹងដំណើរការចាប់ពីម៉ោង៨ព្រឹក រហូតដល់ម៉ោង១០និង៣០នាទីព្រឹក ដោយមានការផ្សាយចេញពីកញ្ចក់ទូរទស្សន៍អាស៊ីអាគ្នេយ៍ នៅរាល់ព្រឹកថ្ងៃអាទិត្យតែម្តង ។ លោកសង្ឃឹមថា ព្រឹត្តិការណ៍នេះ នឹងមានការគាំទ្រមិនចាញ់ការប្រដាល់ ដែលបានជោគជ័យនៅអំទ្បុងពេលរសៀលថ្ងៃសម្រាកនាពេលកន្លងមក របស់ស្ថានីយទូរទស្សន៍ទាំងទ្បាយនោះទេ ដោយសារតែទីតាំងរបស់ស្ថាប័នលោក ស្ថិតនៅចំទីប្រជុំជន ហើយមានអ្នកទស្សនាកកកុញស្រាប់ ។
ការប្រដាល់ថ្មីនេះ នឹងកំណត់ធ្វើទ្បើងចាប់ពីព្រឹកថ្ងៃអាទិត្យ ទី៧ កញ្ញា តទៅ ដែលតាមគម្រោងការប្រដាល់នៅថ្ងៃអាទិត្យ ទី១ និងទី៣ប្រចាំខែនីមួយៗ គឺជាការប្រកួតអន្តរជាតិ ដូចគ្នាការប្រកួតអន្តរជាតិជាប្រចាំខែកន្លងមក និងរាល់អាទិត្យទី២ និងទី៤ គឺជាការប្រកួតរវាងកីទ្បាករក្នុងស្រុកល្បីៗ ។ ឆ្លើយតបនឹងការចោទសួរថា តើការជ្រើសរើសពេលព្រឹកថ្ងៃសម្រាក នឹងមានការចាប់អារម្មណ៍ដូចពេលរសៀល ឬយ៉ាងណា លោក ហេង សុធា និយាយថា៖ «អាស៊ីអាគ្នេយ៍ មើលឃើញថា នោះជាពេលវេលាចន្លោះប្រហោងដែលមិនជាន់ម៉ោងប្រដាល់នៅប៉ុស្តិ៍ផ្សេង ហើយសំខាន់ឱ្យតែមានគូល្អ គឺពិតជាមានអ្នកមើលមិនខុសពីការប្រកួតនៅម៉ោងផ្សេងនោះទេ» ។ អ្វីដែលលោករំពឹងជាងគេ គឺដោយសារតែក្នុងមួយខែនឹងមានការប្រដាល់ជាមួយបរទេសពីរលើក និងសំអាងថា ស្ថានីយទូរទស្សន៍របស់ខ្លួន មានសង្វៀនអំណោយផលសម្រាប់ការទស្សនារបស់មហាជន» ។
លោក ឆឹង យ៉ាវយ៉េន អនុប្រធានសហព័ន្ធកីទ្បាប្រដាល់កម្ពុជា និងជាតំណាងក្រសួងអប់រំ យុវជន និងកីទ្បា និយាយថា ការប្រកួតពេលព្រឹកគឺជាបរិបទមួយថ្មី ដែលមើលឃើញពីភាពប្រសើរ បើធៀបនឹងពេលវេលាបើកប្រដាល់របស់ទូរទស្សន៍ទាំងទ្បាយដែលមានស្រាប់ ។ គាប់ជូនជាកម្មវិធីមានទាំងការប្រដាល់អន្តរជាតិ២សប្តាហ៍ក្នុងមួយខែ និងមានការផ្សាយបន្តផ្ទាល់នៅលើកញ្ចក់ទូរទស្សន៍ផង ទើបក្នុងនាមជាមន្ត្រីសហព័ន្ធកីទ្បាប្រដាល់ ក៏មានជំនឿចិត្តដូចគ្នាថា ពិតជាមានអ្នកចាប់អារម្មណ៍ខ្ពស់ខ្លាំងមិនខាន ។ លោកនិយាយថា៖ «ព្រឹកថ្ងៃអាទិត្យ ជាពេលសម្រាក ប៉ុន្តែសម្រាប់អ្នកគ្មានដំណើរដើរឆ្ងាយ ឬមិនចេញទៅណា គឺពិតជាទស្សនាសម្រាប់កម្មវិធីនេះ សំខាន់ឱ្យតែកម្មវិធីយើងល្អ គឺមិនខ្វះការគាំទ្រនោះទេ!» ។
សហព័ន្ធកីទ្បាប្រដាល់ សន្យាជ្រើសរើសកីទ្បាករខ្លាំងៗឱ្យទ្បើងប្រកួតនៅក្នុងព្រឹត្តិការណ៍នេះ មិនឱ្យអន់ជាងសង្វៀនរបស់ប៉ុស្តិ៍ផ្សេងនោះទេ ដើម្បីទាក់ទាញអ្នកទស្សនាការប្រដាល់ ឱ្យងាកមកទស្សនាការប្រដាល់នៅព្រឹកថ្ងៃអាទិត្យនេះវិញ ។ ការប្រកួតបើកឆាកនឹងមានវត្តមានកីទ្បាករកម្ពុជា៣រូប និងបរទេស៣រូប ស្វាគមន៍គ្នានៅព្រឹកថ្ងៃអាទិត្យ ទី៧ កញ្ញា នេះ ៕
ចែករំលែកព័តមាននេះ