រាជធានីភ្នំពេញ ៖ ក្រុមកីឡាករ និងអ្នកស្នេហាកីឡាបាល់ទាត់កម្ពុជាជាច្រើននាក់ បានសម្តែងនូវការសប្បាយរីករាយនៅពេលដែលបានទទួលដំណឹងថា សហព័ន្ធកីឡាបាល់ទាត់កម្ពុជាគ្រោងផ្លាស់ប្តូរស្មៅធម្មជាតិដែលកំពុងប្រើប្រាស់សព្វថ្ងៃនេះ ទៅជាស្មៅសិប្បនិម្មិតជំនួសវិញលើទីលានបាល់ទាត់នៃពហុកីឡដ្ឋានជាតិអូឡាំពិក នាអំឡុងខែតុលាខាងមុខនេះ ។
ការប្រើប្រាស់ស្មៅសិប្បនិម្មិតជំនួសស្មៅដែលមានជីវិតបច្ចុប្បន្ននេះ គឺធ្វើឡើងក្រោមគម្រោង Goal Project FIFA ដែលជាជំនួយទាំងស្រុងពីសហព័ន្ធកីឡាបាល់ទាត់អន្តរជាតិ (FIFA) តែម្តង ដែលត្រូវចំណាយទឹកប្រាក់ខ្ទង់៥០ម៉ឺនដុល្លារអាមេរិកឯណោះ ។ លោកគល់ សុផាណា អគ្គលេខាធិការនៃសហព័ន្ធកីឡាបាល់ទាត់កម្ពុជា (FFC) បានឱ្យដឹងថា គម្រោងក្នុងការធ្វើទីលានថ្មីដែលក្រាលស្មៅសិប្បនិម្មិតជំនួសនេះ ប្រធានសហព័ន្ធកីឡាបាល់ទាត់កម្ពុជា លោកសៅ សុខា បានចុះហត្ថលេខាលើកិច្ចសន្យានៃគម្រោងដ៏ធំនោះរួចរាល់ហើយ ដោយឯកភាពចាប់ដំណើរការនៅខែតុលាខាងមុខនេះ ។
លោកបានលើកឡើងទៀតថា មុននឹងកសាងទីលាននេះយើងបានគិតគូរពីផលប៉ះពាល់ជាច្រើននៃការប្រកួត ។ មួយវិញទៀត បុ៉ន្មានខែកន្លងមកនេះ គឺមានភ្លៀងធ្លាក់មិនទៀងទាត់ ដូច្នេះទើបយើងលើកពេលជួសជុលបែបនេះ តែសូមឱ្យបងប្អូនអ្នកស្នេហាវិស័យកីឡាទុកចិត្តចុះ គឺមិនមានការប្រែប្រួលនោះទេ ។ អគ្គលេខាធិការរងសហព័ន្ធកីឡាបាល់ទាត់កម្ពុជា លោកម៉ៃ តុលា ធ្លាប់បានបញ្ជាក់កន្លងមកថា បើតាមគម្រោងរបស់ FIFA ក្រោមការសហការគ្នារវាងសហព័ន្ធកីឡាបាល់ទាត់កម្ពុជា និងក្រសួងអប់រំ យុវជន និងកីឡា គម្រោងប្តូរស្មៅនេះបានព្រមព្រៀងគ្នាស្ទើរតែ១០០%ទៅហើយ ដែលត្រូវបិទសកម្មភាពប្រកួតកីឡាលើទីលានពហុកីឡដ្ឋានជាតិមួយរយៈដើម្បីជួសជុល និងប្តូរដាក់ស្មៅសិប្បនិម្មិត ព្រមទាំងចាក់ផ្លូវកៅស៊ូជុំវិញទីលានទៀតផង ។
លោកបន្តទៀតថា គម្រោងដ៏ធំនេះ គឺអាចប្រើពេលចន្លោះពី៤ខែទៅ៦ខែទើបបញ្ចប់ទាំងស្រុង មុននឹងចាប់ផ្តើមរដូវកាលថ្មីនៃការប្រកួតបាល់ទាត់ពានរង្វាន់ថ្នាក់ជាតិឆ្នាំ២០១៥ ក៏ដូចជាពានរង្វាន់បាល់ទាត់សម្តេចតេជោ ហ៊ុន សែន លើកទី៨ នោះ ។ បើតាមការលើកឡើងរបស់មន្ត្រីសហព័ន្ធកីឡាបាល់ទាត់កម្ពុជាថា គម្រោងប្រើប្រាស់ស្មៅសិប្បនិម្មិតជំនួសលើទីលានបាល់ទាត់ពហុកីឡដ្ឋានជាតិអូឡាំពិកនេះ អាចប្រើរយៈពេល៣ខែ ។ នេះបើតាមការកំណត់របស់សហព័ន្ធកីឡាបាល់ទាត់អន្តរជាតិ (FIFA) ។ អ្វីដែលគួរឱ្យកត់សម្គាល់នោះ មុននឹងបញ្ជាក់ជំហរចំពោះការកសាងទីលានថ្មីនោះ សហព័ន្ធធ្លាប់បានប្រាប់ទៅអ្នកគាំទ្រនាពេលកន្លងមកហើយថា នឹងមានការជួសជុលកែលម្អ តែរហូតដល់បច្ចុប្បន្ននៅតែរក្សារូបរាងដើមដដែល ។
មិនត្រឹមតែបុ៉ណ្ណោះ ពេលភ្លៀងម្តងៗលើទីលានប្រកួតមានទឹកដក់ ហើយបានក្លាយជាភក់បែកវល់តែម្តង ដែលមើលទៅហាក់ដូចជាការទាត់បាល់លេងកម្សាន្តរបស់ក្មេងៗតាមភូមិអុីចឹង ។ តាមការបញ្ជាក់ជំហរសាជាថ្មីរបស់សហព័ន្ធនេះ ធ្វើឱ្យមហាជនសប្បាយចិត្ត និងសង្ឃឹមថា អាចមានទីលានបាល់ទាត់ដ៏ស្អាតសម្រាប់ការប្រកួតទាំងថ្នាក់ជាតិ និងអន្តរជាតិ កុំឱ្យខ្មាសបរទេស ជាពិសេសប្រទេសជិតខាងតែម្តង ព្រោះពេលដែលមានសកម្មភាពប្រកួតញឹកញាប់ ស្មៅនេះឡើងសឹករេចរឹលអស់ហើយ ។ ដូច្នេះសូមរង់ចាំមើលថា តើក្នុងអំឡុងខែតុលាខាងមុខនេះ វាលស្មៅដែលជាទីលានបាល់ទាត់ជាប្រចាំនោះត្រូវបានជួសជុលកែលម្អឱ្យមានសភាពស្អាតប្លែកបុ៉នណា ?
ចែករំលែកព័តមាននេះ