រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាបៀរភ្នំពេញនៅលើសង្វៀន CTN នាថ្ងៃព្រហស្បតិ៍ ទី៤ កញ្ញា ស្អែកនេះ ឈានចូលដល់សប្តាហ៍ទី៩ហើយ ។ កីឡាករ វ៉ាន់ ចាន់វ៉េត មកពីក្លិបគជសារកីឡា ត្រូវជួបប្រកួតជាមួយកីឡាករ កន ចន្ថា មកពីសមាគមកីឡាប្រដាល់ក្រសួងការពារជាតិ ចំណែកកីឡាករ សុខ ចិន្តា មកពីក្លិបឃ្លាំងមឿងកីឡា ត្រូវជួបប្រកួតជាមួយកីឡាករ ឃីម ឌីម៉ា មកពីក្លិបរស្មីភូមិគាប ខេត្តបន្ទាយមានជ័យ ។
រវាង វ៉ាន់ ចាន់វ៉េត និងកន ចន្ថា ឆ្លងកាត់ការប្រកួតបានចំនួន៤លើក ក្នុងនោះឈ្នះ២លើក និងចាញ់២លើកដូចគ្នា ទើបលើកនេះទាំងសងខាងត្រូវការឈ្នះរៀងខ្លួនដើម្បីទទួលបានឱកាសឡើងទៅប្រកួតនៅវគ្គបន្ត ។ វ៉ាន់ ចាន់វ៉េត មួយរយៈនេះកម្លាំងរបស់គេមានការស្រុតចុះជាងមុនបន្តិច តែល្បិចប្រយុទ្ធនៅល្អគ្រាន់បើ ឯផ្លែកែង និងជង្គង់រាល់ពេលវាយចេញម្តងៗមិនសូវជាខុសទិសដៅប៉ុន្មានឡើយ ។ ទោះបីជាយ៉ាងណា គេក៏មានការកោតញញើត កន ចន្ថា ខ្លះៗដែរ ព្រោះកន ចន្ថា មិនអន់ខ្សោយប៉ុន្មានទេ ។
កន ចន្ថា មានចរិតឆេវឆាវបន្តិច និងចូលចិត្តប្រើកម្លាំងបាយច្រើនជាងការប្រើល្បិច ។ រីឯស្នៀតកែង និងជង្គង់ប្រើការមិនសូវជាបានល្អប៉ុន្មាននោះទេ ប៉ុន្តែស្នៀតម៉ាត់និងទាត់ពេលវាយចេញម្តងៗគឺលឿន មានប្រសិទ្ធភាពទៀតផង។ យ៉ាងណាក៏ដោយ សម្រាប់ទស្សនៈអ្នកដែលធ្លាប់តាមដានការប្រកួតភាគច្រើនគេមានជំនឿចិត្តលើ វ៉ាន់ ចាន់វ៉េត ច្រើនជាងថា នឹងឈ្នះការប្រកួតលើកនេះ ។ ចំណែកការជួបគ្នារវាង សុខ ចិន្តា និងឃីម ឌីមា៉ វិញនោះមិនពិបាកក្នុងការវាយតម្លៃនោះឡើយ ដោយសារកីឡាករទាំង២មានសមត្ថភាពខុសគ្នាឆ្ងាយពេក ។ ជាក់ស្តែងលទ្ធផល៤ប្រកួតកន្លងមក សុខ ចិន្តា ស្គាល់ឈ្នះតែម្តងគត់ ឯ ឃីម ឌីមា៉ មិនទាន់ស្គាល់ពាក្យថាចាញ់ម្តងណាឡើយ ។ សុខ ចិន្តា ប្រសិនជាចាញ់លើកនេះទៀត គឺលែងមានឱកាសឡើងទៅប្រកួតនៅវគ្គបន្តទៀតហើយ ។
ការមកជួប ឃីម ឌីមា៉ លើកនេះគេមានសង្ឃឹមឈ្នះតិចណាស់ ព្រោះបើធ្វើការប្រៀបធៀបទៅលើបច្ចេកទេស និងបទពិសោធន៍ប្រកួតនៅលើសង្វៀនរបស់គេមិនអាចប្រៀបផ្ទឹមជាមួយ ឃីម ឌីមា៉ បានទេ ៕
ចែករំលែកព័តមាននេះ