ខេត្តកំពង់ឆ្នាំង ៖ ស្ត្រីចំណាស់ម្នាក់ត្រូវបានខ្សែភ្លើងឆក់ស្លាប់នៅក្នុងបន្ទប់ទឹកគ្មានអ្នកណាដឹង ខណៈដែលស្ត្រីរូបនោះនៅផ្ទះម្នាក់ឯង ហើយបានតភ្លើងដោយខ្លួនឯងក្នុងបន្ទប់ទឹក ។ ហេតុការណ៍នេះបានកើតឡើងនៅវេលាម៉ោង៧និង៣០នាទីយប់ថ្ងៃទី០១ កញ្ញា ២០១៤ នៅក្នុងភូមិអណ្តូងស្នាយ ឃុំ អណ្តូងស្នាយ ស្រុករលាប្អៀរ ខេត្តកំពង់ឆ្នាំង គឺនៅពេលដែលកូនស្រីត្រឡប់ពីធ្វើការនៅរោចក្រវិញទើបដឹង។
លោក ម៉ូត យូ នាយប៉ុស្តិ៍រដ្ឋបាលអណ្តូងស្នាយ ឱ្យដឹងនៅព្រឹកថ្ងៃទី០២ កញ្ញា ស្ត្រីរងគ្រោះឈ្មោះ សួន សាម៉ន អាយុ៦០ឆ្នាំ ជាស្ត្រីមេម៉ាយ មានកូនស្ត្រីម្នាក់ធ្វើការនៅរោងចក្រស្បែកជើង ស្រុកកំពង់ត្រឡាច។ តាមការស្រាវជ្រាវរបស់សមត្ថកិច្ចឱ្យដឹងថា មុនពេលកើតហេតុស្ត្រីរងគ្រោះបានចូលក្នុងបន្ទប់ទឹក ដើម្បីតបំបែកអំពូលភ្លើងមួយទៀតនៅក្នុងបន្ទប់ទឹក នៅពេលតរួចហើយ គាត់បានយកបង់ស្អិតរុំមុខតំណមួយចំហៀង ពេលកំពុងរុំនោះក៏ត្រូវបានមុខតំណខ្សែភ្លើងម្ខាងទៀតឆក់ដួលស្លាប់ភ្លាមៗនៅ ក្នុងបន្ទប់ទឹកតែម្តង ដោយពុំមាននរណាដឹងឡើយ រហូតដល់កូនស្រីឈ្មោះ ភេ ស្រីណេត អាយុ២០ឆ្នាំ ជាកម្មករនៅរោងចក្រស្បែកជើងបានមកពីធ្វើការវិញ ដើររកម្តាយនៅក្នុងផ្ទះមិនឃើញ នាងក៏បានដើរទៅមើលក្នុងបន្ទប់ទឹកប្រទះឃើញម្តាយនាង ដួលដេកស្លាប់នៅក្នុងបន្ទប់ទឹកបាត់ទៅហើយ។
សមត្ថកិច្ចទៅពិនិត្យសពនៅកន្លែងកើតហេតុបានឃើញតំណខ្សែភ្លើងធ្លាក់នៅលើទ្រូងរបស់ស្ត្រីរងគ្រោះ ហើយបានរកឃើញស្នាមឆេះខ្លោចដោយសារខ្សែភ្លើងឆក់នៅលើមេដៃខាងស្តាំ ដែលសមត្ថកិច្ចសន្និដ្ឋានថា ស្ត្រីរងគ្រោះពិតជាត្រូវខ្សែភ្លើងឆក់ស្លាប់ពិតប្រាកដមែន។ សពស្ត្រីរងគ្រោះត្រូវបានសមត្ថកិច្ចមូលដ្ឋានប្រគល់ឱ្យកូនស្រី និងសាច់ញាតិក្នុងភូមិ ដើម្បីធ្វើបុណ្យទានតាមប្រពៃណី។
ករណីគ្រោះថ្នាក់នេះត្រូវបានសមត្ថកិច្ចសន្និដ្ឋានថាបណ្តាលមកពីស្ត្រីរងគ្រោះពុំមានបច្ចេកទេសតភ្លើង គឺចេះតែតភ្លើងទាំងប្រថុយប្រថានទើបបណ្តាលឱ្យមានគ្រោះថ្នាក់ដល់ជីវិតបែបនេះ៕
ចែករំលែកព័តមាននេះ