រាជធានីភ្នំពេញ ៖ ប្រធានសហព័ន្ឋសហជីពចលនាកម្មករ ( CUMW ) លោក ប៉ាវ ស៊ីណា បានប្រកាសថា លោកនឹងចូលទៅបំភ្លឺនៅសាលាដំបូងរាជធានីភ្នំពេញតាមដីកាបង្គាប់នៅថ្ងៃទី១២ កញ្ញា ខាងមុខ ។
ការប្រកាសពីជំហររបស់មេសហជីពកម្មកររូបនេះ បានធ្វើឡើងបន្ទាប់ពីចៅក្រមស៊ើបសួរ លោក ជា សុខហៀង កាលពីថ្ងៃទី២២ សីហា ២០១៤ បានចេញដីកាបង្គាប់ឲ្យលោក ប៉ាវ ស៊ីណា ចូលខ្លួនទៅតុលាការសួរសម្លើយពីដំណើររឿងហិង្សាដោយចេតនាស្ថានទម្ងន់ទោស ធ្វើឲ្យចូចខាតដោយចេតនាស្ថានទម្ងន់ទោស គំរាមកំហែងថានឹងធ្វើឲ្យខូចខាតដែលភ្ជាប់នូវបញ្ហាអ្វីមួយ និងប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ ដែលបានប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវេងស្រេង ស្ថិតនៅក្នុងភូមិត្រពំាងថ្លឹង សង្កាត់ចោមចៅ ខណ្ឌពោធិសែនជ័យ កាលពីថ្ងៃទី២៥ ធ្នូ ២០១៣ រហូតដល់ថ្ងៃទី០៣ មករា ២០១៤ ។
បើតាមដីកាដែលទើបធ្លាក់ដល់ដៃអ្នកកាសែតនៅថ្ងៃទី០២ កញ្ញា ២០១៤នេះបានព្រមានថា ករណីលោក ប៉ាវ ស៊ីណា មិនចូលខ្លួនតាមដីកានៅព្រឹកថ្ងៃទី១២ កញ្ញានោះទេ ចៅក្រមស៊ើបសួរនឹងចេញដីកាឲ្យនំាខ្លួន ។
ថ្លែងបា្រប់កោះសន្តិភាពនៅរសៀលថ្ងៃទី០២ កញ្ញា លោកប្រធានសហព័ន្ឋសហជីពចលនាកម្មករបានបញ្ជាក់បន្ថែមថា ” ខ្ញុំមិនព្រួយបារម្ភអ្វីនោះទេ គឺខ្ញុំនឹងទៅឆ្លើយបំភ្លឺតាមដីកាកោះ នូវអ្វីដែលបានកើតឡើងនៅក្នុងអំពើហិង្សាលើផ្លូវវេងស្រេងរវាងក្រុមកម្មករ និងកងកម្លំាងសមត្ថកិច្ច ” ។ ជាមួយគ្នានេះ លោក ប៉ាវ ស៊ីណា ក៍បានព្រមានថា នឹងដឹកនំាកម្មករធ្វើបាតុកម្មទ្រង់ទ្រាយធំនៅចុងឆ្នំា២០១៤ ដើម្បីទាមទារឲ្យមានការដំឡើងបា្រក់ខែគោលកម្មករដល់១៧៧ដុល្លារនោះថែមទៀត ។
ទាក់ទងទៅនឹងការព្រមានរបស់មេសហជីពរូបនេះដែរ នៅរសៀលថ្ងៃអង្គារដដែល កោះសន្តិភាពមិនអាចសុំការអត្ថាធិប្បាយបានភ្លាមៗនៅឡើយទេពីមន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ ៕
ចែករំលែកព័តមាននេះ