អ៊ុយក្រែនកាលពីថ្ងៃទី១ កញ្ញា បានបោះបង់ចោលព្រលានយន្តហោះយុទ្ធសាស្ត្រមួយនៅភាគខាងកើតប្រទេសឱ្យធ្លាក់ក្នុងដៃពួកបំបែកខ្លួននិយមស្និទ្ធរុស្ស៊ី ហើយចោទប្រកាន់រុស្ស៊ីថាបានធ្វើសង្គ្រាមដោយទ្រង់ទ្រាយធំមួយនៅអ៊ុយក្រែនដែលនឹងបណ្តាលឱ្យមនុ្សស្លា.ប់ជាច្រើនពាន់នាក់ ។
អ៊ុយក្រែនកាលពីថ្ងៃទី១ កញ្ញា បានបោះបង់ចោលព្រលានយន្តហោះយុទ្ធសាស្ត្រមួយនៅភាគខាងកើតប្រទេសឱ្យធ្លាក់ក្នុងដៃពួកបំបែកខ្លួននិយមស្និទ្ធរុស្ស៊ី ហើយចោទប្រកាន់រុស្ស៊ីថាបានធ្វើសង្គ្រាមដោយទ្រង់ទ្រាយធំមួយនៅអ៊ុយក្រែនដែលនឹងបណ្តាលឱ្យមនុ្សស្លាប់ជាច្រើនពាន់នាក់ ។
ការដកថយរបស់កងទាហានអ៊ុយក្រែនពីព្រលានយន្តហោះក្រុងលូហ្គានស្ក៍ ក្រោយរងការបាញ់កាំភ្លើងធំយ៉ាងខ្លាំងដែលក្រុងគៀវចោទថា ជាស្នាដៃរបស់កងទ័ពរុស្ស៊ីបន្ថែមលើការបាក់ទ័ពនៅកន្លែងមួយចំនួនទៀតរបស់កងទ័ពអ៊ុយក្រែន ។ បណ្តាអ្នកកាសែតរបស់ AFP នៅលើទីលានផ្ទាល់រៀបរាប់ថា កងទ័ពអ៊ុយក្រែនហាក់ដូចជារត់ចោលដោយពុំមានការប្រយុទ្ធតំបន់មួយយ៉ាងធំនាភាគអាគ្នេយ៍តំបន់បំបែកខ្លួននិយមលាតសន្ធឹងពីក្រុងដូណេតស្ក៍ ព្រំដែនរុស្ស៊ីខាងកើត ដល់កំពង់ផែយុទ្ធសាស្ត្រម៉ារីអ៊ូប៉ូល ជាប់សមុទ្រ Azov ។
ទន្ទឹមនឹងនេះក្រុមទាក់ទងដែលរួមមានតំណាងរបស់អ៊ុយក្រែន រុស្ស៊ី និងអង្គការសន្តិសុខ និងកិច្ចសហប្រតិបត្តិការនៅអឺរ៉ុប OSCE ព្រមទាំងតំណាងរបស់ពួកបំបែកខ្លួនផង បានជួបប្រជុំគ្នានៅទីក្រុងមីនស្ក៍បេឡារុស ដើម្បីស្វែករកច្រកចេញមួយនៃវិបត្តិបន្ទាប់ពីការលើកឡើងជាលើកដំបូងរបស់ប្រធានាធិបតីរុស្ស៊ី លោកវ្ល៉ាឌីមៀរ ពូទីន ពីលក្ខន្តិកៈរដ្ឋមួយសម្រាប់បណ្តាតំបន់ពួកឧទ្ទាមអ៊ុយក្រែន។
ក្រុងគៀវ និងពួកលោកខាងលិចចាប់តាំងពី១សប្តាហ៍មកហើយ បានចោទរុស្ស៊ីជាមួយរូបភាពផ្កាយរណបជាភស្តុតាងថា ដាក់ពង្រាយកងទ័ពនៅភាគខាងកើតអ៊ុយក្រែន ដែលអូតង់ថាមានប្រមាណជា១.០០០នាក់ ហើយក្រុងគៀវថា មាន១.៦០០នាក់ ដែលការចោទប្រកាន់ទាំងនេះត្រូវក្រុងមូស្គូបដិសេធយ៉ាងមុឺងម៉ាត់ ។
រដ្ឋមន្ត្រីការពារប្រទេសអ៊ុយក្រែនលោក Valeri Gueletei ថ្លែងកាលពីថ្ងៃទី១ កញ្ញា ថា សង្គ្រាមធំមួយបានមកដល់ហើយ ក្នុងប្រទេសរបស់យើង ជាសង្គ្រាមធំ ដែលអឺរ៉ុបពុំធ្លាប់ជួបក្រោយសង្គ្រាមលោកលើកទី២មក ។ ក្នុងសង្គ្រាមមួយបែបនេះ ការបាត់បង់ជីវិតមនុស្សពុំមែនរាប់រយនាក់ទេ តែច្រើនពាន់នាក់ ។ យោងតាមរដ្ឋមន្ត្រីរូបនោះថា អាទិភាពនាពេលនេះគឺធ្វើម៉េចរៀបចំកិច្ចការពារដើម្បីរារាំងរុស្ស៊ី កុំឱ្យរុលមកមុខចូលដែនដីឯទៀតៗរបស់អ៊ុយក្រែន ។
ចំណែកនាយករដ្ឋមន្ត្រីប៉ូឡូញ លោក Donald Tusk ដែលទើបជ្រើសតាំងជាប្រធានក្រុមប្រឹក្សាអឺរ៉ុបនោះ បានព្រមានពីគ្រោះថ្នាក់នៃសង្គ្រាមមួយ ពុំត្រឹមតែនៅភាគខាងកើតអ៊ុយក្រែនឡើយ ។ ជម្លោះនៅភាគខាងកើតអ៊ុយក្រែនមកទល់ពេលនេះបណ្តាលឱ្យមនុស្សស្លាប់ជិត២.៦០០នាក់ហើយ ចាប់ពីពាក់កណ្តាលខែមេសាមក រួចមនុស្សជាច្រើនរយពាន់នាក់រត់ភៀសខ្លួន ។ រយៈពេលប៉ុន្មានថ្ងៃចុងក្រោយនេះ ទាហានអ៊ុយក្រែនប្រមាណជា៧០០នាក់ ត្រូវពួកឧទ្ទាមស្និទ្ធរុស្ស៊ី ចាប់ជាឈ្លើយសឹកនៅតំបន់ដូណេតស្ក៍ ។ នៅជុំវិញក្រុងដូណេតស្ក៍ ដែលមុននេះត្រូវឡោមព័ទ្ធជាប់ កងទ័ពអ៊ុយក្រែនហាក់ដូចជាដកចេញអស់ពីទីតាំងទាំងឡាយ ដោយមានទាំងបោះបង់ចោលរថក្រោះ និងរថយន្តយោធាទាំងឡាយផង ។
លោក ពូទីន គំរាមថា បើចង់វាយអ៊ុយក្រែនតែ៣សប្តាហ៍ដល់ក្រុងគៀវ
យោងតាមកាសែតអុីតាលី La Repubblica ថា ប្រធានាធិបតីរុស្ស៊ីធ្លាប់បានប្រាប់ប្រធានគណៈកម្មាធិការអឺរ៉ុបថា ប្រសិនបើលោកចង់ធ្វើសង្គ្រាមជាមួយអ៊ុយក្រែន នោះកងទ័ពរបស់លោកតែ៣សប្តាហ៍អាចចូលដល់ទីក្រុងគៀវ ។ ប្រធានគណៈកម្មាធិការអឺរ៉ុប បន្ទាប់មកបានលើកពាក្យរបស់លោកពូទីននោះ ប្រាប់ដល់បណ្តាប្រមុខរដ្ឋ និងប្រមុខរដ្ឋាភិបាលសហភាពអឺរ៉ុបដែលរួមប្រជុំកំពូលវិសាមញ្ញនៅទីក្រុងព្រុចសែល ដើម្បីលើកឡើងពីគំនិតដាក់ទណ្ឌកម្មសេដ្ឋកិច្ចថ្មីៗប្រឆាំងរុស្ស៊ី ។
យោងតាមកាសែត La Repubblica ថា ក្នុងកិច្ចប្រជុំកំពូលនោះ តំណាងរបស់ប្រទេសហុងគ្រី ស្លូវ៉ាគី និងកោះស៊ីប ហាក់មានការរារែកចំពោះការដាក់ទណ្ឌកម្មថ្មីទាំងនោះ ព្រោះប្រទេសពួកគេ ពឹងផ្អែកខ្លាំងលើការផ្លាស់ប្តូរជាមួយរុស្ស៊ី ។ ចំណែកអធិការបតីអាល្លឺម៉ង់ លោកស្រីម័រកែល សម្តែងពីការប្រុងប្រយ័ត្នចំពោះលទ្ធភាពនៃការបង្កើនជម្លោះយោធា ដែលបន្ទាប់ពីអ៊ុយក្រែន គឺអាចរាលដាលប៉ះពាល់ទៅដល់អេស្តូនី និងឡេតូនីទៀត ។
មុនកិច្ចប្រជុំនៅទីក្រុងមីនស្ក៍ ពួកបំបែកខ្លួននិយមស្និទ្ធរុស្សុី និយាយកាលពីថ្ងៃទី១ កញ្ញាថា ត្រៀមបោះបង់ចោលទិសដៅទាមទារឯករាជ្យ ប្រសិនបើរដ្ឋាភិបាលអ៊ុយក្រែនព្រមផ្តល់លក្ខន្តិកៈពិសេសមួយសម្រាប់តំបន់របស់ពួកគេ ៕
ចែករំលែកព័តមាននេះ