រាជធានីភ្នំពេញ ៖ ស្ត្រីម្នាក់ឈ្មោះមាស រ៉ា អាយុ២២ឆ្នាំ ជាបុគ្គលិកបំរើការក្នុងហាងកាហ្វេ យីហោសេង ហុង មានស្រុកកំណើតនៅក្នុងឃុំត្រែងយឹង ស្រុកភ្នំស្រួច ខេត្តកំពង់ស្ពឺ ត្រូវបានរថយន្តមួយគ្រឿងម៉ាកហ៊ីយ៉ាន់ដាយធុនមួយតោនដឹកគ្រែ ពណ៌ខៀវ ពាក់ស្លាកលេខញ-២៣២៦ ភព២ បើកបុកពេលកំពុងដើរឆ្លងផ្លូវបណ្តាលឱ្យរង
របួសធ្ងន់។
ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ព្រឹក ថ្ងៃទី២ កញ្ញា ២០១៤ នៅចំណុចខាងមុខហាងកាហ្វេសេង ហុង ផ្លូវលេខ២៧១ សង្កាត់ផ្សារដើមថ្កូវ ខណ្ឌចំកាមន។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា មុនពេលកើតហេតុរថយន្តបង្កដែលបើកបរដោយឈ្មោះសុទ្ធ គឹមសួគ៌ អាយុ២៧ឆ្នាំ រស់នៅភូមិព្រៃក្តួច ឃុំភ្នំតូច ស្រុកឧត្តដុង្គ ខេត្តកំពង់ស្ពឺ បានធ្វើដំណើរក្នុងទិសដៅពីកើតទៅលិចដឹកគ្រែដើរលក់បានបើកទៅបុកស្ត្រីរងគ្រោះដែលកំពុងដើរបាំងឆ័ត្រឆ្លងផ្លូវនៅពេលមេឃកំពុងភ្លៀងបណ្តាលដួលរងរបួសធ្ងន់តែម្តង។
ប្រភពដដែលបានឱ្យដឹងទៀតថា ពេលដែលរថយន្តបានបុកជនរងគ្រោះហើយ បុរសជាអ្នកបើកបរបានចុះពីរថយន្តមកមើលជនរងគ្រោះក៏ស្រាប់តែមានក្រុមអ្នករត់ម៉ូតូ
ឧុប និងអ្នករត់ម៉ូតូរ៉ឺម៉កនៅកន្លែងកើតហេតុស្រែកថាចោរៗ ហើយបាននាំគ្នាព្រួតវាយទៅលើបុរសអ្នកបើកបររូបនោះឡើងទ្រមខ្លួន បែកចិញ្ចើមខាងស្តាំចេញឈាម និងបាត់ទូរស័ព្ទចំនួនពីរគ្រឿង ហើយថែមទាំងវាយរថយន្តឱ្យស្រាំកញ្ចក់ និងក្រពិតមុខ រួចគេចបាត់អស់។ ដោយឡែកបុរសជាព្រូរថយន្តម្នាក់ដោយមានការភ័យខ្លាចពេកបានរត់បាត់ពីកន្លែងកើតហេតុមិនដឹងថាទៅទីណា។
ក្រោយពេលកើតហេតុស្ត្រីរងគ្រោះត្រូវបានបញ្ជូនតាមម៉ូតូរ៉ឺម៉កទៅកាន់មន្ទីពេទ្យមិត្តភាពខ្មែរ សូវៀតដើម្បីព្យាបាល ៕
ចែករំលែកព័តមាននេះ