រាជធានីភ្នំពេញ ៖ ដើម្បីលើកកម្ពស់គុណភាពបរិស្ថានអនាម័យ និងចូលរួមចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ លោកគឹម វុត្ថា ប្រធានសណ្តាប់ធ្នាប់ខណ្ឌដូនពេញ បានដឹកនាំកម្លាំងបាញ់ទឹកលាងសម្អាតច្រាំងទន្លេនៅមុខព្រះបរមរាជវាំង កាលពីព្រឹកថ្ងៃទី០២ កញ្ញា ២០១៤ ។
លោកប្រធានសណ្តាប់ធ្នាប់ខណ្ឌដូនពេញបានឱ្យដឹងថា ដោយយោងតាមការដឹកនាំរបស់លោកអភិបាលខណ្ឌដូនពេញ ក៏ដូចជាការចូលរួមប្រឡងប្រណាំងទីក្រុងស្អាតនោះ កម្លាំងសណ្តាប់ធ្នាប់ខណ្ឌបានធ្វើការបាញ់ទឹកលាងសម្អាតច្រាំងទន្លេនៅមុខព្រះបរមរាជវាំង ព្រោះតែមានជនអគតិមួយចំនួនបានបន្ទោរបង់ពាសវាលពាសកាលតាមច្រាំង ហើយកន្លងមកសណ្តាប់ធ្នាប់ខណ្ឌដឹកនាំដោយលោកអភិបាលខណ្ឌដូនពេញ បើកយុទ្ធនាការលាងសម្អាតច្រាំងទន្លេចាប់ពីមុខផ្សាររាត្រី រហូតដល់របងសាលសន្និសីទចតុមុខ ។
ហើយកន្លងមកអាជ្ញាធរខណ្ឌដូនពេញ និងសង្កាត់ទាំង១១ បានធ្វើការផ្សព្វផ្សាយដល់ប្រជាពលរដ្ឋដែលដើរកម្សាន្តតាមរមណីយដ្ឋាន និងមុខព្រះបរមរាជវាំង ត្រូវតែចូលរួមរក្សាបរិស្ថាន និងអនាម័យពេលហូបចំណីអាហារមានកាកសំណល់បោះចោលក្នុងធុងសំរាម តាមការកំណត់របស់អាជ្ញាធរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ