ខេត្តព្រះសីហនុ ៖ ជនសង្ស័យចែកចាយ និងប្រើប្រាស់គ្រឿងញៀនចំនួន៤នាក់ ក្នុងនោះមានស្ត្រីម្នាក់ ត្រូវសមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុធ្វើការឃាត់ខ្លួន កាលពីវេលាម៉ោង០៤ និង១៥នាទីរសៀលថ្ងៃទី០១ កញ្ញា ២០១៤ ស្ថិតនៅក្បែរតំបន់សេដ្ឋកិច្ចពិសេសបិតត្រាំង ក្នុងភូមិពូធឿង ឃុំបិតត្រាំង ស្រុកព្រៃនប់ខេត្តព្រះសីហនុ ខណៈកំពុងប្រព្រឹត្ត ។
ប្រភពបានឱ្យដឹងថា ជនសង្ស័យទាំង៤នាក់ ១-ឈ្មោះអេលរ៉ អាយុ២៩ឆ្នាំ ជាទាហាន មានទីលំនៅក្នុងភូមិដូនឡយ ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ ២-ឈ្មោះស្រីស្រស់ ភេទស្រី អាយុ២២ឆ្នាំ ជានារីបម្រើការក្នុងខារ៉ាអូខេ មានទីលំនៅខេត្តកំពត ៣-ឈ្មោះមាន លិ អាយុ២៩ឆ្នាំ មុខរបរមិនពិតប្រាកដ មានទីលំនៅភូមិបឹងតាស្រី ឃុំបឹងតាព្រហ្ម ស្រុកព្រៃនប់ និង៤-ឈ្មោះលីវិដម អាយុ២២ ជាអ្នកនេសាទ មានទីលំនៅភូមិពូធឿង ឃុំបិត្រាំង ស្រុកព្រៃនប់ ។
សមត្ថកិច្ចដកហួតបានវត្ថុតាងមួយចំនួនមាន ថ្នាំញៀនប្រភេទមេតាំហ្វេតាមិន ICE ចំនួន០៤កញ្ចប់តូច និង១កញ្ចប់ធំ ស្មើ៥.៥ក្រាម, ទូរស័ព្ទចំនួន៤គ្រឿង បំពង់ជក់គ្រឿងញៀន១, ម៉ូតូចំនួន១គ្រឿង និងថង់សម្រាប់ច្រកគ្រឿងញៀនមួយចំនួនផងដែរ ។
តាមការឱ្យដឹងពីលោកតាក សារិទ្ធ នាយការិយាល័យប្រឆាំងការជួញដូគ្រឿងញៀនបានឱ្យដឹងថា ការចាប់ឃាត់ខ្លួនជនសង្ស័យទាំង៤នាក់នេះ ត្រូវធ្វើឡើង បន្ទាប់ពីកម្លាំងរបស់លោកធ្វើការស៊ើបអង្កេតអស់ជាច្រើនសប្តាហ៍កន្លងមកហើយ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ