រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចេញផ្សាយកាលពីថ្ងៃទី១ កញ្ញា ២០១៤ ដែលកោះសន្តិភាពទទួលបានបានឱ្យដឹងថា លោកបាន គីមូន អគ្គលេខាធិការអង្គការសហប្រជាជាតិបានតែងតាំងលោកស្រី ក្លូឌៀ ហ្វិន ជាចៅក្រមអន្តរជាតិថ្មីនៃអង្គជំនុំជម្រះសាលាដំបូងរបស់សាលាក្តីកាត់ទោសអតីតមេដឹកនាំខ្មែរក្រហម។
សាលាក្តីខ្មែរក្រហមបានបញ្ជាក់ថា បន្ទាប់ពីទទួលបានការតែងតាំងពីលោក បាន គីមូន និងទទួលបានការយល់ព្រមពីឧត្តមក្រុមប្រឹក្សានៃអង្គចៅក្រម ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា លោកស្រី ក្លូឌៀ ហ្វិន ជនជាតិអូទ្រីស ត្រូវបានតែងតាំងជាចៅក្រមអន្តរជាតិថ្មីនៃអង្គជំនុំជម្រះសាលាដំបូងរបស់សាលាក្តីកាត់ទោសអតីតមេដឹកនាំខ្មែរក្រហម។
សាលាក្តីខ្មែរក្រហមបានលើកឡើងថា ការតែងតាំងនេះមានសុពលភាពចាប់តាំងពីថ្ងៃទី១ កញ្ញា ២០១៤ តទៅ។
គួរបញ្ជាក់ថា លោកស្រីចៅក្រមក្លូឌៀ ហ្វិន បានបំរើការងារជាចៅក្រមអន្តរជាតិបម្រុងនៅអង្គជំនុំជម្រះសាលាដំបូងនៃសាលាក្តីចាប់តាំងពីឆ្នាំ២០០៦មកម្ល៉េះ។ លោកស្រីចៅក្រមក្លូឌៀ ហ្វិន ចូលកាន់តួនាទីនេះជំនួសលោកស្រីចៅក្រម ស៊ីវៀ ខាត់រាយត៍ (ជនជាតិនូវែលហ្សេឡង់) ដែលបានលាលែងពីតំណែង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ