ខេត្តប៉ៃលិន ៖ បន្ទាប់ពីទទួលបានព័ត៌មានថា មានកុមារជាច្រើននាក់ដែលកំពុងស្នាក់នៅក្នុងមណ្ឌលកុមារកំព្រាមួយកន្លែងឈ្មោះ «អង្គការសង្គ្រោះជនអស់សង្ឃឹម» មានការធ្វើទារុណកម្ម និងផ្តល់អាហារមិនគ្រប់គ្រាន់ ព្រមទាំងមានជំងឺមិនបានយកទៅព្យាបាលនៅមន្ទីរពេទ្យឱ្យបានត្រឹមត្រូវនោះ ទើបអាជ្ញាធរអង្គការសិទ្ធិមនុស្ស និងសមត្ថកិច្ចប៉ុស្តិ៍នគរបាលសង្កាត់បរយ៉ាខា ធ្វើការចុះស៊ើបអង្កេត និងត្រួតពិនិត្យភ្លាមៗតែម្តង ។
ហេតុការណ៍ចុះប្រតិបត្តិការនេះ ធ្វើឡើងកាលពីវេលាម៉ោង១១ និង២០នាទីព្រឹកថ្ងៃទី០១ កញ្ញា ២០១៤ ស្ថិតនៅចំណុចភូមិរោងចក្រ សង្កាត់បរយ៉ាខា ក្រុងប៉ៃលិន ។
ប្រភពបានឱ្យដឹងថា មានកុមារតូចៗជាច្រើននាក់ស្នាក់នៅក្នុងមណ្ឌលកុមារកំព្រាខាងលើ ត្រូវគេផ្តល់អាហារមិនគ្រប់គ្រាន់ ខ្វះជីវជាតិ និងមានអំពើទណ្ឌកម្មទៅលើពួកគេមួយចំនួនថែមទៀត ព្រមទាំងពួកគេមានជំងឺ ខាងមណ្ឌលមិនបានយកទៅព្យាបាលនៅមន្ទីរពេទ្យឱ្យបានត្រឹមត្រូវទេ ដោយគ្រាន់តែផ្សំថ្នាំនៅឱសថស្ថានធម្មតាៗយកទៅឱ្យលេបតែប៉ុណ្ណោះ ដោយមិនបានធ្វើការពិនិត្យសុខភាពឱ្យបានល្អ ទើបមានគេមកប្តឹងអាជ្ញាធរសង្កាត់បរយ៉ាខា, អាជ្ញាធរខេត្ត និងអង្គការសិទ្ធិមនុស្សតែម្តង ។
ប្រភពបន្តថា ខណៈអាជ្ញាធរទៅដល់បានសួរនាំកុមារមួយចំនួនដែលរស់នៅក្នុងមណ្ឌលនេះ មុនដំបូងពួកគេហ៊ាននិយាយថា មានការវាយដំខ្លះៗមកលើពួកគេដែរ ប៉ុន្តែពេលឃើញអ្នកគ្រប់គ្រងមណ្ឌលដើរទៅក្បែរ និងសម្លឹងមើលមុខ បណ្តាលឱ្យពួកគេនិយាយថា គ្មានការវាយធំធ្វើបាបអ្វីនោះទេ ។
ពាក់ព័ន្ធទៅនឹងបញ្ហានេះ ពេលចុះទៅស៊ើបអង្កេត និងសួរនាំ ទាំងអាជ្ញាធរសង្កាត់ និងអង្គការសិទ្ធិមនុស្សបានណែនាំដល់ម៉ែដោះ ឬអ្នកថែទាំក្មេង នៅក្នុងមណ្ឌលត្រូវយកចិត្តទុកដាក់ទៅលើក្មេងតូចៗ ដែលភាគច្រើនអត់មានម្តាយឱពុកនោះទេ គឺពួកគេពឹងផ្អែកទៅលើម៉ែៗនៅក្នុងមណ្ឌលទាំងស្រុងហើយ ដូច្នេះត្រូវតែថែរក្សាពួកគេដូចជាកូនបង្កើតរបស់ខ្លួន ត្រូវផ្តល់អាហារ នំចំណី ឱ្យបានគ្រប់គ្រាន់ដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ