រាជធានីភ្នំពេញ ៖ បុរសប្រមឹកស្រាម្នាក់ជាកម្មករសំណង់ត្រូវបានប៉ូលិសខណ្ឌសែនសុខចាប់វាយខ្នោះយកទៅឱ្យដេកក្នុងទ្រុង បន្ទាប់ពីបានវាយប្រពន្ធខ្លួនឯងបណ្ដាលឱ្យប៉ោងមុខមាត់ព្រោះតែប្រឡែងលេងជាមួយ ត្រូវប្រពន្ធវាសមួយដៃចំកណ្ដាលមុខក៏កើតកំហឹងវាយសងទៅលើប្រពន្ធយ៉ាងចាស់ដៃ ប៉ោងមុខពោរមើលលែងស្គាល់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៩និង១០នាទីយប់ថ្ងៃទី៣១ សីហា នៅចំណុចផ្ទះជួល ស្ថិតក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ ។
បុរសជាប្ដីសាហាវព្រៃផ្សៃនេះឈ្មោះឈី ឆេង អាយុ៤០ឆ្នាំ ជាកម្មករសំណង់ មានស្រុកកំណើតនៅឃុំពាមមន្ទា ស្រុកកំពង់ត្របែក ខេត្តព្រៃវែង បច្ចុប្បន្នស្នាក់នៅផ្ទះជួលនៅភូមិទឹកថ្លា សង្កាត់ទឹកថ្លា ខណ្ឌសែនសុខ ។ ប្រពន្ធឈ្មោះគឹម វណ្ណៈ អាយុ៣៣ឆ្នាំ ជាកម្មការិនីរោងចក្រ មានស្រុកកំណើតនៅភូមិជ្រៃធំ ឃុំជ្រៃ ស្រុកកំពង់ត្របែក ខេត្តព្រៃវែង ។ ក្រោយពេលចាប់ខ្លួន ប្ដីបានរៀបរាប់ប្រាប់សមត្ថកិច្ចនិងអ្នកយកព័ត៌មានថា គាត់បានទៅផឹកសីុជាមួយមិត្តភក្ដិ៤ទៅ៥នាក់នៅម្ដុំស្ថានីទូរទស្សន៍អាសីុអាគ្នេយ៍តាំងពីម៉ោង៥ល្ងាចរហូតដល់ម៉ោង៨និង៣០នាទីយប់ទើបចប់ ហើយរូបគាត់ក៏បានជិះម៉ូតូត្រឡប់មកផ្ទះវិញ ។ ពេលមកដល់ផ្ទះក៏ឃើញប្រពន្ធដេកលង់លក់នៅលើពូកទៅហើយ ។
ពេលនោះរូបគាត់ក៏បានចូលទៅដេកអោបនឹងប្រឡែងលេងជាមួយ តែត្រូវប្រពន្ធគាត់ខឹងហើយបាននិយាយថា ធុញណាស់ ស្អុយស្រាណាស់ ល្មមដេកពួនហើយ ។ គាត់រៀបរាប់ថា ឮប្រពន្ធនិយាយដូច្នោះរូបគាត់ក៏កាន់តែប្រឡែងថែមទៀត ទើបធ្វើឱ្យប្រពន្ធខឹង ក៏បានវាយគាត់មួយដៃចំកណ្ដាលមុខ ធ្វើឱ្យគាត់កើតជាកំហឹងក៏បានវាយបកវិញយ៉ាងចាស់ដៃទើបបណ្ដាលឱ្យបែកមុខមាត់បង្កឱ្យមានការភ្ញាក់ផ្អើលដល់អ្នកជិតខាងដែលជួលបន្ទប់ក្បែរនោះ ។ ពេលវាយរួចរូបគាត់ក៏បានចាក់គន្លឹទ្វារបន្ទប់រួចដេកអោបប្រពន្ធលង់លក់ទៅ ។ ចំណែកអ្នករស់នៅជិតខាងបានឱ្យដឹងថា មុនពេលកើតហេតុរូបគាត់បានឃើញបុរសជាប្តីនោះស្រវឹងស្រាជោកជាំ ហើយបានឡើងទៅលើផ្ទះស្រាប់តែឮសំឡេងឈ្លោះប្រកែកគ្នាខ្លាំងៗ ឃើញប្តីនោះវាយទាត់ធាក់ប្រពន្ធគ្មានប្រណីសោះ រួចក៏បានចាក់សោទ្វារបន្ទប់ស្ងាត់ឈឹងទៅ ។
ឃើញបែបនេះពួកគាត់ស្មានតែប្រពន្ធត្រូវប្តីកំណាចនោះវាយរហូតដល់ស្លាប់ទៅហើយ ដែលម្នាក់ៗភ័យណាស់ទើបពួកគាត់បានទូរស័ព្ទទៅប្តឹងប៉ូលិសប៉ុស្តិ៍ទឹកថ្លាឱ្យជួយអន្តរាគមន៍ ។ អ្នកជិតខាងរៀបរាប់ថា មិនទាន់បាន៥នាទីផង ប៉ូលិសប៉ុស្តិ៍ទឹកថ្លាបានទៅដល់ ហើយក៏បានឡើងទៅលើបន្ទប់កើតហេតុខាងលើ ឃើញស្ងាត់ឈឹងមែន ក៏បានធាក់ទម្លាយទ្វារបន្ទប់ ស្រាប់តែឃើញប្តីកំណាចនោះស្រវឹងស្រាជោកជាំ ហើយដេកអោបប្រពន្ធដែលត្រូវខ្លួនវាយប៉ោងមុខនោះធ្វើព្រងើយ ។ ប៉ូលិសបានចូលទៅទាញនឹងចាប់សែងប្តីប្រមឹកដាបរូបនោះចេញមកក្រៅ រួចវាយខ្នោះយកទៅដាក់ទ្រុងនៅប៉ុស្តិ៍នគរបាលដោយប្រពន្ធបានប្តឹង ឱ្យប៉ូលិសចាប់យកប្តីទៅអប់រំនៅប៉ុស្តិ៍ប៉ូលិសផង ពីព្រោះគាត់ទ្រាំនឹងទង្វើបែបនេះលែងបានទៀតហើយ ។
ស្ត្រីជាប្រពន្ធមិនអាចនិយាយជាមួយអ្នកយកព័ត៌មានបានទេ ពីព្រោះគាត់បានរងរបួសធ្ងន់និងប៉ោងមុខ បែករយះមាត់អស់ហើយ ។ ក្រោយពេលកើតហេតុស្ត្រីរងគ្រោះត្រូវបានអ្នកជិតខាងដឹកយកទៅសង្គ្រោះនៅមន្ទីរពេទ្យព្រះកុសុមៈ ។ ពេលទៅដល់មន្ទីរពេទ្យ គ្រូពេទ្យក៏បានធ្វើការពិនិត្យឃើញថាស្ត្រីរងគ្រោះជាប្រពន្ធមានកូនក្នុងពោះ២ខែផងដែរ ៕
ចែករំលែកព័តមាននេះ