រាជធានីភ្នំពេញ ៖ បុរសម្នាក់បានស្លាប់បាត់បង់ជីវិតនៅនឹងកន្លែងកើតហេតុ ខណៈបើកម៉ូតូទៅបុកពីក្រោយគូថរថយន្តកុងតឺន័រចតចោលនៅលើផ្លូវដោយគ្មានដាក់ស្លាកសញ្ញាសម្គាល់ពេញទំហឹង កាលពីវេលាម៉ោង ១១និង៣០នាទី យប់ ថ្ងៃទី ១ កញ្ញា ២០១៤ នៅលើកំណាត់ផ្លូវជាតិលេខ១ ស្ថិតក្នុងភូមិជ្រោយអំពិលពីរ សង្កាត់ក្បាលកោះ ខណ្ឌច្បារអំពៅ ។
បុរសរងគ្រោះឈ្មោះ ហេង សុភា អាយុ៣៩ឆ្នាំ ស្នាក់នៅផ្ទះលេខ៣៣៥ ស្ថិតក្នុងសង្កាត់ទឹកថ្លា ខណ្ឌសែនសុខ និងមានស្រុកកំណើតនៅភូមិទី៦ ឃុំជីមាន់ ស្រុកក្រូចឆ្មារ ខេត្តកំពង់ចាម ។
យោងតាមប្រភពព័ត៌មានពីសមត្ថកិច្ចមូលដ្ឋានដែលចុះទៅពិនិត្យកន្លែងកើតហេតុ បានឱ្យដឹងថា នៅមុនពេលកើតហេតុជនរងគ្រោះជិះម៉ូតូម៉ាកឃ្លីក ពណ៌ក្រហម មួយគ្រឿង ពាក់ស្លាកលេខភ្នំពេញ1CK- 0862 ដោយធ្វើដំណើរតែម្នាក់ឯងតាម ផ្លូវជាតិលេខ១ ក្នុងទិសដៅពីលិច មកកើត ខណៈមកដល់ចំណុចកើតហេតុ ជនរងគ្រោះបានបើកម៉ូតូទៅបុកពីក្រោយរថយន្តកុងតឺន័រមួយគ្រឿង ពណ៌ខៀវ ពាក់ស្លាកលេខភ្នំពេញ 3A-1978 ដែលចតនៅលើផ្លូវ ក្នុងទិសដៅស្របគ្នា ដោយពុំមានដាក់ស្លាកសញ្ញាសម្គាល់ ពេញទំហឹង បណ្តាលឱ្យម៉ូតូដួលទៅលើផ្លូវ បាក់.ក បុរសជិះម៉ូតូស្លាប់ ភ្លាមមួយរំពេចនៅនឹងកន្លែងកើតហេតុ ហើយតៃកុងរថយន្តកុងន័របានរត់គេចខ្លួនបាត់ស្រមោល ។
ក្រោយពេលកើតហេតុ សមត្ថកិច្ចបានចុះមកពិនិត្យវាស់វែងកន្លែងកើតហេតុ និងស្រាវជ្រាវរងក្រុមគ្រួសារសពឱ្យមកទទួលយកសពបុរសខាងលើទៅធ្វើបុណ្យតាមប្រពៃណី ចំណែកម៉ូតូ និងរថយន្តសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីដោះស្រាយតាមនិតិវិធីច្បាប់ ។
ចែករំលែកព័តមាននេះ