រាជធានីភ្នំពេញ ៖ បុរស-ស្រ្តី ២នាក់បានរងរបួសធ្ងន់បន្ទាប់ពីជួបគ្រោះថ្នាក់ចរាចរណ៍បង្កឡើងរវាងរម៉ូតូពីរគ្រឿងបុកគ្នាពេញទំហឹង កាលពីវេលាម៉ោង១០ យប់ថ្ងៃទី ១ កញ្ញា ២០១៤ នៅចំណុចមុខក្រសួងមហាផ្ទៃ តាមបណ្តោយផ្លូវព្រះមុនីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញស្រ្តីម្នាក់ជិះម៉ូតូ ម៉ាកស៊ុយស៊ូគី ហ្ស៊ូហ្គុន ពណ៌ខ្មៅ ពាក់ស្លាកលេខភ្នំពេញ 1J-8549 មួយគ្រឿង ដោយធ្វើដំណើរតាមផ្លូវព្រះនរោត្ថម ក្នុងទិសដៅ ពីជើងទៅត្បូង ខណៈមកដល់កន្លែងកើតហេតុ ( មុខក្រសួងមហាផ្ទៃ ) ស្រាប់តែមានម៉ូតូហុងដាឌ្រីមសេ១២៥ ស៊េរីឆ្នាំ២០១១ ពណ៌ខ្មៅមួយគ្រឿង បើកដោយបុរសស្រវឹងធ្លាក់ភ្នែកម្នាក់ ដោយធ្វើដំណើរស្របទិសគ្នាយ៉ាងលឿនបានមកបុកពីក្រោយម៉ូតូស៊ុយស៊ូគី ហ្ស៊ូហ្គុន ពេញទំហឹងបណ្តាលឱ្យរបួសធ្ងន់ទាំងពីរនាក់ដោយស្រ្តីជិះម៉ូតូស៊ុយស៊ូគី ហ្ស៊ូហ្គុន បាក់ជើងខាងឆ្វេង ។
ក្រោយពេលកើតហេតុសមត្ថកិច្ចបានចុះមកវាស់វែងកន្លែងកើតហេតុនិងបញ្ជូនជនរងគ្រោះទៅព្យាបាលនៅមន្ទីរពេទ្យ ចំណែកម៉ូតូទាំងពីរគ្រឿងត្រូវសមត្ថកិច្ចយកទៅរក្សាទុកនៅអធិការដ្ឋានខណ្ឌចំការមន រងចាំដោះស្រាយគ្នាជាក្រោយតាមនិតិវិធីច្បាប់ ។
ចែករំលែកព័តមាននេះ