ខេត្តប៉ៃលិន ៖ ប្រជាពលរដ្ឋនៅតាមភូមិនីមួយៗ ក្នុងក្រុងប៉ៃលិន បានរិះគន់ក្រុមហ៊ុនភ្លើងអគ្គិសនីរបស់លោក ឃុន វណ្ណៈ ថា កុងទ័រដើរលឿន ពីមួយខែទៅមួយខែភ្លើងឡើងខ្ពស់ ជាហេតុធ្វើឱ្យពួកគាត់ពិបាកក្នុងការប្រើប្រាស់ សម្រាប់ជីវភាពរស់នៅប្រចាំថ្ងៃយ៉ាងខ្លាំង ។ ចំណែកខ្សែភ្លើងវិញ ធ្លាក់រញ៉េរញ៉ៃនៅតាមសងខាងផ្លូវសាធារណៈ អាចបណ្តាលឱ្យមានគ្រោះ ថ្នាក់ដល់អាយុជីវិតរបស់ប្រជាពលរដ្ឋនៅថ្ងៃណាមួយជាក់ជាមិនខានឡើយ ។
ជាក់ស្តែងនៅព្រឹកថ្ងៃទី ១ ខែកញ្ញា ២០១៤ នេះ នៅតាមផ្ទះរបស់ប្រជាពលរដ្ឋរស់នៅក្នុង ភូមិសួនអំពៅលិច សង្កាត់ប៉ៃលិន ក្រុងប៉ៃលិន លេខកុងទ័រភ្លើងក្នុងវិក័យបត្រមានការកើនឡើងខុសពីធម្មតា ដោយផ្ទះខ្លះ កាលពីខែកក្កដា ប្រើអស់ត្រឹមតែ៣០គីឡូវ៉ាត់ លុះនៅខែសីហានេះ ពួកគាត់ប្រើប្រាស់ដូចខែមុនដែរ តែកុងទ័រភ្លើងឡើងដល់ទៅជាង៦០គីឡូវ៉ាត់ឯណោះ ។
ប្រភពព័ត៌មានពីប្រជាពលរដ្ឋរស់នៅក្រុងប៉ៃលិនបានរិះគន់ថា ក្រុមហ៊ុនភ្លើងអគ្គិសនី របស់លោក ឃុន វណ្ណៈ ដែលផ្គត់ផ្គង់សេវាប្រើប្រាស់ភ្លើង មានភាពមិនប្រក្រតី ដោយកន្លងមក ការប្រើប្រាស់ភ្លើងអគ្គិសនីរបស់ពួកគាត់ក្នុង១ខែៗ បរិមាណប្រើប្រាស់សម្ភារ ក្នុងផ្ទះបាយដូចជា ទូរទស្សន៍ កុំព្យូទ័រ អំពូលភ្លើង មិនមានការប្រែប្រួលទេ ។ ប៉ុន្តែពេលដាច់ខែ ស្រាប់តែក្រដាសវិក័យបត្រ ដែលចេញដោយក្រុមហ៊ុនអគ្គិសនីខាងលើ លេខកុងទ័រខុសពីធម្មតា រហូតដល់ខែខ្លះឡើងលើសពាក់កណ្តាល ហើយខែខ្លះទៀតឡើងគុណទ្វេរដង រហូតដល់ធ្វើឱ្យពួកគាត់ស្ទើរតែឈប់ប្រើប្រាស់ភ្លើងនេះ តែដោយសារមានក្រុមហ៊ុនតែមួយ គ្មានជម្រើសទេ ។ ចំណែកអ្នកខ្លះទៀត និយាយថា កុងទ័រដើរលឿនប្រហែលជា ដោយសារក្រុមហ៊ុនជាអ្នកកែច្នៃកុងទ័រ ឬអ្នកដើរកត់លេខកុងទ័រខុសតួលេខ ។ ម្យ៉ាងវិញទៀត ខ្សែភ្លើងនៅតាមដងផ្លូវសាធារណៈបានធ្លាក់ចុះក្រោមពីបង្គោលយ៉ាងរញ៉េរញ៉ៃជាច្រើនកន្លែង ដែលធ្វើឱ្យពួកគាត់មានការព្រួ យបារម្ភយ៉ាងខ្លាំងចំពោះសុវត្ថិភាពបងប្អូនប្រជាពលរដ្ឋ ។
ចំណែកខាងក្រុមហ៊ុន ឃុន វណ្ណៈ បានឱ្យដឹងកាលពីរសៀលថ្ងៃទី១ ខែកញ្ញា នេះថា ក្រុមហ៊ុនអគ្គិសនីកំពុងរៀបចំបណ្តាញអគ្គិសនី ជាបណ្តើៗ ហើយក្រុមហ៊ុនបន្តដាក់បង្គោលភ្លើងជារៀងរាល់ថ្ងៃឱ្យបានត្រឹមត្រូវតាមស្តង់ដា ដែលមន្ទីររ៉ែ និងថាមពលខេត្តណែនាំកន្លងមក ។ ប្រភពបន្តទៀតថា គីឡូភ្លើងដើរលឿនខុសពីធម្មតា ដោយសារតែការដាច់ភ្លើង ហើយការដាច់ភ្លើងនេះខាងក្រុមហ៊ុនមិនទទួលខុសត្រូវនោះទេ ព្រោះទិញភ្លើងបន្តមកពីប្រទេសថៃដែរ បើខាងគេដាច់ភ្លើង ខាងយើងក៏ដាច់ផងដែរ ហើយកុងទ័រភ្លើងដើរលឿនបណ្តាលមកពីភ្លើងដាច់ញឹកញាប់ ស្របពេលដែលប្រជាពលរដ្ឋមិនបានបិទកុងតាក់ លុះពេលភ្លើងបុកមកវិញ បណ្តាលឱ្យកុងទ័រឡើងគីឡូ ។ ម្យ៉ាងវិញទៀត ពេលភ្លើងដាច់ យើងមិនបិទកុងតាក់ អាចបណ្តាលឱ្យខូចខាតសម្ភារប្រើប្រាស់នៅក្នុងផ្ទះមួយចំនួនផងដែរ ។
ចែករំលែកព័តមាននេះ