ខេត្តបន្ទាយមានជ័យ ៖ ក្រុមជនសង្ស័យជួញដូរគ្រឿងញៀន៩នាក់ត្រូវបានកងរាជអាវុធ ហត្ថក្រុងប៉ោយប៉ែតបង្ក្រាបឃាត់ខ្លួនដើម្បីចាត់ការតាមផ្លូវច្បាប់ ជាប់ចោទពីបទជួញដូរនិងប្រើប្រាស់គ្រឿងញៀនខុសច្បាប់ និងរួមទាំងវត្ថុតាងមួយចំនួនផងដែរ ។
ជនសង្ស័យទាំង៩នាក់ដែលកម្លាំង កងរាជអាវុធហត្ថចុះប្រតិបត្ដិការបង្ក្រាប ឃាត់ខ្លួនតាមបទបញ្ជារបស់លោកឧត្ដមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្ដបន្ទាយមានជ័យ និងដឹកនាំដោយលោកអនុសេនីយ៍ឯក ជា ដា មេបញ្ជាការ កងរាជអាវុធហត្ថក្រុងប៉ោយប៉ែត កាលពីថ្ងៃទី៣០ សីហា ២០១៤នៅ ចំណុចម្ដុំផ្ទះសំណាក់ហង្សមាសថ្មី ស្ថិតនៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្ដបន្ទាយមានជ័យ ។
លោក ជា ដា មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ឱ្យដឹងថា ការចុះបង្ក្រាបចាប់ឃាត់ខ្លួនជន សង្ស័យគ្រឿងញៀនខាងលើ សមត្ថកិច្ចតាមដានស្រាវជ្រាវប្រើប្រាស់វិធានការជំនាញ ដោយមុនដំបូងឃាត់ខ្លួនជន សង្ស័យជួញដូរគ្រឿងញៀនម្នាក់ ឈ្មោះ សុខ ចិន ហៅឆៃ ភេទប្រុស អាយុ៣៣ឆ្នាំ ជាអ្នករត់ម៉ូតូឌុប បច្ចុប្បន្នរស់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ដែលកំពុងធ្វើសកម្មភាពប្រព្រឹត្ដ បទល្មើសគ្រឿងញៀនជាក់ស្ដែង ។
ក្រោយពីសមត្ថកិច្ចចាប់ឃាត់ខ្លួនជនសង្ស័យ រូបនេះរួចមកក៏បន្ដទៅចាប់ឃាត់ខ្លួន ជនសង្ស័យប្រើប្រាស់គ្រឿងញៀន៨នាក់ បន្ថែមទៀតដែលបានមកទំនាក់ទំនងតាមទូរស័ព្ទ ហើយទិញថ្នាំញៀនពីជនសង្ស័យ ឈ្មោះ សុខ ចិន ហៅឆៃ ។ ជាមួយនឹងការបង្ក្រាបចាប់ឃាត់ខ្លួនជនសង្ស័យទាំង៩នាក់ សមត្ថកិច្ចបានឆែកឆេររកឃើញ និងដកហូតបានគ្រឿងញៀនប្រភេទមេតំហ្វេ តាមីន(ម៉ាទឹកកកចំនួន៤៣ថង់តូចស្មើនឹង១២,១៥ក្រាម) ទូរស័ព្ទដៃ១២គ្រឿង , រថយន្ដ១គ្រឿង ម៉ូតូ៣គ្រឿង និងថង់ សម្រាប់ច្រកគ្រឿងញៀនមួយចំនួនទៀតបន្ទាប់មកជនសង្ស័យត្រូវបានសមត្ថកិច្ចថាខ្លួនពិតជាបានប្រព្រឹត្តល្មើសច្បាប់ពិតប្រាកដមែន ត្រូវបានកម្លាំងប៉េអឹមកសាងសំណុំរឿងបញ្ជូនទៅតុលាការនៅព្រឹកថ្ងៃទី១ កញ្ញានេះ ដើម្បីចាត់ការតាមច្បាប់តែម្តង ។
ចែករំលែកព័តមាននេះ