ខេត្តសៀមរាប ៖ ដើមី្បអនុវត្តឲ្យកាន់តែមានប្រសិទ្ធភាព នូវបទបញ្ជាលេខ០១បប របស់រាជរដ្ឋាភិបាលកម្ពុជា និង ដោយការយកចិត្តទុកដាក់ខ្ពស់ជាប្រចំាពីលោក ឃឹម ប៊ុនសុង អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត និង លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមផងនោះ នៅពេលរាត្រីថ្ងៃ ទី៣១ ខែសីហា ឆ្នាំ២០១៤មិ្សលមិញនេះ ក្រោមការសម្របសម្រួលដឹកនាំដោយលោក សំរឹទ្ធ សុខុន ព្រះរាជអាជ្ញារងសាលាដំបូងខេត្តសៀមរាប លោកវរសេនីយ៍ឯក ស្រី យូរ៉ា មេបញ្ជាការរងនៃទីបញ្ជាការដ្ឋានកងរាជអាវុធហត្ថខេត្តសៀមរាប និងជាប្រធានមន្ទីរស្រាវជ្រាវនិងយុត្តិធម៌ បានបញ្ជាដឹកនាំកម្លាំងកងរាជអាវុធហត្ថខេត្ត សហការជាមួយ កម្លាំងខ័ណ្ឌរដ្ឋបាលជលផលខេត្តសៀមរាបចុះធ្វើប្រតិបត្តិការបង្រ្កាបបទល្មើសនេសាទ នៅរដូវបិទនេសាទ ក្រោមស្បៃរាត្រី នៅលើផ្ទៃជលសាបឹងទន្លេសាប ក្នុងភូមិសាស្ត្រ ចំណុចខ្វែកចក ភូមិស្ទឹងជ្រៅឃុំអន្លង់សំណ ស្រុកជីក្រែង ខេត្តសៀមរាប ក្នុងនោះដោយបានប្រើប្រាស់នូវមធ្យោបាយជាកាណូតចំនួន៣ គ្រឿង និងកម្លាំង២១នាក់។
ក្នុងសកម្មភាពការចុះបង្រ្កាបបទល្មើសនេសាទនេះ កម្លាំងសមត្ថកិច្ចកងរាជអាវុធហត្ថយើងបានធ្វើការបង្រ្កាប នូវឧបករណ៍ឆ្នុក ដែលប្រជានេសាទបានប្រើប្រាស់នូវអំពូលភ្លើងពណ៌ដើមី្បទាក់ទាញត្រីគ្រប់ប្រភេទ ទាំងតូចទាំងធំ ហើយដែលជាឧបករណ៍ត្រូវរដ្ឋបានហាមឃាត់ ដែលធ្វើឲ្យភ្លឺពេញផ្ទៃទឹកបឹងទន្លេសាប ប្រៀបបានជាទីក្រុងទៅហើយ នៅចំណុចខ្វែកចកនេះ។ នៅក្នុងរាត្រីថ្ងៃទី៣១ ខែសីហា នោះ កម្លាំងកងរាជអាវុធហត្ថខេត្តបានធ្វើការ បំផ្លាញនូវឧបករណ៍ ឆ្នុក ចំនួន ៣០កន្លែងនឹង ដកហូតបាននូវអាគុយចំនួន ៣០គ្រឿង អំពូលម៉ែត្រភ្លើង ពណ៌ ចំនួន៣០ដើម កាណូត សម្បកកាវសម្រាប់ធ្វើសកម្មភាពបទល្មើស ចំនួន៦គ្រឿង មានម៉ាស៊ីន៥គ្រឿង និងសំបក ទូកគ្មានម៉ាស៊ីន១គ្រឿងម៉ាស៊ីនកាណូតគ្មានទូក ៣គ្រឿងហើយប្រមូលបានសាច់ស្នុក ៤មាត់ព្រមទាំងបានចាប់ខ្លួនជនល្មើសកំពុងធ្វើសកម្មភាពជាក់ស្តែងបានចំនួន៣នាក់ ភេទប្រុស ជាជនជាតិខ្មែរ ។
លុះនៅព្រឹកថ្ងៃទី ១ខែកញ្ញា ឆ្នាំ២០១៤នោះដែរកម្លាំងសមត្ថកិច្ចកងរាជអាវុធហត្ថខេត្តក៏បាននាំយកជនល្មើសទាំង៣នាក់ និងឧបករណ៍ សម្ភារ ដែលជាវត្ថុតាង មានកាណូត សាច់ឆ្នុកអាគុយ អំពូលភ្លើងទៅប្រគល់ជូនដល់កម្លាំងសមត្ថកិច្ចផ្នែករដ្ឋបាលជលផលដំដែក ស្ថិតនៅកំពង់ឃ្លាំង មាននីតិវិធីបន្ត ដើមី្បកសាងសំណុំរឿងបញ្ជូនទៅកាន់សាលាដំបូងខេត្តសៀមរាប ចាត់ការបន្តទៅតាមនីតិវិធីច្បាប់។
ចែករំលែកព័តមាននេះ