រាជធានីភ្នំពេញ ៖ សហព័ន្ធកីឡាប្រដាល់កម្ពុជា សហការជាមួយស្ថានីយទូរទស្សន៍អប្សរា បានបើកកិច្ចប្រជុំមួយកាលពីថ្ងៃទី១ កញ្ញា ដើម្បីបញ្ចប់នូវភាពមន្ទិលដែលបានកើតមានឡើងកាលពីថ្ងៃសៅរ៍ ទី៣០ សីហាកន្លងមកនេះ លើលទ្ធផលការប្រកួតរវាងកីឡាករសៀវ សំណាង មកពីក្លិបវីអាយភី ចំការមន និងសំណាង ឌីណា មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ។
រាជធានីភ្នំពេញ ៖ សហព័ន្ធកីឡាប្រដាល់កម្ពុជា សហការជាមួយស្ថានីយទូរទស្សន៍អប្សរា បានបើកកិច្ចប្រជុំមួយកាលពីថ្ងៃទី១ កញ្ញា ដើម្បីបញ្ចប់នូវភាពមន្ទិលដែលបានកើតមានឡើងកាលពីថ្ងៃសៅរ៍ ទី៣០ សីហាកន្លងមកនេះ លើលទ្ធផលការប្រកួតរវាងកីឡាករសៀវ សំណាង មកពីក្លិបវីអាយភី ចំការមន និងសំណាង ឌីណា មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ។
ប្រតិកម្មពីសំណាក់ទស្សនិកជននាពេលនោះ បានកើតឡើងដោយសារតែការកាត់ក្តីរបស់ចៅក្រមដាក់ពិន្ទុ ដែលឱ្យសៀវ សំណាង ឈ្នះពិន្ទុសំណាង ឌីណា ខណៈការប្រកួតរបស់គូនេះត្រូវគេមើលឃើញថា សំណាង ឌីណា វាយចូលមុខ សៀវ សំណាង ច្រើន ។ គេនៅចាំបានថា ក្នុងចំណោមចៅក្រមទាំង៥រូបនោះមានចៅក្រមចំនួន៤រូបបានផ្តល់ពិន្ទុឱ្យ សៀវ សំណាង ជាអ្នកឈ្នះ និងមានតែចៅក្រមមួយរូបបុ៉ណ្ណោះដែលបានផ្តល់ពិន្ទុឱ្យ សំណាង ឌីណា ឈ្នះ ។ ចំពោះចៅក្រមទាំង៤រូបដែលដាក់ពិន្ទុឱ្យ សៀវ សំណាង ឈ្នះនោះមានលោកនួន បូរ៉ា លោកម៉ែន យូហាក់ លោកជ័យ កុសល និងលោកមាស យ៉ាម ។ ចំណែកចៅក្រមដែលបានផ្តល់ពិន្ទុឱ្យ សំណាង ឌីណា ឈ្នះនោះ គឺលោកហួត សេងទ្រី រីឯអាជ្ញាកណ្តាល គឺលោកងួន និត ចំណែកប្រធានគណៈកម្មការតុវិញនោះ គឺលោកឈិត សារឹម ។
លោកយុទ្ធ ភូថង ប្រធានគណៈកម្មការរៀបចំការប្រកួតរបស់ស្ថានីយទូរទស្សន៍អប្សរា ដែលបានអញ្ជើញចូលរួមនៅក្នុងកិច្ចប្រជុំវាយតម្លៃរកដំណោះស្រាយនាឱកាសនោះ បានមានប្រសាសន៍ថា លោកមិនចោទប្រកាន់ថា អ្នកណាខុស អ្នកណាត្រូវឡើយ ។ បើតាមការពិនិត្យមើលតាមរយៈការចាក់ផ្សាយឡើងវិញនោះ គូនេះប្រកួតមានភាពប្រដំប្រសងគ្នា បុ៉ន្តែបង្គោលខៀវ សំណាង ឌីណា មានប្រៀបជាងបន្តិច គឺបានវាយចំគោលដៅច្រើនជាងនៅក្នុងទឹកទី៣ និងទឹកទី៤ ។ ចំណែក សៀវ សំណាង វាយចេញបានល្អនៅដើមទឹកទី១ និងទឹកទី៥ បុ៉ណ្ណោះ តែទោះជាយ៉ាងណា លោកមិនបន្ទោសទៅលើចៅក្រមណាម្នាក់ទេ គ្រាន់តែលោកសំណូមពរដល់គណៈកម្មការបច្ចេកទេសទាំងអស់ត្រូវពង្រឹងសមត្ថភាពរបស់ខ្លួនថែមទៀត ។ ជាពិសេស រាល់ការដាក់ពិន្ទុត្រូវមានភាពសុក្រឹតបន្តិច ព្រោះថាបច្ចុប្បន្នទស្សនិកជនគេពូកែមើលខ្លាំងណាស់ យុត្តិធម៌ឬមិនយុត្តិធម៌ គេអាចដឹងបាន ។
លោកមុិល កាដូ អគ្គលេខាធិការសហព័ន្ធកីឡាប្រដាល់កម្ពុជា បានឯកភាពគ្នាជារួមដែលមានលោកឧត្តមសេនីយ៍ឯក តែម ម៉ឺន ជាប្រធានសហព័ន្ធ និងលោកស៊ាន វិសុទ្ធ ជាអគ្គនាយកស្ថានីយទូរទស្សន៍អប្សរាផងដែរនោះ សម្រេចឱ្យគូនេះស្មើពិន្ទុគ្នា ។ ម្យ៉ាងវិញទៀត អង្គប្រជុំក៏បានតម្រូវឱ្យពួកគេទាំងពីរជួបប្រកួតគ្នាម្តងទៀតនៅខែក្រោយផងដែរ ។ គួររំលឹកថា កាលនោះនៅពេលដែលអាជ្ញាកណ្តាលលើកដៃឱ្យ សៀវ សំណាង ជាអ្នកឈ្នះនោះ ទស្សនិកជនជាច្រើនបានបញ្ចេញប្រតិកម្មជំទាស់ភ្លាមៗតែម្តង បុ៉ន្តែក្រោយពីតំណាងស្ថានីយទូរទស្សន៍អប្សរាសន្យាថា រកភាពយុត្តិធម៌ឱ្យនោះពួកគាត់មានការសាទរយ៉ាងខ្លាំង ហើយភាពយុត្តិធម៌នោះ ក៏បានរកឃើញនៅពេលនេះផងដែរ៕
ចែករំលែកព័តមាននេះ