រាជធានីភ្នំពេញ ៖ ចុងចម្លើយជាប្រធានក្រុមហ៊ុន RSL Royal Shipping Line ដែលរងនូវបណ្តឹងព្រហ្មទណ្ឌពីសំណាក់លោកហ៊ុន ម៉ានី ជាតំណាងរាស្ត្រមណ្ឌល ខេត្តកំពង់ស្ពឺ ពីបទប្រើប្រាស់ឈ្មោះរបស់លោក ដើម្បីបោកប្រាស់មន្ត្រីគយនៃកំពង់ផែស្វយ័តខេត្តព្រះសីហនុ នៅព្រឹកថ្ងៃទី០១ កញ្ញា ២០១៤ បានចូលបំភ្លឺនៅចំពោះមុខព្រះរាជអាជ្ញារងអមសាលាដំបូងរាជធានីភ្នំពេញ ។
រាជធានីភ្នំពេញ ៖ ចុងចម្លើយជាប្រធានក្រុមហ៊ុន RSL Royal Shipping Line ដែលរងនូវបណ្តឹងព្រហ្មទណ្ឌពីសំណាក់លោកហ៊ុន ម៉ានី ជាតំណាងរាស្ត្រមណ្ឌល ខេត្តកំពង់ស្ពឺ ពីបទប្រើប្រាស់ឈ្មោះរបស់លោក ដើម្បីបោកប្រាស់មន្ត្រីគយនៃកំពង់ផែស្វយ័តខេត្តព្រះសីហនុ នៅព្រឹកថ្ងៃទី០១ កញ្ញា ២០១៤ បានចូលបំភ្លឺនៅចំពោះមុខព្រះរាជអាជ្ញារងអមសាលាដំបូងរាជធានីភ្នំពេញ ។
លទ្ធផលនៃការចូលបំភ្លឺនេះពុំមានប្រភពព័ត៌មានណាមួយបញ្ជាក់ឱ្យដឹងជាផ្លូវការនោះទេ គ្រាន់តែបង្ហើបឱ្យដឹងថា ប្រធានក្រុមហ៊ុនរូបនេះ បានទទួលស្គាល់កំហុសថាពិតជាបានប្រើប្រាស់ឈ្មោះរបស់លោកហ៊ុន ម៉ានី ដើម្បីបោកប្រាស់មន្ត្រីគយនៃកំពង់ផែស្វយ័ត នៅខេត្តព្រះសីហនុ ករណីរថយន្ត២គ្រឿងប្រាកដមែន ។
ប្រភពបន្តថា ចុងចម្លើយកំពុងស្វែងរកកិច្ចអន្តរាគមន៍សុំទោសដើមបណ្តឹងជាផ្លូវការដើម្បីបញ្ចប់រឿងត្រឹមដំណាក់កាលអយ្យការ ។ ចុងចម្លើយក្នុងសំណុំរឿងនេះ មានឈ្មោះ រាជ សុធន ជាប្រធានក្រុមហ៊ុន RSL Royal Shipping Line មានទីតាំងនៅវីឡាលេខ២៧០ ផ្លូវលេខ១៥៦ ក្នុងសង្កាត់ទឹកល្អក់ទី២ ខណ្ឌទួលគោក ។
ដើមចមនៃសំណុំរឿងនេះគឺកើតឡើងកាលពីថ្ងៃទី០៥ ខែសីហា ឆ្នាំ២០១៤ ឈ្មោះ រាជ សុធន បានផ្ញើសារជាភាសាអង់គ្លេសទៅមន្ត្រីគយនៃកំពង់ផែស្វយ័ត នៅខេត្តព្រះសីហនុ ថា ឲ្យយករថយន្តចេញពីកំពង់ផែចំនួនពីរគ្រឿង ព្រោះនេះជារថយន្តរបស់លោក ហ៊ុន មានី ។ ប៉ុន្តែជាក់ស្តែងលោក ហ៊ុន ម៉ានី មិនបានដឹងរឿងនេះឡើយ ។ ពាក់ព័ន្ធបញ្ហានេះ សេចក្តីប្រកាសព័ត៌មានចេញនៅថ្ងៃទី២០ សីហា ២០១៤ បានបញ្ជាក់ថាលោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ បានដាក់ពាក្យបណ្តឹងព្រហ្មទណ្ឌមួយនៅអយ្យការអមសាលាដំបូងរាជធានីភ្នំពេញប្រឆាំងនឹងបុគ្គលម្នាក់ដែលបានប្រើប្រាស់ឈ្មោះរបស់លោក ហ៊ុន ម៉ានី ដើម្បីបោកប្រាស់មន្ត្រីគយនៃកំពង់ផែស្វយ័ត នៅខេត្តព្រះសីហនុ ។
សេចក្តីប្រកាសព័ត៌មានដដែលបានបន្តថា លោក ហ៊ុន ម៉ានី បានអះអាងជាថ្មីថា លោកមិនដែលបានអនុញ្ញាត និងមិនដែលបានគាំទ្ររាល់ការប្រើប្រាស់ឈ្មោះ និង ឋានៈរបស់លោកដើម្បីបម្រើឲ្យសកម្មភាពខុសច្បាប់ណាមួយនោះឡើយ ហើយសូមសំណូមពរដល់អាជ្ញាធរមានសមត្ថកិច្ច និងតុលាការមេត្តាចាត់វិធានការផ្តន្ទាទោសជនល្មើសឲ្យបានធ្ងន់ធ្ងរស្របតាមនីតិវិធីច្បាប់ជាធរមាននៃព្រះរាជាណាចក្រកម្ពុជា ៕
ចែករំលែកព័តមាននេះ