ជនជាតិបារាំង៤នាក់មានអាយុ២៥ ឬ២៦ឆ្នាំបានស្ម័គ្រចិត្តចេញច្បាំងនារដូវក្តៅនេះជួយពួកបំបែកខ្លួននិយមស្និទ្ធរុស្ស៊ី ដែលកំពុងប្រយុទ្ធនៅភាគខាងកើតអ៊ុយក្រែន ។ តាម FACEBOOK យុវជនបារាំងទាំង៤នាក់នោះដែលមានឈ្មោះ VICTOR GUILLAUME MICHAEL និង NIKOLA អះអាងថា ពួកគេត្រៀមខ្លួនស្លាប់ដើម្បីជួយការពារតម្លៃរបស់រុស្ស៊ី ។ ពួកគេបានចូលរួមក្នុងជួរពួកបំបែកខ្លួននិយមសិ្នទ្ធរុស្ស៊ី ដែលកំពុងតែប្រយុទ្ធនៅភាគខាងកើតអ៊ុយក្រែន ហើយបានរៀបរាប់ប្រាប់ពីមូលហេតុដល់កាសែតបារាំង LIBERATION និង LE MONDE ។
កាលពីខែមិថុនាកន្លងមកនេះ ពេលចុះពីយន្តហោះនៅក្រុងមូស្គូ យុវជនបារាំងទាំង៤នាក់បានធ្វើដំណើរទៅកាន់ទីក្រុង ROSTON-SUR-LE-DON ភាគខាងត្បូងរុស្ស៊ី ជាមូលដ្ឋានខាងក្រោយដ៏សំខាន់របស់ពួកឧទ្ទាមបំបែកខ្លួននិយម ។ នៅទីនោះពួកគេចង់ស្វែងយល់ថា តើត្រូវជួយពួកបំបែកខ្លួននិយមបែបណា ។ ២ខែក្រោយមកយុវជនបារាំងទាំង៤នាក់អាចទៅកាន់ភាគខាងកើតអ៊ុយក្រែន ។ ថ្ងៃទី២០ សីហា ពួកគេស្លៀកពាក់ឯកសណ្ឋានរបស់កងទាហាននៃសាធារណរដ្ឋដូណេតស្ក៍ប្រកាសដោយខ្លួនឯង។ យោងតាមកាសែត LIBERATION ថា ពួកគេជាសមាជិកនៃកងវរសេនាតូច VOSTOK ដឹកនាំដោយជនជាតិរុស្ស៊ីម្នាក់ ៕
ចែករំលែកព័តមាននេះ