ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃទី៣១ សីហា បានលើកឡើងជាលើកដំបូងនូវគំនិតនៃលក្ខន្តិកៈរដ្ឋមួយ សម្រាប់បណ្តាតំបន់ពួកឧទ្ទាមបំបែកខ្លួននិយមនៅភាគខាងកើតអ៊ុយក្រែន ខណៈពួកលោកខាងលិចចោទប្រកាន់លោកថាដាក់ពង្រាយកងទ័ពនៅទីនោះ ហើយទាមទារឱ្យដកកងទ័ពទាំងនេះចេញ បើពុំដូច្នោះទេ នឹងរងការដាក់ទណ្ឌកម្មថ្មីៗទៀត ។
នៅលើទីលាន ពួកបំបែកខ្លួននិយមដែលកាលពីសប្តាហ៍មុនបានវាយបកវាតទឹកដីវិញនោះហាក់ដូចជាកំពុងរៀបចំការវាយបកថ្មីមួយទៀត ។ យោងតាមភ្នាក់ងារ AFP ម្នាក់ថា ខាងកងទ័ពអ៊ុយក្រែនវិញ ពេលនេះហាក់ដូចជាជាប់ការឡោមព័ទ្ធក្នុងតំបន់ចន្លោះក្រុងដូណេតស្ក៍ ជាមូលដ្ឋានធំរបស់ពួកឧទ្ទាមជាប់ព្រំដែនរុស្ស៊ី និងកំពង់ផែយុទ្ធសាស្ត្រម៉ារីអ៊ូប៉ូល នាភាគខាងត្បូងជាប់មាត់សមុទ្រ Azov ។
ក្នុងបទសម្ភាសន៍តាមទូរទស្សន៍មួយប្រធានាធិបតីរុស្ស៊ីថ្លែងថា យើងត្រូវចាប់ផ្តើមភ្លាមៗនូវការពិភាក្សាបន្ថែមទៀត លើបញ្ហាទាំងឡាយដែលទាក់ទិនដល់ការរៀបចំខាងនយោបាយរបស់សង្គម និងលក្ខន្តិកៈរដ្ឋមួយសម្រាប់ភាគអាគ្នេយ៍អ៊ុយក្រែន ដើម្បីការពារផលប្រយោជន៍ស្របច្បាប់របស់មនុស្សដែលរស់នៅតំបន់នោះ ។
នេះជាភាសាថ្មីមួយរបស់បុរសខ្លាំងរុស្ស៊ី ដែលកាលពីថ្ងៃទី២៩ សីហា កន្លងទៅនេះ បានលើកសរសើររួចហើយ ពីជោគជ័យរបស់ពួកបំបែកខ្លួននិយមក្នុងសារមួយផ្ញើជូនពួកបះបោរនៅណូវ៉ូរ៉ូស៊ីយ៉ា (រុស្ស៊ីថ្មី) ជាពាក្យដែលលោកធ្លាប់ប្រើប្រាស់ក្រោយពេលបញ្ចូលតំបន់គ្រីមេមកក្នុងរុស្ស៊ី កាលពីខែមីនា សម្រាប់ហៅចំពោះតំបន់និយាយភាសារុស្ស៊ីជាច្រើននៅភាគខាងកើត និងភាគខាងត្បូងអ៊ុយក្រែន ។
ក្រោយពីការចេញផ្សាយពាក្យខាងលើនោះរបស់លោកពូទីន អ្នកនាំពាក្យរបស់វិមានក្រឹមឡាំង លោក ឌីមីទ្រី ប៉េស្កូវ គូសបញ្ជាក់ថា លោកប្រធានាធិបតីពុំមែនលើកឡើងពីការបង្កើតរដ្ឋឯករាជ្យមួយសម្រាប់បណ្តាតំបន់ភាគអាគ្នេយ៍អ៊ុយក្រែនឡើយ ។ បែបនោះជាការបកស្រាយខុសទាំងស្រុង ។ អ្នកនាំពាក្យរូបនេះបន្តថា អ៊ុយក្រែនត្រូវគិតដល់ផលប្រយោជន៍របស់ណូវ៉ូរ៉ូស៊ីយ៉ា ។
រហូតមកដល់ពេលនេះ រុស្ស៊ីស្នើឱ្យតំបន់បំបែកខ្លួននិយមនាភាគខាងកើតអ៊ុយក្រែន ក្លាយជារដ្ឋសហព័ន្ធមួយរបស់អ៊ុយក្រែន ។
ប្រធានាធិបតីអ៊ុយក្រែន លោក ប៉េត្រូប៉ូរ៉ូ ឆេនកូ ត្រូវជួបសមភាគីអាមេរិក លោក បារ៉ាក់ អូបាម៉ា នៅខាងក្រៅកិច្ចប្រជុំកំពូលអូតង់នៅអង់គ្លេសនាថ្ងៃទី៤ និងទី៥ កញ្ញា ខណៈអ៊ុយក្រែនស្នើសុំជំនួយ ហើយជំរុញគម្រោងរបស់ប្រទេសនេះចូលជាសមាជិកអូតង់ ។
ប្រធានគណៈកម្មការកិច្ចការបរទេសនៃព្រឹទ្ធសភាអាមេរិក លោក Robert Menendez កាលពីថ្ងៃទី៣១ សីហា វាយតម្លៃថា សហរដ្ឋអាមេរិក និងអូតង់ ត្រូវផ្តល់អាវុធឱ្យអ៊ុយក្រែន៕
ចែករំលែកព័តមាននេះ