រាជធានីភ្នំពេញ ៖ ការប្រកួតវគ្គបញ្ចប់ក្នុងជុំសន្សំពិន្ទុ កាលពីថ្ងៃអាទិត្យ ទី៣១ សីហា បានធ្វើឲ្យមានការកក្រើកយ៉ាងខ្លាំងនៅលើសង្វៀនទូរទស្សន៍អាស៊ីអាគ្នេយ៍ ។ ប៉ុន្តែនៅពីក្រោយសំឡេងហ៊ោកញ្ជ្រៀវយ៉ាងកងរំពងនោះកីឡាករម៉ន សាម៉េត បានបែក៨ថ្នេរ ស្របពេលដែល ឆាំ រ៉ែម បានស៊ីយ៉ាងផុយ ទៅលើគូប្រកួត ។ កីឡាករជើងខ្លាំងមកពីក្លិបព្រែកឯងកីឡា បានបញ្ជាក់នៅខាងក្រៅសង្វៀនថា នៅក្នុងការប្រកួត៥ទឹកជាមួយ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ លោកមិនអស់ចិត្តឡើយដែលត្រូវគណៈកម្មការកំណត់ឲ្យចាញ់នៅវគ្គចុងក្រោយ។
ថ្វីត្បិតតែឃីម បូរ៉ា វាយលោកឲ្យបែក៨ថ្នេរ និងដួលប៉ុន្មានដង ប៉ុន្តែលោកគឺជាអ្នកវាយលុកបានខ្លាំងទៅលើគូប្រកួតនាពេលនោះ ។ ម៉ន សាម៉េត មិនយល់ថា ខ្លួនឯងត្រូវចាញ់ពិន្ទុឃីម បូរ៉ា នោះទេ ដោយសារតែលោកសំអាងថា សន្ទុះនៃការវាយចំគោលដៅ គឺលោកសម្រេចបានផលល្អជាង បើធៀបនឹងឃីម បូរ៉ា ដែលបានត្រឹមតែទប់ និងវាយបកមកវិញម្តងម្កាល ។ លោកយល់ថា នេះជាការកាត់ក្ដី ដោយផ្អែកតែហេតុផលមួយត្រង់ថា លោកបែក និងដួលព្រោះតែចាញ់កម្លាំងបន្តិចប៉ុណ្ណោះ ។ យ៉ាងណាមិញ លោកក៏មិនបានសម្ដែងអារម្មណ៍ប្រឆាំងនឹងការកាត់ក្ដី ឬមានបំណងសើរើបង្កបញ្ហាដូចការប្រកួតមួយចំនួន ដែលត្រូវគ្រូបង្វឹក និងអ្នកដឹកនាំកីឡាករប្ដឹងរឿងដាក់ពិន្ទុលម្អៀងរហូតដល់ថ្នាក់ត្រូវបញ្ឈរជើងអ្នកកាត់ក្ដីខ្លះពីសង្វៀនប្រដាល់នោះឡើយ ។
យោងតាមការប្រកួត ម៉ន សាម៉េត ទទួលបានសន្ទុះនាំមុខខ្លាំងក្លា គិតត្រឹម៣ទឹកដំបូង ប៉ុន្តែឈានដល់ទឹកទី៤ សន្ទុះជោគជ័យនោះ ត្រូវបានស្រុតចុះ ដោយសារតែភ្លាត់ឲ្យឃីម បូរ៉ា វាយដួល ហើយបែកពីរកន្លែងគួរឲ្យភ្ញាក់ផ្អើល ត្រង់ប្រជុំចិញ្ចើម និងចុងចិញ្ចើមខាងធ្វេង ។ ម៉ន សាម៉េត បែក៨ថ្នេរ ដែលស្នាមរបួសនេះ លោកថា មិនគ្រាន់តែជារបួសនៅលើស្បែកតែប៉ុណ្ណោះទេ ប៉ុន្តែក៏ជារបួសដែលកប់ជ្រៅក្នុងប្រអប់ទ្រូង មិនអាចបំភ្លេចបានផងដែរ ។ លទ្ធផលនេះ នាំឲ្យម៉ន សាម៉េត ដែលមិនធ្លាប់ចាញ់សោះ ក្នុងការប្រកួតវិលជុំសន្សំពិន្ទុ ក្លាយជាអ្នកចាញ់យ៉ាងអាម៉ាស់ ហើយឈរត្រឹមចំណាត់ថ្នាក់លេខ២ក្នុងពូលA មុនបន្តទៅកាន់ការប្រកួតជាមួយពូលBមួយថ្មីទៀត ដើម្បីដណ្ដើមយកខ្សែក្រវាត់ស្រាបៀរកម្ពុជា ។ ម៉ន សាម៉េត និយាយថា ៖ «ខ្ញុំទទួលស្គាល់ថា ខ្ញុំភ្លាត់ឲ្យបែក និងដួលខ្លះៗ ប៉ុន្តែខ្ញុំវាយត្រូវច្រើនណាស់ អ៊ីចឹងហើយ ទើបខ្ញុំមិនអស់ចិត្តរឿងគេឲ្យចាញ់ឃីម បូរ៉ា» ។
លោកសន្យាថានឹងសងសឹកឃីម បូរ៉ា ក្នុងជំនួបបន្តឲ្យទាល់តែបាន ដោយសារតែនៅពាក់កណ្ដាលខែកញ្ញាខាងមុខ អ្នកទាំងពីរនឹងជួបគ្នាម្ដងទៀតក្នុងការប្រកួតវគ្គថ្មី ជាមួយពូលB ។ ផ្អែកតាមការប្រកួតជាក់ស្ដែងឃីម បូរ៉ា ក្រៅពីរឹងជំហរ ក៏ពូកែទប់ស្នៀត និងវាយបកបានវិញភ្លាមៗផងដែរ ថ្វីដ្បិតតែការវាយសម្រុកបានតិចជាង ។ ក្នុងនោះមកពីលោកមានសមត្ថភាពវាយឲ្យម៉ន សាម៉េត បែក៨ថ្នេរ និងដួលច្រើនលើកផង ទើបគណៈកម្មការសម្រេចផ្ដល់ពិន្ទុឈ្នះឲ្យ ។ លទ្ធផលនេះបង្ហាញថា ឃីម បូរ៉ា ប្រកួត៥លើកមិនដែលចាញ់សោះ ហើយឈរចំណាត់ថ្នាក់លេខ១ ក្នុងពូលA ។ កីឡាករទាំងពីរនឹងប៉ះជាមួយកីឡាករ៣រូបទៀតក្នុងពូលB ហើយធ្វើការប្រកួតសន្សំពិន្ទុសាជាថ្មី ដើម្បីកំណត់យក២នាក់ចុងក្រោយទៅដណ្ដើមខ្សែក្រវាត់ ។
នៅក្នុងវេទិកានោះ ក៏ជាការប្រកួតជុំចុងក្រោយរបស់ពូលBផងដែរ ។ កីឡាករឆាំ រ៉ែម ក៏ធ្វើឲ្យភ្ញាក់ផ្អើល បន្ទាប់ពីអាចផ្ដួលកីឡាករយិន បូរិន យកបាន៣ពិន្ទុដូចការគ្រោងទុក ។ ជ័យជម្នះនេះ បានរុញឲ្យលោកក្លាយជាកីឡាករដែលមានពិន្ទុខ្ពស់លំដាប់លេខ២ក្នុងពូលB មុនឡើងទៅកាន់វគ្គខ្វែង ដែលជាការប្រកួតសន្សំពិន្ទុជាមួយជើងខ្លាំងមកពីពូលAនោះ។ ឆាំ រ៉ែម ក៏ជាជើងខ្លាំងម្នាក់ ដែលធ្វើឲ្យជើងខ្លាំងដទៃទៀត ញាក់សាច់ផងដែរ ដោយសារតែលោកត្រូវអ្នកគាំទ្រមើលឃើញថា ល្អគ្រប់ស្នៀត រហ័ស ហើយល្អកម្លាំងស៊ុហ្វ ។ ទោះបីយ៉ាងណា មានតែការប្រកួតក្នុងវគ្គបន្តប៉ុណ្ណោះ ទើបដឹងថាជើងខ្លាំងក្នុងពូលណាមួយខ្លាំងពិតប្រាកដ ៕
ចែករំលែកព័តមាននេះ