រាជធានីភ្នំពេញ ៖ ការប្រកួតជម្រើសជើងឯកបាល់ទាត់ស្ត្រីអាយុក្រោម១៦ឆ្នាំ (U16) លើកទី៤ ប្រចាំឆ្នាំ២០១៤ ដែលបានធ្វើឡើងកាលពីរសៀលថ្ងៃទី៣១ សីហា នៅពហុកីឡដ្ឋានជាតិអូឡាំពិកមានចំនួន២ប្រកួតនោះ ក្រុមអង្គការកម្មវិធីសលត៍បានលត់ក្រុមអង្គការមូលនិធិកុមារកម្ពុជាយ៉ាងចាស់ដៃក្នុងលទ្ធផល១១ទល់០ ខណៈក្រុមអង្គការផ្កាយសមុទ្របំបាក់ក្រុមកង្រីរាជសីហ៍មានរិទ្ធ៤ទល់០ ។
ការប្រកួតជ្រើសរើសជើងឯកខាងលើនេះ នឹងត្រូវបញ្ចប់នៅថ្ងៃទី១២ ខែកញ្ញាខាងមុខនេះ ដោយមានក្រុមបាល់ទាត់ស្ត្រីចូលរួមប្រកួតចំនួន៩ និងបែងចែកជា២ពូលគឺ ៖
ពូលA មានចំនួន៥ក្រុមរួមមាន ក្រុមអង្គការផ្កាយសមុទ្រ, កង្រីរាជសីហ៍មានរិទ្ធ, អង្គការកម្មវិធីសលត៍, អង្គការមូលនិធិកុមារកម្ពុជា និងក្រុមលោកយាយម៉ៅពេជ្រនិល និងពូលB មាន៤ក្រុម គឺក្រុមសមាគមកីឡាបាល់ទាត់សៀមរាបអង្គរ, សមាគមកីឡាបាល់ទាត់ខេត្តកណ្តាល, ភ្នំពេញក្រោន និងមន្ទីរអប់រំ យុវជន និងកីឡា ខេត្តស្វាយរៀង ។
នៅរសៀលថ្ងៃទី១ កញ្ញា ជាការប្រកួតនៅក្នុងពូលB រវាងក្រុមសមាគមកីឡាបាល់ទាត់សៀមរាបអង្គរ ប្រកួតជាមួយក្រុមសមាគមកីឡាបាល់ទាត់ខេត្តកណ្តាល និងមួយប្រកួតទៀតក្រុមភ្នំពេញក្រោនជួបប្រកួតជាមួយក្រុមមន្ទីរអប់រំ យុវជន និងកីឡាខេត្តស្វាយរៀង។ ចាំមើល តើក្រុមបាល់ទាត់ស្ត្រីមួយណាដែលនឹងក្លាយជាក្រុមជើងឯករដូវកាល២០១៤ នេះ ?
ចែករំលែកព័តមាននេះ