លទ្ធផលរបស់ក្រុមអ្នកស្រាវជ្រាវពីរប្រទេសរួមគ្នាគឺដាណឺម៉ាកនិងអាមេរិកបានបង្ហាញថាការមើលទូរទស្សន៍ត្រឹមតែជាង២ម៉ោងក្នុង១ថ្ងៃអាចនាំទៅរកសេចក្តីស្លាប់ឆាប់រហ័ស ។ ការពិសោធលើមនុស្ស២៣ម៉ឺននិង៥ពាន់នាក់បានរកឃើញថា រៀងរាល់២ម៉ោងនៃការមើលទូរទស្សន៍ប្រចាំថ្ងៃគឺបណ្តាលឱ្យបុគ្គលប្រឈមនឹងអត្រាកើតជំងឺទឹកនោមផ្អែមប្រភេទ២ដល់២០ភាគរយខណៈអត្រាប្រឈមនឹងជំងឺបេះដូង មានគឺ១៥ភាគរយ ។ ឯអត្រាប្រឈមនឹងការស្លាប់ដោយមូលហេតុផ្សេងៗទៀតគឺមាន ១៣ភាគរយ ។
វេជ្ជបណ្ឌិត Anders Grontved មកពីសាកលវិទ្យាល័យ University of Southernប្រទេសដាណឺម៉ាកនិងវេជ្ជបណ្ឌិត Frank Huមកពីសាកលវិទ្យាល័យហាវើដ សហរដ្ឋអាមេរិកបាននិយាយថា កង្វះខាតការធ្វើលំហាត់ប្រាណគួបផ្សំនឹងការទទួលទានអាហារដែលគ្មានប្រយោជន៍ដល់រាងកាយអំឡុងមើលទូរទស្សន៍សុទ្ធតែជាកត្តាប្រឈមយ៉ាងធ្ងន់ធ្ងរ ។
ទោះជាយ៉ាងនេះក្តី តាមលោកវេជ្ជបណ្ឌិតMaureen Talbot មកពីមូលនិធិជំងឺបេះដូងអង់គ្លេសបាននិយាយថា ការសិក្សាលើកនេះមិនទាន់មានភស្តុតាងជាក់ច្បាស់ ដែលថាមើលទូរទស្សន៍អាចបង្កើនឱកាសកើតជំងឺទឹកនោមផ្អែមប្រភេទ២ឬក៏ជំងឺបេះដូងនោះទេ ។ លោកបានបន្តថា៖ «ខ្ញុំជឿជាក់ថា ពួកយើងនឹងបាត់បង់ពេលល្ងាចដ៏សែនមនោរម្យសម្រាកលើសាឡុងនៅមុខទូរទស្សន៍ ញ៉ាំអាហារនិងផឹកស្រា ។ ប៉ុន្តែរឿងសំខាន់នោះគឺយើងមិនត្រូវឱ្យរឿងទាំងនេះក្លាយជាសកម្មភាពទៀងទាត់រាល់ថ្ងៃនោះទេ ។
យើងគួរតែចេះជ្រើសរើសយកចំនួនពេលវេលាប៉ុន្មានដែលយើងចំណាយលើការមើលទូរទស្សន៍ ហើយព្យាយាមធ្វើឱ្យរាងកាយមានសកម្មភាពជាប់ជានិច្ច ។ យើងត្រូវការធ្វើឱ្យរាងកាយមានសកម្មភាពយ៉ាងហោចណាស់៣០នាទីយ៉ាង ៥ថ្ងៃក្នុង១សប្តាហ៍ ទើបធ្វើឱ្យបេះដូងមានសុខភាពល្អ» ។
ដោយឡែក ក្រុមអ្នកស្រាវជ្រាវរបស់ប្រទេសហូឡង់វិញបានរកឃើញថា ការមើលទូរទស្សន៍រាល់យប់អាចបណ្តាលឱ្យរឹងសរសៃឈាមក្រហម ហើយដែលនេះគឺជាសញ្ញានៃជំងឺបេះដូងទៅថ្ងៃខាងមុខ ។ ការពិសោធលើបុរស-ស្ត្រីវ័យពី៣២ដល់៣៦ឆ្នាំប្រមាណ ៣៧៣នាក់បានបង្ហាញថា អ្នកដែលចំណាយពេលជាង២០នាទីមើលទូរទស្សន៍រាល់យប់ ធ្វើឱ្យសរសៃចែកចាយឈាមសំខាន់ទៅកាន់ក្បាលនិងកមានសភាពរឹងខ្លាំង ៕
ចែករំលែកព័តមាននេះ