មិនទាន់ខកពេលនៅឡើយសម្រាប់បណ្តាបុគ្គលដែលចង់បញ្ចុះទម្ងន់ដើម្បីកែលំអសុខភាពរបស់ខ្លួន ។ ការសិក្សាស្រាវជ្រាវថ្មីចុងក្រោយមួយធ្វើឡើងដោយអ្នកវិទ្យាសាស្ត្រសាកលវិទ្យាល័យ City University បានរកឃើញថា ការធាត់លើសទម្ងន់ក្នុងវ័យចន្លោះពី២០ទៅ២៩ឆ្នាំ អាចបណ្តាលឱ្យមានបញ្ហាសុខភាពច្រើនយ៉ាងពេលក្រោយក្នុងជីវិត ។ ទម្ងន់ខ្លួនបច្ចុប្បន្នរបស់បុគ្គលម្នាក់ដោយមិនគិតពីរយៈពេលដែលគេចាប់ឡើងសាច់ធាត់ខ្លាំងគឺជាប់ពាក់ព័ន្ធនឹងការបង្កើនហានិភ័យកើតមានជំងឺបេះដូង និងទឹកនោមផ្អែមប្រភេទ-២ ។
ក្រុមអ្នកស្រាវជ្រាវបាននិយាយថា ការរកឃើញរបស់ពួកគេលើកនេះបានបង្ហាញជាភស្តុតាងដែលថា ការបញ្ចុះទម្ងន់ខ្លួនកុំឱ្យធាត់ខ្លាំងពេកនៅដំណាក់កាលណាមួយក៏ដោយគឺសុទ្ធតែអាចជួយកាត់បន្ថយហានិភ័យសុខភាពនានាដោយមិនគិតពីរយៈពេលដែលបុគ្គលនោះធាត់ឡើយ ។
Jennifer Dowd សមាជិកក្រុមអ្នកស្រាវជ្រាវបានថ្លែងថា ៖«ការរកឃើញពេលនេះបានបង្ហាញថា ហានិភ័យជីវសាស្ត្រនៃការធាត់លើសទម្ងន់រយៈពេលវែង ជាបឋមគឺអាស្រ័យទៅលើហានិភ័យនៃការធាត់លើសទម្ងន់កាន់តែខ្លាំងពេលក្រោយក្នុងជីវិតក្នុងចំណោមអ្នកដែលចាប់ធាត់លើសទម្ងន់នៅវ័យក្មេង ។ យ៉ាងណាក៏ដោយ រយៈពេលនៃភាពធាត់នេះនៅតែជាភាពស្មុគស្មាញនៃការស្លាប់ ។ ដូច្នេះ ការទប់ស្កាត់ការឡើងទម្ងន់នៅគ្រប់វ័យ វាគួរជាកិច្ចការអាទិភាពសម្រាប់សុខភាពសាធារណៈ »៕
ចែករំលែកព័តមាននេះ