ប្រភពព័ត៌មានយោធារាយការណ៍កាលពីថ្ងៃទី៣០ សីហាថា កងកម្លាំងសន្តិសុខអុីរ៉ាក់វាយយកបានវិញនូវទីក្រុង២ ដែលត្រួតត្រាដោយពួកយុទ្ធជនក្រុមរដ្ឋអ៊ិស្លាមក្នុងខេត្តឌីយ៉ាឡា និងខេត្តសាឡាហ៊ូឌីន ។
មេបញ្ជាការកងទ័ពអីុរ៉ាក់ ឧត្តមសេនីយ៍ ABDUL AMIR AL ZAIYDI ថ្លែងទៅកាន់ក្រុមអ្នកកាសែតថា ក្នុងខេត្តសាឡាហ៊ូឌីន ចាប់តាំងពីថ្ងៃទី២៩ សីហាមក កងកម្លាំងសន្តិសុខ ដោយមានការជួយទ្រទ្រង់របស់ពួកជីវពលស៊ីអីុតជាច្រើនពាន់នាក់បានប្រយុទ្ធតតាំងជាមួយពួកយុទ្ធជនរដ្ឋអ៊ិស្លាមជុំវិញទីក្រុងអាម័រលី ដែលឡោមព័ទ្ធដោយក្រុមរដ្ឋអ៊ិស្លាម ស្ថិតនៅចម្ងាយប្រមាណជា៩០គីឡូម៉ែត្រខាងកើតទីក្រុងទីគ្រីត ទីប្រជុំជនខេត្ត ។
យោងតាមមេបញ្ជាការរូបនោះថា ក្រោយការប៉ះទង្គិចគ្នាយ៉ាងសាហាវមក កងទ័ពដណ្តើមយកបានតំបន់ជាច្រើនស្ថិតនៅជុំវិញបណ្តាទីតាំងរបស់ពួករដ្ឋអ៊ិស្លាមដែលឡោមព័ទ្ធទីក្រុងអាម័រលីរយៈពេលជាង២ខែមកហើយ ។ ពួករដ្ឋអ៊ិស្លាមយ៉ាងតិច៣០នាក់បានត្រូវស្លាប់ក្នុងការប្រយុទ្ធគ្នាកាលពីយប់ថ្ងៃទី៣០ សីហា។ កងទ័ពពេលនេះកំពុងតែបំបែកការឡោមព័ទ្ធក្រុងអាម័រលី ហើយបើកផ្លូវថ្នល់ទាំងឡាយដើម្បីរំដោះប្រជាជនដែលបានប្រយុទ្ធដើម្បីការពារទីក្រុងរបស់គេ ទោះបីត្រូវដាច់ស្បៀងនិងទឹករយៈពេលជាង២ខែមកហើយក្តី ។
ក្នុងខេត្តឌីយ៉ាឡាភាគខាងកើតអីុរ៉ាក់ កងទ័ពជាមួយការជួយអន្តរាគមន៍របស់ពួកជីវពលស៊ីអុីត ក្នុងការវាយលុកថ្មីមួយអាចវាយរំដោះតំបន់ INJANAH ចម្ងាយ៧០គីឡូម៉ែត្រខាងជើងទីក្រុងបាគូបា ទីប្រជុំជនខេត្ត ។ ក្រោយការប្រយុទ្ធគ្នាយ៉ាងស្វិតស្វាញអស់រយៈពេល៧ម៉ោងមក កងទ័ពបានសម្លាប់ពួករដ្ឋអ៊ិស្លាមជាង៣០នាក់ហើយកម្ទេចរថយន្តជាច្រើនគ្រឿងរបស់ពួកគេ ។
កងទ័ព និងពួកជីវពលស៊ីអីុត ក៏ដណ្តើមយកបានភូមិ៩ នៅជុំវិញទីក្រុង INJANAH ដែលអាចឱ្យកងកម្លាំងសន្តិសុខត្រួតត្រាផ្នែកខាងជើងនៃខេត្ត ដែលមុននេះត្រួតត្រាដោយពួករដ្ឋអ៊ិស្លាម ៕
ចែករំលែកព័តមាននេះ