រាជធានីភ្នំពេញ ៖ ការប្រកួតកីឡាសូរីនហ្ស៊ីកាំប៉ូជ្រើសរើសជើងឯកថ្នាក់ជាតិលើកទី២ប្រចាំឆ្នាំ២០១៤ ដែលជាកម្មវិធីប្រកួតប្រចាំឆ្នាំរបស់ក្រសួងអប់រំ យុវជននិងកីឡា បានបញ្ចប់ហើយកាលពីរសៀលថ្ងៃទី៣០ សីហា ។ ពិធីបិទការប្រកួតត្រូវបានគេរៀបចំធ្វើនៅសាលដំបូលទូកថ្មីនៃពហុកីឡដ្ឋានជាតិ ក្រោមអធិបតីភាពលោកបណ្ឌិត ហង់ ជួនណារ៉ុន រដ្ឋមន្ដ្រីក្រសួងអប់រំ យុវជននិងកីឡា ។
ការប្រកួតសម្រាប់ឆ្នាំ២០១៤នេះមានក្លិបនិងសមាគមចូលរួមចំនួន៥ដូចជា ក្លិបម៉ុងឌីយ៉ាល់ ,ក្លិបដឺប្លេស ,ក្លិបស្មាធឃីដ ,ក្លិបជម្រើសជាតិ និងក្លិបយុវជន និងមានកីឡាករ-កីឡាការិនី ចូលរួមសរុបចំនួន៩៥នាក់ ។
ចំពោះលទ្ធផលលើវិញ្ញាសាកាតាឯកត្ដជនផ្នែកនារីក្របខ័ណ្ឌក២ ចំណាត់ថ្នាក់លេខ១ បានទៅលើកីឡាការិនី ញ៉ែម សុផលមុនី មកពីក្លិបយុវជន ឯផ្នែកបុរសចំណាត់ថ្នាក់លេខ១ បានទៅកីឡាករ ចាន់ យ៉ុនជៀន មកពីក្លិបយុវជន ។
វិញ្ញាសាកាតាឯកត្ដជនក្របខ័ណ្ឌក១ ផ្នែកនារីចំណាត់ថ្នាក់លេខ១ បានទៅកីឡាការិនី សុវណ្ណ រចនា មកពីក្លិបយុវជន និងផ្នែកបុរសចំណាត់ថ្នាក់លេខ១ បានទៅកីឡាករ សុវណ្ណ គិរី មកពីក្លិបជម្រើសជាតិ ។
វិញ្ញាសាកាតាគូផ្នែកនារី ចំណាត់ថ្នាក់ពីលេខ១ដល់លេខ៣ សុទ្ធតែបានទៅលើក្លិបយុវជនទាំងអស់ ឯផ្នែកបុរសចំណាត់ថ្នាក់លេខ១ បានទៅលើក្លិបជម្រើសជាតិ ,លេខ២ បានទៅក្លិបម៉ុងឌីយ៉ាល់ និងលេខ៣ បានទៅក្លិបយុវជន ។
វិញ្ញាសាប្រយុទ្ធឯកត្ដជនផ្នែកនារីទម្ងន់៥៣គីឡូក្រាមឡើង លេខ១បានទៅលើកីឡាការិនីសុវណ្ណ រចនា មកពីក្លិបយុវជន ។
វិញ្ញាសាឯកត្ដជនផ្នែកបុរសក្របខ័ណ្ឌក១ ទម្ងន់ក្រោម៦០គីឡូក្រាម លេខ១បានទៅកីឡាករ ឌុន សម្ផស្ប មកពីក្លិបម៉ុងឌីយ៉ាល់ និងទម្ងន់៦៥គីឡូក្រាមឡើងទៅលេខ១បានទៅកីឡាករ គិត ហុងឆេង មកពីក្លិបជម្រើសជាតិ ។
វិញ្ញាសាឯកត្ដជនផ្នែកបុរសក្របខ័ណ្ឌក២ទម្ងន់ក្រោម៥០គីឡូក្រាមលេខ១បានទៅកីឡាករ ជរ សំណាង ខៃស៊ិន មកពីក្លិបជម្រើសជាតិ និងទម្ងន់៥០គីឡូក្រាមឡើងទៅលេខ១បានទៅកីឡាករ ចាន់ យ៉ុងជៀន មកពីក្លិបយុវជន ។
មានប្រសាសន៍ក្នុងឱកាសនោះ លោកបណ្ឌិត ហង់ ជួនណារ៉ុន បានរៀបរាប់ពីប្រវត្ដិនៃកីឡាសូរីនហ្សុិកាំប៉ូ តាមការចងចាំរបស់លោកថាបានចាប់កំណើតឡើងនៅប្រទេសជប៉ុន ដោយសង្ឃមួយអង្គបានទៅសិក្សារៀនសូត្រនៅវិហារសាវលីង ប្រទេសចិន ។ ពេលត្រឡប់មកប្រទេសកំណើតវិញព្រះអង្គបានចងក្រងជាក្បាច់គុននេះឡើង និងបានផ្សព្វផ្សាយដល់បណ្ដាប្រទេសមួយចំនួនក្នុងទ្វីបអាស៊ី និងពិភពលោក បូករួមទាំងកម្ពុជាផងដែរគឺបានចូលមកនៅឆ្នាំ២០១១ ។ លោកបន្ដថា ថ្វីដ្បិតតែកីឡានេះជាប្រភេទកីឡាថ្មីក៏ពិតមែន ប៉ុន្ដែបានធ្វើឱ្យកម្ពុជាមានកិត្ដិយសលើឆាកអន្ដរជាតិក្នុងការប្រកួតកីឡាស៊ីហ្គេមកន្លងមក គឺទទួលបានមេដាយមាស ប្រាក់ និងសំរឹទ្ធជាច្រើនផងដែរ ។
លោករដ្ឋមន្ដ្រីបានបន្ដទៀតថា លទ្ធផលរបស់កីឡាករ-កីឡាការិនីដែលទទួលជ័យលាភីនាពេលនេះពិតជាបានមកពីការខិតខំហ្វឹកហាត់ជាប្រចាំ មានការតស៊ូព្យាយាម គោរពវិន័យបានល្អ យកចិត្ដទុកដាក់ស្ដាប់ការពន្យល់ និងការបង្ហាត់បង្រៀនរបស់គ្រូបង្វឹក ។ ដូច្នេះដើម្បីឱ្យកីឡានេះក្លាយជាកីឡាមួយប្រភេទដ៏មានសក្ដានុពល សហព័ន្ធត្រូវធ្វើយ៉ាងណាបណ្ដុះបណ្ដាលគ្រូបង្វឹក អាជ្ញាកណ្ដាល និងកីឡាករ-កីឡាការិនីឱ្យបានច្រើន និងមានទេពកោសល្យសមត្ថភាពពិតប្រាកដ ដើម្បីអាចដណ្ដើមយកមេដាយឱ្យបានច្រើននៅពេលដែលកម្ពុជាធ្វើជាម្ចាស់ផ្ទះក្នុងការប្រកួតកីឡាស៊ីហ្គេមនាឆ្នាំ២០២៣ ខាងមុខ៕
ចែករំលែកព័តមាននេះ