សារព័ត៌មានក្នុងស្រុករបស់អាល់ហ្សេរី រាយការណ៍ថា យន្តហោះកាហ្គោ១គ្រឿងរបស់អ៊ុយក្រែនបានធ្លាក់កាលពីថ្ងៃទី៣០ សីហា វេលាម៉ោង១និង៤០នាទីម៉ោងសកល នៅខេត្តតាម៉ាន់ រ៉ាសេត ចុងខាងត្បូងប្រទេសអាល់ហ្សេរី ដោយពួកអ្នកជួយសង្គ្រោះពុំបានរកឃើញអ្នកនៅរស់រានមានជីវិតម្នាក់ណាឡើយ។
ដោយដកស្រង់សេចក្តីថ្លែងការណ៍មួយរបស់ក្រសួងដឹកជញ្ជូន ទូរទស្សន៍រដ្ឋអាល់ហ្សេរីរៀបរាប់ថា យន្តហោះធុន Antonov-12 ដែលមានមនុស្សជិះក្នុងនោះ៧នាក់ ក្នុងនោះមានបណ្តាសមាជិកក្រុមយានិកបានធ្លាក់ក្នុងតំបន់ភ្នំមួយ ចម្ងាយ១៥គីឡូម៉ែត្រខាងត្បូងព្រលានយន្តហោះខេត្តតាម៉ាន់រ៉ាសេត ជាកន្លែងដែលយន្តហោះនោះឈប់សំចត ។
តាមសេចក្តីថ្លែងការណ៍នោះថា ការទាក់ទងជាមួយយន្តហោះបានបាត់៣នាទី ក្រោយពីវាហោះចេញពីព្រលានយន្តហោះតាម៉ាន់រ៉ាសេត ។ ពួកអ្នកជួយសង្គ្រោះ ត្រូវបានបញ្ជូនភ្លាមៗទៅកាន់កន្លែងយន្តហោះធ្លាក់ ហើយពុំរកឃើញអ្នកនៅរស់ណាម្នាក់ឡើយ ។
យន្តហោះជារបស់ក្រុមហ៊ុនអាកាសចរណ៍អ៊ុយក្រែន Ukraine Alliance ដឹកគ្រឿងឧបករណ៍ឧស្សាហកម្ម ខាងផ្នែកថាមពល ៕
ចែករំលែកព័តមាននេះ