រាជធានីភ្នំពេញ ៖ នាព្រឹកថ្ងៃទី30 ខែសីហា ឆ្នាំ2014នេះ សាលាខណ្ឌច្បារអំពៅ បានបើកកម្មវិធីប្រកាសសមាសភាពក្រុមការងារថ្នាក់ជាតិក្នុងមូលដ្ឋានរបស់ខ្លួន ក្នុងគោលបំណងដើម្បីត្រួតពិនិត្រ នយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ក្រោមអធិបតីភាពលោក អ៊ុជ គឹមអន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារថ្នាក់ជាតិ ព្រមទាំងគណៈអភិបាលខណ្ឌច្បារអំពៅ និងមានការចូលរួមពីសំណាក់មន្រ្តីសាលាខណ្ឌជាច្រើនទៀតផងដែរ។ ក្នុងឱកាសខាងលើនេះដែរលោក អ៊ាង ស៊ីផាន បានថ្លែងអំណរគុណយ៉ាងជ្រាលជ្រៅជូនចំពោះគណៈអធិបតីដែលបានចំណាយពេលវេលាដ៏មានតម្លៃចូលរួមផ្តល់អនុសាសន៍ល្អដល់មន្ត្រីសាលាខណ្ឌការងារចំពោះមុខ ។
ក្នុងនោះដែរលោកអភិបាលខណ្ឌជំនួសមុខឲ្យមន្ត្រីក្រោមឱវាទទាំងអស់បេ្តជ្ញារក្សាសន្តិសុខសណ្តាប់ជូនបងប្អូនប្រជាពលរដ្ឋ ឲ្យស្របទៅតាមគោលនយោបាយ ភូមិឃុំមានសុវត្ថិភាព និងជាចំណែកមួយក្នុងការរក្សាសន្តិសុខសណ្តាប់ធ្នាប់ក្នុងប្រទេស ។ លោក អ៊ុជ គឹមអន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារថ្នាក់ជាតិ បានថ្លែងក្នុងពិធីខាងលើថា ដើម្បីគាំទ្រ និងរួមចំណែកជំរុញការអនុវត្តន៍កម្មវិធីនយោបាយ និងផែនការយុទ្ធសាស្ត្រអភិវឌ្ឍន៍ជាតិ គោលនយោបាយ និងកម្មវិធីនានារបស់រាជរដ្ឋាភិបាលសម្រាប់នីតិកាលទី៥នៃរដ្ឋសភា រាជរដ្ឋាភិបាលបានសម្រេចបង្កើតក្រុមការងារចុះបំពេញបេសកកម្មតាមមូលដ្ឋាន នយោបាយខាងលើនេះបានអនុវត្តប្រកបដោយប្រសិទ្ធភាពនៅគ្រប់មូលដ្ឋានទូទាំងប្រទេស។ លោកបានបន្តថា មន្ត្រីគ្រប់លំដាប់ថ្នាក់ ក្នុងពេលបំពេញការងារតាមបណ្តាសង្កាត់នានាក្នុងខណ្ឌច្បារអំពៅសហការសម្របសម្រួលក្នុងការដោះស្រាយបញ្ហានានាជូនបងប្អូនប្រជាពលរដ្ឋ នៅតាមមូលដ្ឋានក្នុងភូមិសាស្ត្ររបស់ខ្លួន។
ចែករំលែកព័តមាននេះ