ខេត្តបន្ទាយមានជ័យ ៖ បុរសម្នាក់ជាអ្នកបើកបររថយន្តតាក់ស៊ី បានបង្កគ្រោះថ្នាក់បណ្តាលឲ្យក្មេងប្រុសម្នាក់អាយុ១៥ឆ្នាំស្លាប់ ត្រូវបានកម្លាំងនគរបាលជំនាញចរាចរណ៍ផ្លូវគោកខេត្តបន្ទាយមានជ័យ បញ្ជូនទៅសាលាដំបូងខេត្តនៅព្រឹកថ្ងៃទី៣០ សីហា ដើម្បីចាត់ការតាមនិតិវិធីច្បាប់។
លោកវរសេនីយ៍ទោ សន គឺមសួគ៌ នាយការិយាល័យនគរបាលចរាចរណ៍ផ្លូវគោកខេត្តបន្ទាយមានជ័យ បានឲ្យដឹងថា បុរសជាអ្នកបើកបររថយន្តតាក់ស៊ី ត្រូវបានបញ្ជូនទៅសាលាដំបូងខេត្តឈ្មោះ ស៊ឹង លី ភេទប្រុសអាយុ២៩ឆ្នាំ នៅភូមិកូនដំរី សង្កាត់និមិត្ត ក្រុងប៉ោយប៉ែត បើករថយន្តម៉ាកកាមរី ពណ៌ខ្មៅ ពាក់ស្លាកលេខ ភ្នំពេញ 2A-9897 ។ កាលពីវេលាម៉ោង៧និង៤៥នាទីព្រឹកថ្ងៃទី២៨ សីហាឆ្នាំ២០១៤ អ្នកបើកបររថយន្តតាក់ស៊ីរូបនេះ បានបើករថយន្តបុកក្មេងប្រុសឈ្មោះ ឡៅ ផានិត អាយុ១៥ឆ្នាំ មានទីលំនៅក្រុងសិរីសោភ័ណ ខេត្តបន្ទាយមានជ័យ ខណៈទៅតាមឪពុកម្តាយទៅធ្វើការនៅទីនោះ ។ គ្រោះថ្នាក់ចរាចរណ៍ដែលបង្កឲ្យមានអ្នកស្លាប់នេះ បានកើតឡើងនៅលើកំណាត់ផ្លូវជាតិលេខ៥៩A ស្ថិតក្នុងភូមិបន្ទាយទី១ ឃុំទួលពង្រ ស្រុកម៉ាឡៃ ។
បើតាមការឲ្យដឹងពីលោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃ បានបញ្ជាក់តាមទូរស័ព្ទនាព្រឹកថ្ងៃទី៣០ សីហា ថា មូលហេតុដែលបង្កឲ្យមានគ្រោះថ្នាក់គឺបណ្តាលមកពីអ្នកបើកបររថយន្តតាក់ស៊ី បើកមានល្បឿនលឿន ចំណែកក្មេងរត់ឆ្លងផ្លូវ មិនបានមើលឧបសគ្គឆ្វេងស្តាំ៕
ចែករំលែកព័តមាននេះ