រាជធានីភ្នំពេញ ៖ ឆ្លើយតបនឹងបំណងប្រាថ្នារបស់រាស្ត្រក៏ដូចជាការបំពេញភារកិច្ចជាតំណាងរាស្ត្រក្នុងអាណត្តិរដ្ឋសភានីតិកាលទី៥ នាព្រឹកថ្ងៃទី៣០សីហា សមាជិកគណៈកម្មាធិការទី១នៃរដ្ឋសភាបានចុះជួបប្រជារាស្ត្រដែលមកពីខេត្តចំនួន៣កំពុងស្នាក់នៅក្នុងវត្តពោធិយារាមហៅវត្តចាស់ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា ប្តឹងទាមទារដីស្រែចម្ការរបស់ពួកគាត់ដែលត្រូវក្រុមឈ្មួញរំលោភយកដើម្បីដោះស្រាយជូនពួកគាត់។
សមាជិកសមាជិការគណៈកម្មាធិការទី១នៃរដ្ឋសភាដែលចុះជួបរាស្ត្រដែលជួបវិបត្តិដីធ្លីខាងលើនេះមានលោក ជា ប៉ូច និងលោក គង់ សភា បេក្ខជនតំណាងរាស្ត្រមកពីគណបក្សសង្គ្រោះជាតិនិងលោកជំទាវ ឡោក ខេង តំណាងរាស្ត្រគណបក្សប្រជាជនកម្ពុជា។ រីឯអាជ្ញាធរមូលដ្ឋានវិញគឺមានវត្តមានលោកហ៊ុយ សារុណ អភិបាលរងខណ្ឌជ្រោយចង្វា បានបង្ហាញវត្តមានចុះរៀបចំសណ្តាប់ធ្នាប់ក្នុងវត្តអារាមផងដែរ ដោយសាររដូវបុណ្យភ្ជំបិណ្ឌជិតចូលមកដល់។
សូមមបញ្ជាក់ថា ប្រជាពលរដ្ឋមកពីបីខេត្តខាងលើនេះស្នាក់នៅក្នុងវត្តពោធិយារាមតាំងពីថ្ងៃទី២៦សីហាមកម្លេះ ក្នុងនោះអ្នកខ្លះបានវិលត្រឡប់ទៅវិញបណ្តើរៗហើយ ដោយសារអាជ្ញាធរខេត្តមកទទួលយកទៅដោះស្រាយនៅឯខេត្ត។ ដោយឡែកអ្នកដែលនៅសេសសល់គឺត្រូវបានតំណាងរាស្ត្រទាំងបីរូបតម្រូវឲ្យចាត់តាំងតំណាងចូលទៅជួបនៅរដ្ឋសភាថ្ងៃច័ន្ទទី១ កញ្ញា ៕
ចែករំលែកព័តមាននេះ