រាជធានីភ្នំពេញ ៖ កម្មវិធីប្រកួតប្រដាល់របស់កំពូលអ្នកប្រយុទ្ធគុនខ្មែរនៅលើសង្វៀន CTN នាថ្ងៃអាទិត្យទី៣១ សីហា ស្អែកនេះ បានឈានចូលដល់សប្តាហ៍ទី៩ហើយ ។ កីឡាករដែលជាបេក្ខភាពត្រូវឡើងប្រកួតមានទាំងអស់៥គូ និង៣ប្រភេទទម្ងន់ ក្នុងនោះទម្ងន់៥៧គីឡូក្រាមមាន២គូ ទម្ងន់៦០គីឡូក្រាមមាន១គូ និងទម្ងន់៦៥គីឡូក្រាមមាន២គូ ។
ទម្ងន់៥៧គីឡូក្រាមមានកីឡាករ នឿន ប៊ុនធឿន មកពីក្លិបអេភូថងកីឡាជួបប្រកួតជាមួយកីឡាករ ម៉ុន រតនា មកពីក្លិបឃ្លាំងមឿងកីឡា និងកីឡាករ សេង កំសត់ មកពីក្លិបខេមរិន្ទមានឫទ្ធិ ជួបប្រកួតជាមួយកីឡាករ សឹុម ប៊ុនស្រ៊ុន មកពីក្លិបខេត្តកំពង់ចាម ។ នឿន ប៊ុនធឿន និងម៉ុន រតនា ប្រកួតបាន៣លើកដូចគ្នា ប៉ុន្តែលទ្ធផលមិនដូចគ្នាទេ ។ នឿន ប៊ុនធឿន ៣ប្រកួតកន្លងមកនេះអត់ដែលស្គាល់ឈ្នះម្តងណាឡើយ ចំណែក ម៉ុន រតនា ឈ្នះទាំង៣លើក លើកនេះនឿន ប៊ុនធឿន ទោះបីឈ្នះក៏គ្មានសង្ឃឹមថា បានឡើងទៅវគ្គបន្តទៀតដែរ ដោយសារ៣ប្រកួតកន្លងមកគេបរាជ័យរហូត ។
រីឯសេង កំសត់ ក៏ប្រកួតបាន៣លើកដែរ ប៉ុន្តែស្គាល់ឈ្នះតែម្តងគត់ ខណៈ សឹុម ប៊ុនស្រ៊ន់ ប្រកួតទើបតែបាន២លើក ក្នុងនោះឈ្នះ១លើកចាញ់១លើក ។ សឹុម ប៊ុនស្រ៊ន់ ប្រសិនជាចាញ់ការប្រកួតមួយលើកនេះទៀតនោះប្រហែលជាអស់ផ្លូវអ៊ុតហើយ ។ ទម្ងន់៦០គីឡូក្រាម កីឡាករ ថៃ ប៊ុនតត មកពីក្លិបនាគរាជគុនខ្មែរ ប្រកួតជាមួយកីឡាករ ច្រិច កុសល មកពីក្លិបក្រុងប៉ោយប៉ែត ។ ថៃ ប៊ុនតត ប្រកួតបាន៣លើក ឈ្នះទាំង៣លើក រីឯ ច្រិច កុសល ទើបតែប្រកួតបាន២លើក ក្នុងនោះឈ្នះ១លើកនិងចាញ់១លើក ។ គូនេះបើទោះជាមានប្រវត្តិប្រកួតមិនដូចគ្នាមែន ប៉ុន្តែឱកាសក្នុងការឡើងទៅប្រកួតនៅវគ្គបន្តនៅមានច្រើនដូចគ្នា ។
ទម្ងន់៦៥គីឡូក្រាម កីឡាករ រិន សារដ្ឋ មកពីក្លិបខេត្តព្រៃវែង ជួបប្រកួតជាមួយកីឡាករ រ៉ាក់ វិឆ័យ មកពីក្លិបកងពលតូចលេខ៧០ និងកីឡាករ ង៉ែត្រ ប៊ុនធឿន មកពីក្លិបខេត្តកំពង់ធំ ប្រកួតជាមួយកីឡាករ ភិន សុទី មកពីក្លិបខេត្តក្រចេះ ។ រិន សារដ្ឋ និងរា៉ក់ វិឆ័យ ប្រកួតបាន៣លើកដូចគ្នា ក្នុងនោះ រិន សារដ្ឋ ឈ្នះ២លើកចាញ់១លើក ឯរា៉ក់ វិឆ័យ ឈ្នះ២លើក និងចាញ់១លើក ។ ដូច្នេះគូនេះសុទ្ធតែនៅមានឱកាសច្រើនក្នុងការស្វែងរកកៅអីឡើងទៅប្រកួតនៅវគ្គបន្ត ។ ចំណែក ង៉ែត្រ ប៊ុនធឿន ប្រកួតបាន៣លើក ឈ្នះ២លើកចាញ់១លើក រីឯ ភិន សុទី ប្រកួតបាន៤លើក ស្គាល់ឈ្នះតែមួយលើកគត់។ ដូច្នេះ ង៉ែត្រ ប៊ុនធឿន នៅមានសង្ឃឹមច្រើនក្នុងការឡើងទៅប្រកួតនៅវគ្គបន្ត ចំណែក ភិន សុទី ពិបាកសង្ឃឹមខ្លាំងណាស់ ជាពិសេសប្រសិនជាគេចាញ់ការប្រកួតលើកនេះម្តងទៀតនោះ ៕
ចែករំលែកព័តមាននេះ