ខេត្តស្ទឹងត្រែង ៖ អាជីវករប្រមាណជិត២០០នាក់កាលពីព្រឹកថ្ងៃទី២៩ សីហា ២០១៤បានលើកគ្នាឆ្ពោះទៅទីលានក្រហមទល់មុខសាលាខេត្តធ្វើការតវ៉ាជំទាស់ទៅនឹងការរុះរើផ្សារបន្លែដែលមានទីតាំងបណ្តោះអាសន្ន ស្ថិតលើសួនច្បារទល់មុខផ្សារថ្មីស្ទឹងត្រែង។
ការផ្ទុះឡើងរហូតឈានដល់ការលើកគ្នារាប់រយនាក់ទៅធ្វើការតវ៉ានោះបានធ្វើឲ្យអាជ្ញាធរខេត្តប្រឈមនឹងបញ្ហាស្មុគស្មាញក្រោយពីអាជ្ញាធរខេត្ត និងអាជ្ញាធរក្រុងបានចេញសេចក្តីប្រកាសមួយឲ្យអាជីវករដែលកំពុងប្រកបរបរអាជីកម្មលើផ្សារសួនច្បារបណ្តោះអាសន្នត្រូវរុះរើឲ្យទាន់មុនថ្ងៃទៅ៤ដល់៦ ខែកញ្ញាខាងមុខ ដើម្បីផ្លាស់ប្តូរទៅលក់នៅលើទីតាំងថ្មីដែលបានរៀបចំរួចជាស្រេចស្ថិតនៅក្នុងសង្កាត់ស្រះឬស្សីដែលឆ្ងាយពីផ្សារធំជាង៣គឺឡូម៉ែត្រ។
តំណាងអាជីវករម្នាក់ក្នុងចំណោមអាជីវករ១៨៧នាក់បានលើកឡើងថា ពួកគាត់លើកគ្នាមកនេះដើម្បីធ្វើការតវ៉ា និងទទូចសុំឲ្យអាជ្ញាធរខេត្តជួយរកដំណោះស្រាយសមស្របមួយដើម្បីឲ្យពួកគាត់មានទីតាំងលក់បានសមរម្យ ហើយបើផ្លាស់ប្តូរទៅទីតាំងថ្មីនោះ គឺពួកគាត់មានការលំបាកខ្លាំងដោយសារតែទីតាំងដែលកំណត់ឲ្យទៅលក់ដូរ គឺឆ្ងាយពីក្រុងពេក ហើយអ្នកភូមិដែលនាំយកផល អនុផលផ្សេងៗធ្វើដំណើរតាមទូកមកបោះទំនិញចូលទីផ្សារក៏មានការលំបាកដោយត្រូវធ្វើដំណើរមកតាមទូក ហើយត្រូវចំណាយពេលបន្តជិះម៉ូតូទៅផ្សារថ្មីនោះទៀត ដូច្នេះការប្រកបរបររបស់ពួកគាត់ត្រូវខាត់បង់ច្រើន ហេតុនេះហើយអាជីវករលក់ដូរនៅផ្សារសួនច្បារនឹងប្រឆាំងតវ៉ាមិនចេញពីទីតាំងចាស់នោះឡើយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ