រាជធានីភ្នំពេញ ៖ ជនសង្ស័យជាសន្តិសុខក្លឹបស៊ីធីស្ទឹងមានជ័យដែលជាប់ពាក់ព័ន្ធនឹងករណីព្រួតគ្នាវាយ និងបាញ់ទៅលើយុវជនម្នាក់បណ្តាលឲ្យស្លាប់បាត់បង់ជីវិតនៅកន្លែងកើតហេតុត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារបណ្តោះអាសន្ន កាលពីថ្ងៃទី២៩ សីហា ២០១៤ ដើម្បីទុកពេលស៊ើបអង្កេតរកជនដៃដល់ និងបក្សពួក៤នាក់ទៀតកំពុងគេចខ្លួន។
សន្តិសុខរូបនេះឈ្មោះយុន វណ្ណៈ អាយុ៣៥ឆ្នាំ ស្នាក់នៅផ្ទះជួលផ្លូវលំ សង្កាត់ស្ទឹងមានជ័យ ខណ្ឌមានជ័យ ត្រូវចោទប្រកាន់ពីបទសមគំនិតក្នុងអំពើឃាតកម្ម យោងតាមមាត្រា២៩ និង១៩៩នៃក្រមព្រហ្មទណ្ឌ ។ ជនសង្ស័យត្រូវបានសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញឃាត់ខ្លួនកាលពីរសៀលថ្ងៃទី២៥ សីហា និងបញ្ជូនទៅសាលាដំបូងនៅថ្ងៃទី២៩ សីហា ២០១៤នេះ ។
ជនរងគ្រោះក្នុងអំពើបាញ់ប្រហារបណ្តាលឲ្យស្លាប់នៅកន្លែងកើតហេតុនោះឈ្មោះកង សុជាតិ អាយុ២៤ឆ្នាំមុខរបរមិនពិតប្រាកដ ។ គួរបញ្ជាក់ថា នៅយប់ថ្ងៃទី២៤ឈានចូល២៥ សីហា ជាថ្ងៃកើតហេតុជនរងគ្រោះបានអង្គុយលេងបៀរជាមួយបងប្អូននៅសង្កាត់ស្ទឹងមានជ័យ ក៏មានក្មេងស្ទាវមួយក្រុមដេញវាយគ្នា ហើយជនរងគ្រោះបានយកដំបងឈើជ្រុងជួយវាយគេដែរ។ ពេលនោះស្រាប់តែមានមនុស្ស២នាក់ជិះរថយន្តមួយគ្រឿងម៉ាកឡង់គ្រីស្ស័រ និងមនុស្ស៤នាក់ផ្សេងទៀតជិះម៉ូតូម្នាក់១គ្រឿង ដេញបុកជនរងគ្រោះ ហើយអ្នកអង្គុយក្នុងរថយន្តបានដកកាំភ្លើងខ្លីមិនស្គាល់ម៉ាកបាញ់ចំនួន២គ្រាប់ត្រូវក្បាលជនរងគ្រោះមួយគ្រាប់បណ្តាលឲ្យស្លាប់ភ្លាមៗនៅកន្លែងកើតហេតុ រួចមនុស្ស១ក្រុមនោះបានគេចខ្លួនបាត់អស់។
ក្រោយហេតុការណ៍កើតឡើង សមត្ថកិច្ចបានចុះត្រួតពិនិត្យកន្លែងកើតហេតុ ដោយរកឃើញដាវដងជ័រចំនួន១ និងស្នាប់ដៃ ដែកចំនួន១ ក្នុងនោះសមត្ថកិច្ចបានអញ្ជើញសាក្សីមួយចំនួនទៅសាកសួរ ដោយបានយករូបថតជនសង្ស័យជាច្រើនសន្លឹកមកបង្ហាញដើម្បីកំណត់មុខសញ្ញាផងដែរ ៕
ចែករំលែកព័តមាននេះ