នាយករដ្ឋមន្ត្រីនៃសាធារណរដ្ឋស្វ័យប្រកាសដូណេតស្ក៍ លោកអាឡិចសានដ្រ៍ ហ្សាខាតឆេនកូ ថ្លែងកាលពីថ្ងៃទី២៩ សីហា ថា ពួកបំបែកខ្លួននិយមស្និទ្ធរុស្ស៊ី ត្រៀមបើកច្រកមនុស្សធម៌មួយសម្រាប់ពួកទាហានអ៊ុយក្រែន អាចចេញពីកន្លែងឡោមព័ទ្ធ ។ ការអះអាងរបស់ពួកឧទ្ទាមធ្វើឡើងប៉ុន្មានម៉ោងប៉ុណ្ណោះ ក្រោយសំណើមួយរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ។
លោក ហ្សាខាត ឆេនកូន បន្តថា ជាបឋមកងទាហានអ៊ុយក្រែន ត្រូវបោះបង់ចោលបណ្តារថពាសដែក និងរថក្រោះ ព្រមទាំងអាវុធនិងគ្រាប់រំសេវ មុនពេលចាកចេញតាមច្រកមនុស្សធម៌នោះ ។ ក្នុងសេចក្តីប្រកាសព័ត៌មានមួយ លោកពូទីន បានអំពាវនាវដល់ពួកឧទ្ទាមឱ្យបើកច្រកមនុស្សធម៌ទាំងនេះ ដើម្បីចៀសវាងកុំឱ្យមានជនរងគ្រោះដោយឥតប្រយោជន៍ និងដើម្បីផ្តល់ឱកាសឱ្យពួកទាហានដែលជាប់ការឡោមព័ទ្ធដកខ្លួនចេញពីតំបន់ប្រតិបត្តិការរបស់ពួកគេ ។
លោកបន្តទៀតថា ទាហានអ៊ុយក្រែនទាំងនោះត្រូវឡោមព័ទ្ធជាប់ ក្រោយពីជ័យជម្នះដ៏ធំធេងរបស់ពួកបំបែកខ្លួននិយមប្រឆាំងប្រតិបត្តិការយោធារបស់ក្រុងគៀវ ។ លោកអំពាវនាវដល់ទីក្រុងគៀវឱ្យបញ្ឈប់ការប្រយុទ្ធ ហើយបង្កើតបទឈប់បាញ់គ្នាមួយ រួចហើយចរចាជាមួយបណ្តាតំណាងនៃតំបន់ Donbass ។លោក ពូទីន ក៏ស្នើផងដែរដល់ពួកបំបែកខ្លួននិយមស្និទ្ធរុស្ស៊ី ផ្តល់ជំនួយខាងពេទ្យ ដល់បណ្តាទាហានអ៊ុយក្រែនត្រូវរបួស ។ លោកអះអាងថា រុស្ស៊ីត្រៀមហើយ នឹងផ្តល់ជំនួយមនុស្សធម៌ដល់ប្រជាជននៅ Donbass ។
អន្តរាគមន៍ថ្មីនោះរបស់លោក ពូទីន លើបញ្ហាអ៊ុយក្រែន ធ្វើឡើងខណៈដែលសហរដ្ឋអាមេរិក និងពួកសម្ព័ន្ធមិត្តគំរាមកាលពីថ្ងៃទី២៨ សីហា ដាក់ទណ្ឌកម្មថ្មីប្រឆាំងក្រុងមូស្គូ ដោយសារការលុកលុយរបស់កងទាហានរុស្ស៊ីចូលដែនដីអ៊ុយក្រែន ជួយពួកបំបែកខ្លួននិយម ។ យោងតាមអ្នកទទួលខុសត្រូវជាន់ខ្ពស់ម្នាក់របស់អូតង់ថា ទាហានរុស្ស៊ីជាង១ពាន់នាក់ បច្ចុប្បន្នកំពុងតែប្រយុទ្ធជាមួយកងទ័ពអ៊ុយក្រែន ពិសេសនៅជិតទីក្រុងយុទ្ធសាស្ត្រ Novoazovsk ដើម្បីជួយដល់ការវាយបកវិញរបស់ពួកឧទ្ទាម ។
ប្រធានាធិបតីអាមេរិក លោកបារ៉ាក់ អូបាម៉ា អះអាងថា ច្បាស់ណាស់នៅចំពោះមុខភ្នែករបស់ពិភពលោកទាំងមូល ដែលកងទ័ពរុស្ស៊ីស្ថិតនៅក្នុងប្រទេសអ៊ុយក្រែន ។ ពួកបំបែកខ្លួននិយម ត្រូវបានរុស្ស៊ីជួយផ្តល់ហិរញ្ញវត្ថុ និងជួយបណ្តុះបណ្តាល ។ ទោះបីជាលោកអះអាងថា សហរដ្ឋអាមេរិកនឹងមិនប្រើកម្លាំងដើម្បីដោះស្រាយបញ្ហាអ៊ុយក្រែន តែលោកវាយតម្លៃថា ការលុកលុយរបស់រុស្ស៊ីនាពេលបច្ចុប្បន្ននៅអ៊ុយក្រែន គ្រាន់តែនាំឱ្យមានការដាក់ទណ្ឌកម្មបន្ថែមទៀតប្រឆាំងរុស្ស៊ីប៉ុណ្ណោះ ។ លោកគូសបញ្ជាក់ថា រុស្ស៊ីជាអ្នកទទួលខុសត្រូវលើអំពើហិង្សានៅភាគខាងកើតអ៊ុយក្រែន ។
អំពើហិង្សាត្រូវបានបង្កើនដោយរុស្ស៊ី ។លោក អូបាម៉ា បន្តថា រុស្ស៊ីរំលោភបំពានផ្ទួនៗលើបូរណភាពដែនដីអ៊ុយក្រែន ហើយប្រទេសនេះកំពុងស្ថិតនៅឯកោកាន់តែខ្លាំង ក្រោយបញ្ចប់សង្គ្រាមត្រជាក់មក ។ សេដ្ឋកិច្ចប្រទេសនេះកំពុងដាំក្បាលចុះ ហើយការគំរាមកំហែងនោះនឹងត្រូវបង់តម្លៃខ្ពស់បំផុត ៕
ចែករំលែកព័តមាននេះ